വാഷിംഗ്്ടണ്‍ : വെനസ്വേലന്‍ പ്രസിഡന്റ് നിക്കോളാസ് മഡുറോയോട് അമേരിക്ക സ്വീകരിക്കുന്ന സമ്മര്‍ദ്ദനീക്കം കൂടുതല്‍ കടുപ്പത്തിലേക്ക്. രാജ്യത്തെ വ്യോമപാത 'അടച്ചതായി' പ്രഖ്യാപിച്ച യുഎസ് പ്രസിഡന്റ് ഡോണള്‍ഡ് ട്രംപിന്റെ നിര്‍ദ്ദേശം അന്താരാഷ്ട്ര വിമാനക്കമ്പനികള്‍ക്ക് മുന്നറിയിപ്പായി മാറി. മറ്റൊരു രാജ്യത്തിന്റെ വ്യോമപാത അടയ്ക്കാനുള്ള നിയമപരമായ അധികാരം യുഎസിന് ഇല്ലെങ്കിലും ട്രംപിന്റെ സാമൂഹ്യമാധ്യമ പ്രഖ്യാപനത്തെ അധിനിവേശ ഭീഷണിയെന്നാണ് വെനസ്വേല വിശേഷിപ്പിച്ചത്. വ്യോമപാത അടയ്ക്കല്‍ മുന്നറിയിപ്പിനെ തുടര്‍ന്ന് മഡുറോ ട്രംപുമായി ബന്ധപ്പെടാന്‍ ശ്രമിച്ചതായും റിപ്പോര്‍ട്ടുകളുണ്ട്. ഇതിന് ഒപ്പം, ഈ ആഴ്ച ആദ്യം മഡുറോയെയും കൂട്ടാളികളെയും 'വിദേശ തീവ്രവാദ സംഘടനയിലെ അംഗങ്ങള്‍' എന്നു യുഎസ് പ്രഖ്യാപിച്ചിരുന്നു. രാജ്യത്തിനെതിരെ കരയാക്രമണങ്ങളും പരിഗണിക്കുന്നതായും ട്രംപ് സൂചന നല്‍കിയിരുന്നു.
വെനസ്വേലന്‍ പ്രസിഡന്റ് സ്വമേധയാ പദവി ഒഴിയാതെയിരുന്നാല്‍ 'മറ്റു മാര്‍ഗങ്ങള്‍' ഉള്‍പ്പെടെ പരിഗണിക്കുമെന്ന് ട്രംപ് മഡുറോയ്ക്ക് മുന്നറിയിപ്പ് നല്‍കിയതായി വാള്‍ സ്റ്റ്രീറ്റ് ജേര്‍ണല്‍ റിപ്പോര്‍ട്ട് ചെയ്തു. വെനസ്വേലയിലെ മയക്കുമരുന്നുമായി ബന്ധപ്പെട്ട കേന്ദ്രങ്ങളിലേക്ക് ആക്രമണം ആസൂത്രണം ചെയ്യുന്നതായി ന്യൂയോര്‍ക്ക് ടൈംസ് റിപ്പോര്‍ട്ട് ചെയ്തു.. വ്യോമപാത മുന്നറിയിപ്പിന് പിന്നാലെ മഡുറോ ട്രംപുമായി ആവര്‍ത്തിച്ച് ബന്ധപ്പെടാന്‍ ശ്രമിച്ചുവെന്ന് സിഎന്‍എന്‍ റിപ്പോര്‍ട്ട് ചെയ്തു. ഇതിനിടെ വെനസ്വേലയുടെ വ്യോമപാത ഒഴിവാക്കി നിരവധിവിമാനങ്ങള്‍ മറ്റുവ്യോമപാതകള്‍ തേടാന്‍ ആരംഭിച്ചു.
കഴിഞ്ഞ ആഴ്ച ട്രംപും മഡുറോയും ടെലിഫോണില്‍ സംസാരിച്ചു എന്ന റിപ്പോര്‍ട്ട് കൂടി പുറത്ത് വന്നു. യുഎസില്‍ കൂടിക്കാഴ്ചയ്ക്കും സാധ്യതകള്‍ ചര്‍ച്ചചെയ്തുവെന്ന് ന്യൂയോര്‍ക്ക് ടൈംസ് റിപ്പോര്‍ട്ട് ചെയ്തു. ഇരുരാജ്യ നേതാക്കളുടെയും നേരിട്ടുള്ള ബന്ധപ്പെടല്‍ വര്‍ഷങ്ങള്‍ക്കിടയില്‍ അപൂര്‍വമാണെന്ന് റിപ്പോര്‍ട്ട് വിലയിരുത്തി. എന്നാല്‍ ഈ ഫോണ്‍ കോളിനെക്കുറിച്ച് വൈറ്റ് ഹൗസും മഡുറോ സര്‍ക്കാരും ഔദ്യോഗിക സ്ഥിരീകരണമൊന്നും നല്‍കിയിട്ടില്ല. വിവിധ റിപ്പോര്‍ട്ടുകള്‍ വരികയാണെങ്കിലും ട്രംപിനോ അദ്ദേഹത്തിന്റെ ഭരണകൂടത്തിലെ ആരുടേയോ ഭാഗത്ത് നിന്നോ ഔദ്യോഗിക നിലപാട് ഇതുവരെ പുറത്തുവന്നിട്ടില്ല.
യുഎസ് സൈനിക സന്നാഹം വര്‍ധിപ്പിക്കുന്നു
സമീപകാലത്ത് വെനസ്വേലയിലെ സി.ഐ.എ പ്രവര്‍ത്തനങ്ങള്‍ക്ക് അനുമതി നല്‍കിയതായി ട്രംപ് വെളിപ്പെടുത്തിയിരുന്നു. അതോടൊപ്പം, അമേരിക്ക പതിനൊന്നിലധികം യുദ്ധക്കപ്പലുകളും 15,000ത്തോളം സൈനികരെയും ഉള്‍പ്പെടുത്തി കരീബിയന്‍ മേഖലയിലെ സന്നാഹം ശക്തമാക്കിയതായി സിഎന്‍എന്‍ റിപ്പോര്‍ട്ട് ചെയ്തു. 'ഓപ്പറേഷന്‍ സൗതേണ്‍ സ്പിയര്‍' എന്ന പേരില്‍ പെന്റഗണ്‍ നടത്തുന്ന മയക്കുമരുന്ന് വിരുദ്ധ നടപടിയുടെ ഭാഗമായി നിരവധി മയക്കുമരുന്ന് കപ്പലുകള്‍ ലക്ഷ്യമിട്ടിട്ടുണ്ടെന്നും റിപ്പോര്‍ട്ടുണ്ട്.
മുന്നറിയിപ്പ് ശക്തമാക്കി ട്രംപ്; വെനസ്വേലയിലെ 'ഡ്രഗ്' സെന്ററുകള്‍ ലക്ഷ്യംവയ്ക്കുമോ?
