ന്യൂഡല്‍ഹി: ഒമാനിലെ സൊഹാര്‍ തീരത്തുനിന്ന് അകലെ നങ്കൂരമിട്ടിരുന്ന നിക്കരാഗ്വന്‍ പതാകയുള്ള എണ്ണക്കപ്പലിനു നേരെയുണ്ടായ ഡ്രോണ്‍ ആക്രമണത്തില്‍ രണ്ട് ഇന്ത്യന്‍ നാവികരെ കാണാതായി. കപ്പലിലുണ്ടായിരുന്ന 11 ഇന്ത്യക്കാരില്‍ ഒന്‍പത് പേരെ രക്ഷപ്പെടുത്തിയതായും ഇവര്‍ സുരക്ഷിതരാണെന്നും കേന്ദ്ര തുറമുഖ, ഷിപ്പിങ് മന്ത്രി സര്‍ബാനന്ദ സോനോവാള്‍ അറിയിച്ചു.
ഒക്ടോബര്‍ 11നാണ് എം.ടി. പെട്രോ ഡോള്‍ഫിന്‍ എന്ന ടാങ്കറിനു നേരെ ആക്രമണമുണ്ടായത്. കാണാതായ നാവികര്‍ക്കായി പ്രാദേശിക തീരസംരക്ഷണ സേനയുടെ നേതൃത്വത്തില്‍ തിരച്ചിലും രക്ഷാപ്രവര്‍ത്തനവും തുടരുകയാണ്. രക്ഷാപ്രവര്‍ത്തനത്തിന് ആവശ്യമായ എല്ലാ സഹായങ്ങളും ഉറപ്പാക്കാന്‍ ബന്ധപ്പെട്ട അധികൃതരുമായി നിരന്തരം ഏകോപനം നടത്തുന്നുണ്ടെന്ന് സോനോവാള്‍ വ്യക്തമാക്കി.
സംഭവത്തില്‍ ആശങ്ക രേഖപ്പെടുത്തിയ ഇന്ത്യന്‍ വിദേശകാര്യ മന്ത്രാലയം, ഇത്തരം ആക്രമണങ്ങള്‍ മേഖലയിലെ സംഘര്‍ഷാവസ്ഥ കൂടുതല്‍ വഷളാക്കുകയാണെന്ന് പ്രതികരിച്ചു. മസ്‌കറ്റിലെ ഇന്ത്യന്‍ എംബസിയും പ്രാദേശിക അധികൃതരുമായി ബന്ധപ്പെട്ട് സ്ഥിതിഗതികള്‍ നിരീക്ഷിച്ചുവരികയാണ്.
അതേസമയം, ഒക്ടോബര്‍ 11ന് ഹോര്‍മുസ് കടലിടുക്കില്‍ മാര്‍ഷല്‍ ദ്വീപുകളുടെ പതാകയുള്ള എം.ടി. വാല്‍തെറ എന്ന ടാങ്കറിനു നേരെയും അജ്ഞാത വസ്തു ഉപയോഗിച്ച് ആക്രമണമുണ്ടായി. കപ്പലില്‍ തീപിടിത്തമുണ്ടായെങ്കിലും അതിലുണ്ടായിരുന്ന 11 ഇന്ത്യന്‍ നാവികരും സുരക്ഷിതരാണെന്ന് സോനോവാള്‍ അറിയിച്ചു.
ആഗോള വ്യാപാരക്കപ്പല്‍ മേഖലയിലെ പ്രധാന നാവികസേനാ സംഭാവനക്കാരില്‍ ഒന്നാണ് ഇന്ത്യ. 2025ല്‍ രാജ്യത്ത് 3.2 ലക്ഷത്തിലധികം സജീവ നാവികര്‍ ഉണ്ടായിരുന്നുവെന്നാണ് ഷിപ്പിങ് മന്ത്രാലയത്തിന്റെ കണക്ക്.
ഒമാനില്‍ ഡ്രോണ്‍ ആക്രമണത്തില്‍ ടാങ്കര്‍ തകര്‍ന്നു; രണ്ട് ഇന്ത്യന്‍ നാവികരെ കാണാതായി, ഒന്‍പത് പേര്‍ രക്ഷപ്പെട്ടു
