വാഷിംഗ്ടൺ: ഇറാനെതിരെ വ്യാപകമായ സൈനികാക്രമണം നടത്തുമെന്ന അമേരിക്കൻ പ്രസിഡന്റ് ഡോണൾഡ് ട്രംപിന്റെ ഭീഷണി അന്താരാഷ്ട്ര നിയമലംഘനമാകാമെന്ന് വിദഗ്ധർ മുന്നറിയിപ്പ് നൽകി.
ഇറാൻ യുദ്ധത്തിന് പരിഹാരമായി അനുകൂല കരാറിൽ എത്താത്ത പക്ഷം രാജ്യത്തെ വൈദ്യുത നിലയങ്ങളും പാലങ്ങളും ഉൾപ്പെടെ പ്രധാന അടിസ്ഥാന സൗകര്യങ്ങൾ മുഴുവൻ നശിപ്പിക്കുമെന്ന് ട്രംപ് പ്രസ്താവിച്ചിരുന്നു. ഈ നീക്കം 'സമൂഹശിക്ഷ' (collective punishment) ആകാമെന്നും സാധാരണ ജനങ്ങൾക്ക് ആവശ്യമായ അടിസ്ഥാന സൗകര്യങ്ങൾ ലക്ഷ്യമിടുന്നത് അന്താരാഷ്ട്ര നിയമപ്രകാരം നിരോധിതമാണെന്നും വിദഗ്ധർ ചൂണ്ടിക്കാട്ടുന്നു.
യുദ്ധകാല മനുഷ്യാവകാശ മാനദണ്ഡങ്ങൾ നിശ്ചയിക്കുന്ന ജനീവ കൺവെൻഷൻ പ്രകാരം, സാധാരണ ജനങ്ങളെ ബാധിക്കുന്ന അടിസ്ഥാന സൗകര്യങ്ങൾ ആക്രമിക്കുന്നത് നിയമവിരുദ്ധമാണ്. അമേരിക്കയും ഈ നിയമങ്ങൾ സ്വന്തം നിയമവ്യവസ്ഥയിൽ ഉൾപ്പെടുത്തിയിട്ടുള്ളതാണ്.
അന്താരാഷ്ട്ര നിയമ വിദഗ്ധയായ റേച്ചൽ വാൻ ലാൻഡിംഗവും മുൻ ഫെഡറൽ പ്രോസിക്യൂട്ടറായ മാർഗരറ്റ് ഡോണോവനും, ട്രംപിന്റെ പ്രസ്താവന 'സമ്പൂർണ യുദ്ധം' എന്ന ആശയത്തെ സൂചിപ്പിക്കുന്നതാണെന്ന് വിലയിരുത്തി. ഇത് യുദ്ധനിയമങ്ങളിൽ നിശ്ചയിച്ച പരിധികൾ പൂർണമായി തള്ളുന്നതാണെന്നും അവർ അഭിപ്രായപ്പെട്ടു.
അതേസമയം, ഒരു വൈദ്യുത നിലയം സൈനിക ആവശ്യങ്ങൾക്ക് ഉപയോഗിക്കുന്നതായി തെളിഞ്ഞാൽ മാത്രം അതിനെ ആക്രമിക്കാമെന്ന് മുൻ സ്റ്റേറ്റ് ഡിപ്പാർട്മെന്റ് നിയമ ഉപദേഷ്ടാവായ ബ്രയാൻ ഫിനുകേൻ വ്യക്തമാക്കി. എല്ലാ നിലയങ്ങളും ഒരുപോലെ ആക്രമിക്കുന്നത് നിയമപരമായി ന്യായീകരിക്കാനാവില്ലെന്നും അദ്ദേഹം പറഞ്ഞു.
ഇതിനിടെ, ഐക്യരാഷ്ട്രസഭയുടെ ചട്ടക്കൂടായ യുഎൻ ചാർട്ടർ അനുസരിച്ച്, സ്വയംരക്ഷയ്ക്കോ യു.എൻ. അനുമതിയോടെയോ മാത്രമേ യുദ്ധം തുടങ്ങാവൂ. ഈ അടിസ്ഥാന തത്വങ്ങൾ ലംഘിക്കപ്പെടുന്ന സാഹചര്യമാണെന്ന് വിദഗ്ധർ മുന്നറിയിപ്പ് നൽകുന്നു.
യുദ്ധം ഒഴിവാക്കുകയും സാധാരണ ജനങ്ങളുടെ ജീവനും അടിസ്ഥാന സൗകര്യങ്ങളും സംരക്ഷിക്കുകയും ചെയ്യുന്നതാണ് അന്താരാഷ്ട്ര നിയമങ്ങളുടെ പ്രധാന ലക്ഷ്യമെന്ന് അവർ ഓർമ്മിപ്പിച്ചു.
ഇറാനെതിരെ ട്രംപിന്റെ ഭീഷണി 'യുദ്ധക്കുറ്റമാകാ'മെന്ന് അന്താരാഷ്ട്ര നിയമ വിദഗ്ധരുടെ മുന്നറിയിപ്പ്
