വാഷിങ്ടണ്‍: ഇന്ധനവില നിയന്ത്രിക്കുന്നതിന്റെ ഭാഗമായി റഷ്യയില്‍നിന്ന് വന്‍തോതില്‍ ഡീസല്‍ വാങ്ങാന്‍ ധാരണയായതായി അമേരിക്കന്‍ പ്രസിഡന്റ് ഡോണള്‍ഡ് ട്രംപ്. റഷ്യന്‍ ഡീസല്‍ കയറ്റുമതിക്കുള്ള ഉപരോധം ആറുമാസത്തേക്ക് നിര്‍ത്തിവയ്ക്കുന്നതും നീക്കത്തിന്റെ ഭാഗമാണ്. യുക്രെയ്ന്‍ യുദ്ധത്തിന്റെ പശ്ചാത്തലത്തില്‍ മോസ്‌കോയ്ക്കുമേലുള്ള സമ്മര്‍ദം കുറയ്ക്കുന്ന നയമാറ്റമായാണ് ഇത് വിലയിരുത്തപ്പെടുന്നത്.
റഷ്യന്‍ പ്രസിഡന്റ് വ്‌ലാദിമിര്‍ പുടിനുമായി ധാരണയിലെത്തിയതായി ട്രംപ് വെള്ളിയാഴ്ച ട്രൂത്ത് സോഷ്യലിലൂടെ അറിയിച്ചു. ആദ്യഘട്ടത്തില്‍ മൂന്ന് ലക്ഷത്തിലധികം ടണ്‍ ഡീസല്‍ അമേരിക്കന്‍, ആഗോള വിപണികളിലെത്തിക്കും. നവംബറില്‍ അഞ്ചുലക്ഷം ടണ്ണും അതിനുശേഷം പത്തുലക്ഷം ടണ്ണും നല്‍കും. റിഫൈനറികളുടെ സാഹചര്യമനുസരിച്ച് അധികമായി 30 ലക്ഷം ടണ്‍ ഡീസല്‍ കൂടി കുറഞ്ഞ സമയത്തിനുള്ളില്‍ എത്തിക്കുമെന്നും ട്രംപ് വ്യക്തമാക്കി. പ്രഖ്യാപിച്ച അളവുകള്‍ ആകെ ഏകദേശം 3.6 കോടി ബാരലിന് തുല്യമാണ്.
അമേരിക്കയില്‍ ഡീസല്‍, പെട്രോള്‍ വില ഉയരുന്നത് ഭരണകക്ഷിയായ റിപ്പബ്ലിക്കന്‍ പാര്‍ട്ടിക്ക് രാഷ്ട്രീയ സമ്മര്‍ദമുണ്ടാക്കുന്ന സാഹചര്യത്തിലാണ് തീരുമാനം. കര്‍ഷകര്‍, കന്നുകാലി വളര്‍ത്തുന്നവര്‍, ചരക്കുഗതാഗത മേഖലയിലുള്ളവര്‍ എന്നിവര്‍ക്കായി ഇന്ധനവില കുറയ്ക്കുകയാണ് പ്രധാന ലക്ഷ്യമെന്ന് ട്രംപ് പറഞ്ഞു. എഎഎ കണക്കുപ്രകാരം വെള്ളിയാഴ്ച അമേരിക്കയില്‍ ഡീസലിന്റെ ശരാശരി വില ഗാലന് 6.28 ഡോളറായിരുന്നു. കഴിഞ്ഞ വര്‍ഷം ഇതേ സമയത്ത് 3.68 ഡോളറായിരുന്നു വില.
അതേസമയം, റഷ്യയ്ക്കുമേലുള്ള ഉപരോധത്തില്‍ ഇളവ് നല്‍കുന്നതിനെ യുക്രെയ്ന്‍ പ്രസിഡന്റ് വൊളോഡിമിര്‍ സെലെന്‍സ്‌കി വിമര്‍ശിച്ചു. റഷ്യന്‍ എണ്ണ ഉല്‍പന്നങ്ങള്‍ വില്‍ക്കാന്‍ അനുവദിക്കുന്നത് യുദ്ധം അവസാനിപ്പിക്കുന്നതിനുപകരം അത് തുടരാന്‍ സഹായിക്കുമെന്ന് അദ്ദേഹം പ്രതികരിച്ചു. റഷ്യന്‍ ആക്രമണങ്ങള്‍ക്കെതിരെ കൂടുതല്‍ നടപടികള്‍ ആവശ്യമാണെന്നും സെലെന്‍സ്‌കി വ്യക്തമാക്കി.
മിഡില്‍ ഈസ്റ്റിലെയും യുക്രെയ്‌നിലെയും യുദ്ധങ്ങള്‍ ആഗോള ഡീസല്‍ വിതരണത്തെ ബാധിച്ചിട്ടുണ്ട്. റിഫൈനറികള്‍ പ്രവര്‍ത്തനരഹിതമായതോടെ പ്രതിദിനം ഏകദേശം 16 ലക്ഷം ബാരല്‍ ഡീസലിന്റെ കുറവുണ്ടെന്നാണ് അന്താരാഷ്ട്ര ഊര്‍ജ ഏജന്‍സിയുടെ കണക്ക്. റഷ്യയില്‍നിന്നുള്ള പ്രഖ്യാപിത അളവിലുള്ള ഇന്ധനം ഒരേസമയം വിപണിയിലെത്തിയാല്‍ ഈ കുറവ് ഏകദേശം മൂന്നാഴ്ചത്തേക്ക് നികത്താനാകും.
യുക്രെയ്ന്‍ യുദ്ധം അവസാനിപ്പിക്കാനുള്ള ചര്‍ച്ചകള്‍ പുനരാരംഭിക്കാന്‍ അമേരിക്ക ശ്രമിക്കുന്നതിനിടെയാണ് പുതിയ ധാരണ. ഇരുരാജ്യങ്ങളും തമ്മിലുള്ള ഊര്‍ജവാണിജ്യ സഹകരണം വര്‍ധിപ്പിക്കാനുള്ള സാധ്യതയും നീക്കം മുന്നോട്ടുവയ്ക്കുന്നു. എന്നാല്‍ ഉപരോധത്തിലെ ഇളവ് യുദ്ധത്തിന്റെ ഗതിയെയും റഷ്യയ്ക്കുമേലുള്ള അന്താരാഷ്ട്ര സമ്മര്‍ദത്തെയും എങ്ങനെ ബാധിക്കുമെന്നത് നിര്‍ണായകമാണ്.
റഷ്യയില്‍നിന്ന് ഡീസല്‍ വാങ്ങാന്‍ ട്രംപ്; ഉപരോധത്തില്‍ ഇളവ് നല്‍കാന്‍ നീക്കം
