ജറുസലേം: പാര്‍ലമെന്റ് തെരഞ്ഞെടുപ്പിന്റെ ഔദ്യോഗികമായി സാക്ഷ്യപ്പെടുത്തിയ ഫലം നിയമപരമായി അംഗീകരിച്ച് ഇസ്രയേല്‍ പ്രസിഡന്റ് ഐസക് ഹെര്‍സോഗ്. പുതിയ സര്‍ക്കാര്‍ രൂപീകരണവുമായി ബന്ധപ്പെട്ട് വിവിധ രാഷ്ട്രീയ പാര്‍ട്ടികളുടെ പ്രതിനിധികളുമായി കൂടിയാലോചനകള്‍ ആരംഭിക്കുമെന്നും അദ്ദേഹം അറിയിച്ചു.
തെരഞ്ഞെടുപ്പ് ഫലം അംഗീകരിച്ച പ്രസിഡന്റിന്റെ നടപടി പ്രധാനമന്ത്രി ബെഞ്ചമിന്‍ നെതന്യാഹുവിന്റെ തെരഞ്ഞെടുപ്പ് ക്രമക്കേട് ആരോപണങ്ങള്‍ക്ക് തിരിച്ചടിയായി. നെതന്യാഹുവിന്റെ മത- ദേശീയവാദ സഖ്യത്തിന് പാര്‍ലമെന്റായ നെസെറ്റില്‍ ഭൂരിപക്ഷം നഷ്ടമായ തെരഞ്ഞെടുപ്പില്‍ അറബ് പാര്‍ട്ടികള്‍ ചരിത്രപരമായ മുന്നേറ്റം നേടിയിരുന്നു. ഇതിനെ തുടര്‍ന്നാണ് തെരഞ്ഞെടുപ്പ് ഫലത്തിന്റെ വിശ്വാസ്യത ചോദ്യം ചെയ്ത് നെതന്യാഹുവും അനുയായികളും രംഗത്തെത്തിയത്.
അറബ് പാര്‍ട്ടികള്‍ വിദേശസഹായത്തോടെ തെരഞ്ഞെടുപ്പ് 'അട്ടിമറിച്ചുവെന്ന' ആരോപണമാണ് നെതന്യാഹുവും അനുയായികളും ആവര്‍ത്തിച്ചുകൊണ്ടിരിക്കുന്നത്. എന്നാല്‍ ഈ ആരോപണങ്ങള്‍ക്ക് ഇതുവരെ വിശ്വസനീയമായ തെളിവുകളൊന്നും പുറത്തുവന്നിട്ടില്ല.
പുതിയ പ്രധാനമന്ത്രിയെ നിശ്ചയിക്കുന്നതിനുള്ള നടപടികളുടെ ഭാഗമായി പ്രസിഡന്റ് വിവിധ രാഷ്ട്രീയ പാര്‍ട്ടികളുടെ നേതാക്കളുമായി കൂടിക്കാഴ്ച നടത്തും. തുടര്‍ന്ന് സര്‍ക്കാര്‍ രൂപീകരിക്കാന്‍ ഏറ്റവും കൂടുതല്‍ സാധ്യതയുള്ള നേതാവിനെ പ്രധാനമന്ത്രി പദത്തിലേക്ക് നിയോഗിക്കുകയാണ് പ്രസിഡന്റിന്റെ ചുമതല. ഇതോടെ നെതന്യാഹുവിന്റെ എതിരാളികള്‍ക്ക് അധികാരത്തിലെത്താനുള്ള സാധ്യതയും തുറക്കും.
തെരഞ്ഞെടുപ്പുമായി ബന്ധപ്പെട്ട് വിവിധ കക്ഷികള്‍ ഉന്നയിച്ച ക്രമക്കേട് ആരോപണങ്ങളില്‍ വിശദമായ അന്വേഷണം നടത്തിയെന്നും തെരഞ്ഞെടുപ്പിന്റെ വിശ്വാസ്യതയെയോ ഫലത്തെയോ ബാധിക്കുന്ന തരത്തിലുള്ള ക്രമക്കേടുകള്‍ കണ്ടെത്താനായിട്ടില്ലെന്നും ഇസ്രയേല്‍ തെരഞ്ഞെടുപ്പ് കമ്മീഷന്‍ വ്യക്തമാക്കി.
അതേസമയം, തെരഞ്ഞെടുപ്പില്‍ വിദേശ ഇടപെടലുണ്ടായെന്ന ആരോപണത്തില്‍ ഡേവിഡ് സിനിയുടെ നേതൃത്വത്തിലുള്ള ഷിന്‍ ബെറ്റ് രഹസ്യാന്വേഷണ വിഭാഗത്തിന്റെ പ്രത്യേക അന്വേഷണം തുടരുകയാണ്. നെതന്യാഹുവിന്റെ വിശ്വസ്തനും നിയമനത്തിലൂടെ ചുമതലയിലെത്തിയ ഉദ്യോഗസ്ഥനുമാണ് സിനി.
ബുധനാഴ്ച നടന്ന തെരഞ്ഞെടുപ്പ് കമ്മീഷന്‍ അംഗങ്ങളുടെ അടച്ചിട്ട യോഗത്തില്‍ കമ്മീഷന്‍ മേധാവിയും സുപ്രിം കോടതി ജഡ്ജിയുമായ നോം സോള്‍ബര്‍ഗ് ഷിന്‍ ബെറ്റിന്റെ രഹസ്യാന്വേഷണ വിലയിരുത്തല്‍ വായിച്ചു. ഇസ്രയേലിന് വിരുദ്ധ നിലപാടുള്ള രാജ്യങ്ങള്‍ ഉള്‍പ്പെടെയുള്ള വിദേശ രാജ്യങ്ങളില്‍നിന്ന് വന്‍തോതില്‍ പണം ഇസ്രയേലിലേക്ക് എത്തിയെന്ന വ്യാപകമായ പ്രവണത കണ്ടെത്തിയതായാണ് ഷിന്‍ ബെറ്റിന്റെ വിലയിരുത്തലില്‍ പറയുന്നത്.
എന്നാല്‍ ഈ ആരോപണത്തെ സാധൂകരിക്കുന്ന തെളിവുകളൊന്നും ഷിന്‍ ബെറ്റ് ഹാജരാക്കിയിട്ടില്ല. അടച്ചിട്ട യോഗത്തില്‍ പങ്കെടുത്ത ഒരാളില്‍നിന്ന് അസോസിയേറ്റഡ് പ്രസ് (എ പി) ഈ വിലയിരുത്തലിന്റെ രേഖാമൂലമുള്ള പകര്‍പ്പ് നേടിയിട്ടുണ്ട്. രഹസ്യയോഗത്തെക്കുറിച്ച് സംസാരിക്കുന്നതിനാല്‍ പേര് വെളിപ്പെടുത്തരുതെന്ന നിബന്ധനയിലാണ് അദ്ദേഹം വിവരം കൈമാറിയത്.
വിദേശ ശക്തികള്‍ തെരഞ്ഞെടുപ്പിനെ സ്വാധീനിക്കാന്‍ ശ്രമിച്ചെന്ന ആരോപണങ്ങള്‍ ഗൗരവമുള്ളതാണെന്നും അന്വേഷണം തുടരുകയാണെന്നും തെരഞ്ഞെടുപ്പ് കമ്മീഷന്‍ നേരത്തേ വ്യക്തമാക്കിയിരുന്നു. എന്നാല്‍ അത്തരം ഇടപെടലുകള്‍ നടന്നിട്ടുണ്ടെങ്കില്‍പ്പോലും തെരഞ്ഞെടുപ്പ് ഫലത്തെ ബാധിച്ചിട്ടില്ലെന്നാണ് കമ്മീഷന്റെ നിലപാട്.
ബുധനാഴ്ച ഈ നിലപാട് ആവര്‍ത്തിച്ച സോള്‍ബര്‍ഗ്, വിദേശ ഇടപെടല്‍ സംബന്ധിച്ച ആരോപണങ്ങള്‍ ഇപ്പോള്‍ സംശയങ്ങള്‍ മാത്രമാണെന്ന് പറഞ്ഞു. അവ തെളിയിക്കപ്പെട്ടാല്‍ പോലും തെരഞ്ഞെടുപ്പ് ഫലത്തിലുള്ള സ്വാധീനം പരിമിതമായിരിക്കുമെന്നും അദ്ദേഹം വ്യക്തമാക്കി. ഹെര്‍സോഗിന് ഔദ്യോഗിക തെരഞ്ഞെടുപ്പ് ഫലം കൈമാറുന്ന ചടങ്ങിലായിരുന്നു അദ്ദേഹത്തിന്റെ പ്രതികരണം.
തെരഞ്ഞെടുപ്പ് ഫലത്തിന്റെ വിശ്വാസ്യത ചോദ്യം ചെയ്യുന്നത് അപകടകരമാണെന്നും ഔദ്യോഗികമായി സാക്ഷ്യപ്പെടുത്തിയ ഫലം നിയമപരമായി ബാധകമാണെന്നും സോള്‍ബര്‍ഗ് മുന്നറിയിപ്പ് നല്‍കി. തെരഞ്ഞെടുപ്പ് പ്രക്രിയയിലുള്ള പൊതുജനവിശ്വാസം തകര്‍ക്കാന്‍ എളുപ്പമാണെങ്കിലും അത് പുനഃസ്ഥാപിക്കാന്‍ ഏറെ പ്രയാസമാണെന്നും അദ്ദേഹം ചൂണ്ടിക്കാട്ടി.
ഒക്ടോബര്‍ 27ന് നടന്ന തെരഞ്ഞെടുപ്പില്‍ നെതന്യാഹുവിന്റെ സഖ്യത്തിനോ അദ്ദേഹത്തിന്റെ പ്രധാന എതിരാളിയും പ്രതിപക്ഷ നേതാവുമായ ഗാഡി ഐസന്‍കോട്ടിന്റെ സഖ്യത്തിനോ സര്‍ക്കാര്‍ രൂപീകരിക്കാന്‍ ആവശ്യമായ പാര്‍ലമെന്ററി ഭൂരിപക്ഷം നേടാനായില്ല. ഇതോടെ ഇരുനേതാക്കളും തമ്മില്‍ സഖ്യമുണ്ടാക്കാനുള്ള സാധ്യതയും ഐസന്‍കോട്ടിന് അറബ് പാര്‍ട്ടികളുടെ പിന്തുണയോടെ സര്‍ക്കാര്‍ രൂപീകരിക്കാനുള്ള സാധ്യതയും ഉയര്‍ന്നിട്ടുണ്ട്.
വരും ദിവസങ്ങളില്‍ പ്രസിഡന്റ് വിവിധ രാഷ്ട്രീയ പാര്‍ട്ടികളുടെ പ്രതിനിധികളുമായി കൂടിക്കാഴ്ച നടത്തും. തുടര്‍ന്ന് നെതന്യാഹുവിനെയോ ഐസന്‍കോട്ടിനെയോ ഉള്‍പ്പെടെ സര്‍ക്കാര്‍ രൂപീകരിക്കാന്‍ ഏറ്റവും കൂടുതല്‍ സാധ്യതയുള്ള നേതാവിനെ പ്രധാനമന്ത്രി പദത്തിലേക്ക് നിയോഗിക്കും. ഇതോടെ ആഴ്ചകള്‍ നീളുന്ന രാഷ്ട്രീയ ചര്‍ച്ചകള്‍ക്ക് വഴിയൊരുങ്ങും. ഇരുവര്‍ക്കും സര്‍ക്കാര്‍ രൂപീകരിക്കാന്‍ സാധിക്കാത്ത സാഹചര്യമുണ്ടായാല്‍ അടുത്ത വര്‍ഷം ആദ്യം വീണ്ടും തെരഞ്ഞെടുപ്പ് നടത്തേണ്ടിവരും.
ഇതിനിടെ, വിദേശ ഇടപെടല്‍ സംബന്ധിച്ച അന്വേഷണത്തിന്റെ ഭാഗമായി റാം പാര്‍ട്ടി നേതാവ് മന്‍സൂര്‍ അബ്ബാസ് ഉള്‍പ്പെടെയുള്ള തെരഞ്ഞെടുക്കപ്പെട്ട ജനപ്രതിനിധികളെ ചോദ്യം ചെയ്യാന്‍ അനുമതി തേടി ഷിന്‍ ബെറ്റ് ചൊവ്വാഴ്ച അറ്റോര്‍ണി ജനറലിനെ സമീപിച്ചതായി ഇസ്രയേല്‍ മാധ്യമങ്ങള്‍ റിപ്പോര്‍ട്ട് ചെയ്തു.
എന്നാല്‍ ഈ ആവശ്യം അറ്റോര്‍ണി ജനറല്‍ ഗാലി ബഹരവ്- മിയാര തള്ളി. മതിയായ തെളിവുകളില്ലാതെ പൗരന്മാരെയോ തെരഞ്ഞെടുക്കപ്പെട്ട ജനപ്രതിനിധികളെയോ ചോദ്യം ചെയ്യാന്‍ അനുവദിക്കാനാവില്ലെന്ന് അവര്‍ വ്യക്തമാക്കി.
ഷിന്‍ ബെറ്റിന്റെ നീക്കത്തിനെതിരെ അറബ് പാര്‍ട്ടികളുടെ ജോയിന്റ് ലിസ്റ്റ് ശക്തമായി രംഗത്തെത്തി. അറബ് വോട്ടിന്റെ രാഷ്ട്രീയ പ്രസക്തി ഇല്ലാതാക്കാനും അതിനെ അപകീര്‍ത്തിപ്പെടുത്താനും നെതന്യാഹുവും അനുയായികളും നടത്തുന്ന പ്രകോപനപരമായ നീക്കമാണിതെന്ന് സഖ്യം ആരോപിച്ചു.
അതേസമയം, നെതന്യാഹുവിന്റെ തീവ്രവലതുപക്ഷ സഖ്യകക്ഷിയായ ഇറ്റാമര്‍ ബെന്‍- ഗ്വിര്‍ തെരഞ്ഞെടുപ്പ് ഫലം സാധുവാണെന്ന കമ്മീഷന്റെ കണ്ടെത്തല്‍ തള്ളി. അറബ് രാഷ്ട്രീയ പാര്‍ട്ടികളുടെ നേതാക്കളെയെല്ലാം അറസ്റ്റ് ചെയ്യണമെന്നും സംശയങ്ങള്‍ പൂര്‍ണമായി നീങ്ങുന്നതുവരെ രഹസ്യാന്വേഷണ വിഭാഗത്തിന്റെ ഭൂഗര്‍ഭ ചോദ്യംചെയ്യല്‍ കേന്ദ്രങ്ങളില്‍ പാര്‍പ്പിച്ച് ചോദ്യം ചെയ്യണമെന്നും അദ്ദേഹം ആവശ്യപ്പെട്ടു. ഷിന്‍ ബെറ്റിന്റെ പ്രവര്‍ത്തനങ്ങളില്‍ നേരിട്ട് അധികാരപരിധിയില്ലാത്ത മന്ത്രിയാണ് ബെന്‍-ഗ്വിര്‍.
വിദേശ ഇടപെടല്‍ സംബന്ധിച്ച ഷിന്‍ ബെറ്റിന്റെ അന്വേഷണം തുടരട്ടെയെന്ന് പ്രസിഡന്റ് ഹെര്‍സോഗ് ബുധനാഴ്ച പ്രതികരിച്ചു. എന്നാല്‍ അറബ് വംശജരായ ഇസ്രയേല്‍ വോട്ടര്‍മാരെ അപകീര്‍ത്തിപ്പെടുത്തുന്ന നടപടികള്‍ അംഗീകരിക്കാനാവില്ലെന്നും അദ്ദേഹം മുന്നറിയിപ്പ് നല്‍കി.
അടുത്തിടെ കേട്ടുവരുന്ന വംശീയ അധിക്ഷേപങ്ങളെയും അപമര്യാദയായ പരാമര്‍ശങ്ങളെയും ശക്തമായി അപലപിക്കുന്നുവെന്നും ഹെര്‍സോഗ് വ്യക്തമാക്കി.