വത്തിക്കാന്‍ സിറ്റി: മദ്ധ്യപൂര്‍വേഷ്യയില്‍ കടുത്ത സംഘര്‍ഷങ്ങള്‍ നിലനില്‍ക്കുന്ന സാഹചര്യത്തില്‍ വത്തിക്കാനില്‍ നിന്നുള്ള തന്റെ ആദ്യ വിദേശ യാത്രയായി പോപ്പ് ലിയോ പതിനാലാമന്‍ ടര്‍ക്കിയിലേക്കും ലബനോണിലേക്കും പുറപ്പെട്ടു. അമേരിക്കയില്‍ നിന്ന് തെരഞ്ഞെടുക്കപ്പെട്ട ആദ്യ പോപ്പായ ലിയോയുടെ യാത്രയ്ക്ക് അന്താരാഷ്ട്ര തലത്തില്‍ വന്‍ ശ്രദ്ധയാണ് ലഭിക്കുന്നത്.
ഓര്‍ത്തഡോക്‌സ് സഭയുമായി ബന്ധം ശക്തിപ്പെടുത്തുകയും, ടര്‍ക്കിയിലെ ചരിത്രപ്രധാനമായ നൈസിയ കൗണ്‍സിലിന്റെ 1700ാം വാര്‍ഷികം ആചരിക്കുകയുമാണ് ടര്‍ക്കി സന്ദര്‍ശനത്തിന്റെ പ്രധാന ലക്ഷ്യം. 325ല്‍ ചേര്‍ന്ന ക്രിസ്തുമതത്തിന്റെ ആദ്യ സര്‍വസാധാരണ കൗണ്‍സിലിന്റെ വേദിയായ ഇസ്‌നിക്കില്‍ ഇക്ക്യുമെനിക്കല്‍ പാത്രിയാര്‍ക്ക് ബര്‍ത്തലോമെയുമായി ചേര്‍ന്ന് ലിയോ പ്രാര്‍ത്ഥനയില്‍ പങ്കെടുക്കും. ക്രൈസ്തവ ഐക്യത്തിന്റെ സന്ദേശം ആവര്‍ത്തിക്കുന്ന സംയുക്ത പ്രഖ്യാപനത്തിലും ഇരുവരും ഒപ്പുവെക്കും.
തുടര്‍ന്ന് ലബനോണിലെത്തുന്ന പോപ് ലിയോ, വര്‍ഷങ്ങളായി പ്രതിസന്ധികളിലൂടെ കടന്നുപോകുന്ന ക്രൈസ്തവ സമൂഹത്തിനും വിവിധ മതവിശ്വാസികള്‍ക്കും ആത്മവിശ്വാസം നല്‍കുകയാണ് ലക്ഷ്യമിടുന്നത്. 2020ലെ ബെയ്‌റൂട്ട് തുറമുഖ സ്‌ഫോടന സ്ഥലത്ത് മൗനപ്രാര്‍ത്ഥന നടത്തുന്നതും യാത്രയിലെ നിര്‍ണായക ഘട്ടമാകും. 218 പേര്‍ മരിക്കുകയും ആയിരക്കണക്കിന് പേര്‍ക്ക് പരിക്കേല്‍ക്കുകയും ചെയ്ത ദുരന്തത്തില്‍ ഇതുവരെ ഒരു രാഷ്ട്രീയ നേതാവും ഉത്തരവാദിത്തം ഏറ്റെടുത്തിട്ടില്ലെന്നത് ലബനീസ് സമൂഹത്തില്‍ കടുത്ത അസ്വസ്ഥത സൃഷ്ടിച്ചിട്ടുണ്ട്. സത്യം-നീതി-ഉത്തരവാദിത്തം എന്നീ മൂല്യങ്ങള്‍ മുന്നോട്ടുവെച്ച് ലിയോ ശക്തമായ സന്ദേശം നല്‍കുമെന്ന പ്രതീക്ഷയും ഉയര്‍ന്നിട്ടുണ്ട്.
പ്രദേശത്തെ പുതിയ സംഘര്‍ഷങ്ങള്‍ മൂലം സുരക്ഷാ ആശങ്കകള്‍ ശക്തമാക്കിയിട്ടുണ്ട്. കഴിഞ്ഞ ദിവസങ്ങളില്‍ ഇസ്രയേല്‍ നടത്തിയ വ്യോമാക്രമണത്തില്‍ ഹിസ്ബുല്ലയുടെ പ്രമുഖ നേതാവ് കൊല്ലപ്പെട്ടത് സാഹചര്യത്തിന്റെ ഗൗരവം വ്യക്തമാക്കുന്നുണ്ട്. എന്നിരുന്നാലും പോപ്പിന്റെ സന്ദര്‍ശന സ്ഥലങ്ങളില്‍ പ്രത്യേക ഭീഷണിയില്ലെന്ന് സംഘാടകര്‍ അറിയിച്ചു. ദക്ഷിണ ലബനോണിലേക്കുള്ള സന്ദര്‍ശനം ഒഴിവാക്കിയെങ്കിലും ബെയ്‌റൂട്ടില്‍ ഡ്രോണുകള്‍ മുകളിലൂടെ പറക്കാന്‍ സാധ്യതയുണ്ടെന്ന് അധികൃതര്‍ സമ്മതിച്ചിട്ടുണ്ട്.
യാത്രയിലുടനീളം പോപ്പ് ഇറ്റാലിയന്‍ ഒഴിവാക്കി ഇംഗ്ലീഷിലും ഫ്രഞ്ചിലുമാണ് സംസാരിക്കുക. അന്താരാഷ്ട്ര ജനപങ്കാളിത്തം ലക്ഷ്യമിട്ടാണ് ഭാഷാ തിരഞ്ഞെടുപ്പെന്ന് വത്തിക്കാന്‍ വൃത്തങ്ങള്‍ പറഞ്ഞു. അമേരിക്കന്‍ മാധ്യമങ്ങള്‍ അടക്കം ലോകത്തിലെ പ്രമുഖ വാര്‍ത്താ ഏജന്‍സികള്‍ യാത്ര അടുത്തുനിന്ന് റിപ്പോര്‍ട്ട് ചെയ്യുന്നു.
യാത്രയുടെ അവസാനഘട്ടത്തില്‍ റോമിലേക്ക് മടങ്ങുന്ന വിമാനത്തില്‍ മാധ്യമപ്രവര്‍ത്തകരുമായി ലിയോ നടത്തുന്ന സംവാദം പ്രത്യേക ശ്രദ്ധ നേടും. പോപ്പ് ഫ്രാന്‍സിസിന്റെ കാലത്ത് വിവാദ പ്രസ്താവനകള്‍ക്ക് വേദിയായ ഈ സംവാദത്തില്‍, നയതന്ത്രപരമായ സൂക്ഷ്മത പുലര്‍ത്തുന്ന ലിയോ എന്തുപറയുമെന്നത് ആഗോള സമൂഹം ഉറ്റുനോക്കുകയാണ്.
ഭൂമിശാസ്ത്രപരമായും രാഷ്ട്രീയമായും അസ്ഥിരമായ മേഖലയിലേക്ക് നടത്തുന്ന ഈ ആദ്യ വിദേശ സന്ദര്‍ശനം, സമാധാനത്തിന്റെ സന്ദേശം അതിര്‍ത്തികള്‍ ഭേദിച്ച് എത്തിക്കാനുള്ള ലിയോ പതിനാലാമന്റെ ശ്രമമായാണ് വിലയിരുത്തപ്പെടുന്നത്.
പോപ്പ് ലിയോ പതിനാലാമന്‍ ആദ്യ വിദേശ യാത്രയുടെ ഭാഗമായി ടര്‍ക്കിയിലേക്കും ലബനോണിലേക്കും പുറപ്പെട്ടു
