ന്യൂഡല്‍ഹി: സൗദി അറേബ്യയിലെ റിയാദ് കിങ് ഖാലിദ് അന്താരാഷ്ട്ര വിമാനത്താവളത്തിലുണ്ടായ ആക്രമണത്തില്‍ പരുക്കേറ്റ് ചികിത്സയിലായിരുന്ന ഹൈദരാബാദ് സ്വദേശി മരിച്ചു. ആക്രമണത്തില്‍ 300ലേറെ പേര്‍ക്ക് പരുക്കേറ്റതില്‍ 11 ഇന്ത്യക്കാരും ഉള്‍പ്പെട്ടതായി ഇന്ത്യന്‍ എംബസി അറിയിച്ചു.
മരിച്ചയാളുടെ കുടുംബത്തിന് അനുശോചനം അറിയിച്ച എംബസി, മൃതദേഹം എത്രയും വേഗം നാട്ടിലെത്തിക്കുന്നതിന് ആവശ്യമായ സഹായങ്ങള്‍ നല്‍കുമെന്ന് വ്യക്തമാക്കി. പരുക്കേറ്റ ഇന്ത്യക്കാരുടെ വിവരങ്ങള്‍ ശേഖരിക്കാന്‍ പ്രാദേശിക അധികൃതരുമായും ആശുപത്രികളുമായും ബന്ധപ്പെടുന്നുണ്ടെന്നും അറിയിച്ചു.
ഒക്ടോബര്‍ 10ന് നടന്ന ആക്രമണത്തില്‍ കുറഞ്ഞത് 13 പേര്‍ കൊല്ലപ്പെട്ടതായാണ് റിപ്പോര്‍ട്ട്. സൗദി പൗരന്മാര്‍ക്കു പുറമേ ബംഗ്ലദേശ്, യുഎസ്, ഈജിപ്ത്, ജോര്‍ദാന്‍, സിറിയ, സുഡാന്‍, പലസ്തീന്‍ എന്നിവിടങ്ങളില്‍നിന്നുള്ളവരും മരിച്ചവരില്‍ ഉള്‍പ്പെടുന്നു. ആക്രമണത്തിനു പിന്നില്‍ ഹൂതി വിമതരാണെന്ന് സൗദി അറേബ്യ ആരോപിച്ചു.
ഒക്ടോബര്‍ 6, 7 തീയതികളിലും റിയാദ്, അബഹ വിമാനത്താവളങ്ങള്‍ക്കു നേരെ ആക്രമണമുണ്ടായതായി സൗദി വ്യോമയാന അധികൃതര്‍ അറിയിച്ചു. അന്ന് മൂന്നുപേര്‍ കൊല്ലപ്പെടുകയും 36 പേര്‍ക്ക് പരുക്കേല്‍ക്കുകയും ചെയ്തിരുന്നു.
ആക്രമണങ്ങളെ ഇന്ത്യന്‍ വിദേശകാര്യ മന്ത്രാലയം ശക്തമായി അപലപിച്ചു. സാധാരണക്കാര്‍ക്കും സിവിലിയന്‍ അടിസ്ഥാനസൗകര്യങ്ങള്‍ക്കും നേരെയുള്ള ആക്രമണങ്ങള്‍ അംഗീകരിക്കാനാവില്ലെന്നും അവ ഉടന്‍ അവസാനിപ്പിക്കണമെന്നും മന്ത്രാലയം വ്യക്തമാക്കി. സൗദി സര്‍ക്കാരിനും ജനങ്ങള്‍ക്കും ഇന്ത്യ ഐക്യദാര്‍ഢ്യം പ്രഖ്യാപിക്കുകയും മേഖലയില്‍ സമാധാനവും സാധാരണനിലയും പുനഃസ്ഥാപിക്കപ്പെടുമെന്ന് പ്രത്യാശ പ്രകടിപ്പിക്കുകയും ചെയ്തു.
സൗദിയിലെ ഇന്ത്യക്കാര്‍ ജാഗ്രത പാലിക്കണമെന്നും പ്രാദേശിക അധികൃതരുടെ നിര്‍ദേശങ്ങള്‍ പിന്തുടരണമെന്നും ഇന്ത്യന്‍ എംബസി നേരത്തേ മുന്നറിയിപ്പ് നല്‍കിയിരുന്നു. ആക്രമണത്തെത്തുടര്‍ന്ന് എയര്‍ ഇന്ത്യ, ഇന്‍ഡിഗോ, ആകാശ എയര്‍ എന്നിവ റിയാദിലേക്കുള്ള വിമാന സര്‍വീസുകള്‍ താല്‍ക്കാലികമായി നിര്‍ത്തിവച്ചിരുന്നു.
റിയാദ് വിമാനത്താവളത്തിലെ ആക്രമണം: ഹൈദരാബാദ് സ്വദേശി മരിച്ചു; 11 ഇന്ത്യക്കാര്‍ക്ക് പരുക്ക്
