അബുദാബി: യുഎഇയിലെ പ്രമുഖ ആരോഗ്യസംരക്ഷണ ശൃംഖലയായ എൻഎംസി ഹെൽത്ത്‌കെയറിലെ 5.4 ബില്യൺ ഡോളറിന്റെ (ഏകദേശം 45,000 കോടിയിലധികം രൂപ) സാമ്പത്തിക തട്ടിപ്പിൽ സ്ഥാപകൻ ഡോ. ബി.ആർ. ഷെട്ടിയും മുൻ സിഇഒ പ്രശാന്ത് മങ്ങാട്ടും കുറ്റക്കാരാണെന്ന് അബുദാബി ഗ്ലോബൽ മാർക്കറ്റ് (ADGM) കോടതി വിധിച്ചു. കമ്പനിയുടെ തകർച്ചയ്ക്ക് കാരണമായ ഈ വൻ സാമ്പത്തിക ക്രമക്കേടിൽ ഇരുവരും മനഃപൂർവ്വം പങ്കാളികളായതായി ജസ്റ്റിസ് സർ ആൻഡ്രൂ സ്മിത്ത് ഉൾപ്പെട്ട കോടതി കണ്ടെത്തി. അബുദാബി കൊമേഴ്‌സ്യൽ ബാങ്ക് നൽകിയ പ്രത്യേക കേസിൽ മലയാളി കൂടിയായ മുൻ സിഇഒ പ്രശാന്ത് മങ്ങാട്ട് 1.19 ബില്യൺ ഡോളറിലധികം ബാങ്കിന് നാശനഷ്ടമായി നൽകണമെന്നും കോടതി ഉത്തരവിട്ടിട്ടുണ്ട്.
2012 മുതൽ 2020 വരെയുള്ള കാലയളവിൽ വ്യാജ സപ്ലെയർ ഇടപാടുകൾ കാണിച്ചും, യഥാർത്ഥ കടബാധ്യതകൾ മറച്ചുവെച്ചും കമ്പനിയുടെ പണം സ്വന്തം ആവശ്യങ്ങൾക്കായി വകമാറ്റിയതായി കോടതി കണ്ടെത്തി. കോടിക്കണക്കിന് ഡോളറിന്റെ കടമുണ്ടായിരുന്നിട്ടും ഇത് സാമ്പത്തിക സ്റ്റേറ്റ്‌മെന്റുകളിൽ എൻഎംസി മറച്ചുവെക്കുകയായിരുന്നു. താൻ മറ്റ് ഉദ്യോഗസ്ഥരുടെ തട്ടിപ്പിന് ഇരയായതാണെന്ന ബി.ആർ. ഷെട്ടിയുടെ വാദവും, സാമ്പത്തിക കാര്യങ്ങളിൽ തനിക്ക് പൂർണ്ണ നിയന്ത്രണമില്ലായിരുന്നു എന്ന പ്രശാന്ത് മങ്ങാട്ടിന്റെ വാദവും തെളിവുകൾ നിരത്തി കോടതി പൂർണ്ണമായും തള്ളി.
കമ്പനി ഫണ്ട് വകമാറ്റൽ, വായ്പകൾ മറച്ചുവെക്കൽ, സാമ്പത്തിക രേഖകളിൽ കൃത്രിമം കാണിക്കൽ തുടങ്ങിയ വഞ്ചനാപരമായ പ്രവർത്തനങ്ങളിൽ ഷെട്ടിയും മങ്ങാട്ടും അറിഞ്ഞുകൊണ്ട് പങ്കാളികളായെന്ന് എഡിജിഎം കോടതിയിലെ ജസ്റ്റിസ് സർ ആൻഡ്രൂ സ്മിത്ത് നിരീക്ഷിച്ചു. കമ്പനിയുടെ ആസ്തിയിലേക്ക് ഇരുവരും തിരികെ നൽകേണ്ട തുക കണക്കാക്കുന്നതിനുള്ള അടിസ്ഥാന തുകയായി 5.397 ബില്യൺ ഡോളർ കോടതി നിശ്ചയിച്ചു.
നവംബർ 5-ന് പുറപ്പെടുവിച്ച വിധിപ്രകാരം, ബി.ആർ. ഷെട്ടിയുടെ വ്യക്തിഗത ബാങ്ക് അക്കൗണ്ടുകളിലേക്ക് 500-ലധികം തവണ പണം കൈമാറ്റം ചെയ്യപ്പെട്ടിട്ടുണ്ട്. ആകെ 4.18 ബില്യൺ യുഎഇ ദിർഹം (AED) ആണ് ഇത്തരത്തിൽ കൈമാറ്റം ചെയ്യപ്പെട്ടത്. ഇതിൽ നിന്ന് കമ്പനിയിലേക്ക് തിരികെ നൽകിയ തുകകൾ ഒഴിവാക്കിയാൽ, ഏകദേശം 2.6 ബില്യൺ യുഎഇ ദിർഹമാണ് ഇദ്ദേഹത്തിന്റെ കൈവശം എത്തിയതെന്ന് വ്യക്തമാകുന്നു.
1975-ൽ അബുദാബിയിൽ ബി.ആർ. ഷെട്ടി സ്ഥാപിച്ച എൻ.എം.സി ഹെൽത്ത് എന്ന കമ്പനിയുടെ തകർച്ചയിൽ നിന്നാണ് ഈ കേസ് ഉടലെടുത്തത്. 2012-ൽ ലണ്ടൻ സ്റ്റോക്ക് എക്‌സ്‌ചേഞ്ചിൽ ലിസ്റ്റ് ചെയ്യപ്പെട്ട ഈ കമ്പനി, പിന്നീട് എഫ്.ടി.എസ്.ഇ 100 സൂചികയുടെ ഭാഗമായി മാറുകയും ചെയ്തു. കമ്പനി മാനേജ്‌മെന്റ് വൻതുകകൾ വ്യക്തിപരമായ ആവശ്യങ്ങൾക്കായി വകമാറ്റുകയും, അതേസമയം കോടിക്കണക്കിന് ഡോളർ വായ്പകൾ മറച്ചുവെക്കുകയും ചെയ്തതായി അഡ്മിനിസ്‌ട്രേറ്റർമാർ കണ്ടെത്തി.
ഷെട്ടിയുടെ വ്യക്തിഗത ബാങ്ക് അക്കൗണ്ടുകളിലേക്ക് നടന്ന 4.18 ബില്യൺ യുഎഇ ദിർഹം വരുന്ന 500-ലധികം ഇടപാടുകൾ കോടതി പരിശോധിച്ചു. കമ്പനിയിലേക്ക് തിരികെ നൽകിയ തുകകൾ കണക്കിലെടുത്താൽ, ഏകദേശം 2.6 ബില്യൺ യുഎഇ ദിർഹമാണ് ഇദ്ദേഹത്തിന്റെ കൈവശം എത്തിയത്. സ്വകാര്യ വിമാനങ്ങൾ വാങ്ങുന്നതിനും, ദുബായ് ഹിൽസിലെ വസ്തുവകകൾക്കും, വ്യോമിംഗിലെ എണ്ണപ്പാടങ്ങളിലെ നിക്ഷേപങ്ങൾക്കുമായി ഈ പണം ചെലവഴിച്ചിട്ടുണ്ട്. എൻ.എം.സിയുടെ സാമ്പത്തിക രേഖകളിലും വലിയ കൃത്രിമം നടന്നിട്ടുണ്ട്. 2018 ഡിസംബറായപ്പോഴേക്കും, കമ്പനി 1.99 ബില്യൺ ഡോളറിന്റെ കടബാധ്യതകൾ മാത്രമാണ് വെളിപ്പെടുത്തിയിരുന്നതെങ്കിലും, യഥാർത്ഥത്തിൽ 3.88 ബില്യൺ ഡോളറോളം വരുന്ന വായ്പകൾ മറച്ചുവെച്ചിരുന്നു.
വായ്പകളെ മറച്ചുവെക്കാൻ വ്യാജ വിതരണക്കാരുമായുള്ള ഇടപാടുകൾ കമ്പനി ഉപയോഗപ്പെടുത്തിയതായി കോടതി കണ്ടെത്തി. ഇത്തരം ഇടപാടുകളിൽ, യഥാർത്ഥത്തിൽ കൈമാറ്റം ചെയ്യപ്പെടാത്ത സാധനങ്ങൾക്കോ സേവനങ്ങൾക്കോ വേണ്ടി വിതരണക്കാർ വ്യാജ ഇൻവോയ്‌സുകൾ തയ്യാറാക്കുകയായിരുന്നു പതിവ്. ബാങ്കുകൾ ഇൻവോയ്‌സുകൾക്ക് ധനസഹായം നൽകുകയും, ആ തുക ഗ്രൂപ്പിലേക്ക് തന്നെ തിരികെ എത്തിക്കുകയും ചെയ്തു. ഉന്നത ഉദ്യോഗസ്ഥർ നടത്തിയ തട്ടിപ്പിന് താനും ഇരയാണെന്ന ഷെട്ടിയുടെ വാദം കോടതി തള്ളി. കമ്പനിയുടെ സാമ്പത്തിക കാര്യങ്ങളിൽ തനിക്ക് നിയന്ത്രണമുണ്ടായിരുന്നില്ലെന്ന മങ്ങാട്ടിന്റെ വാദവും കോടതി തള്ളിക്കളഞ്ഞു.
"FTSE 100 കമ്പനിയൊന്നിന്റെ സിഇഒ ആയിരുന്ന ഒരാളിൽ നിന്ന് ഇത്തരമൊരു വാദം പ്രതീക്ഷിക്കാനാവില്ല; ഇത് തെളിവുകളുമായി പൊരുത്തപ്പെടുന്നില്ല, അതിനാൽ ഇത് തള്ളിക്കളയുന്നു," ജസ്റ്റിസ് സ്മിത്ത് നിരീക്ഷിച്ചു. 2012 ഏപ്രിൽ 30 മുതൽ ഇരുവരും അറിഞ്ഞുകൊണ്ട് വഞ്ചനാപരമായ ഇടപാടുകളിൽ ഏർപ്പെട്ടുവെന്നും, ഇത് ADGM ഇൻസോൾവൻസി റെഗുലേഷൻസ്, 2022 പ്രകാരം അവരെ ബാധ്യതയുള്ളവരാക്കുന്നുവെന്നും കോടതി കണ്ടെത്തി. "ഡോ. ഷെട്ടിയും മിസ്റ്റർ മങ്ങാട്ടും വഞ്ചനാപരമായ രീതിയിൽ ബിസിനസ്സ് നടത്തുന്നതിൽ പങ്കാളികളായിരുന്നുവെന്ന് ഞാൻ നിഗമനത്തിലെത്തിയിരിക്കുന്നു."
നൽകേണ്ട തുക, പലിശ, ചെലവുകൾ എന്നിവ സംബന്ധിച്ച അന്തിമ വിധി പുറപ്പെടുവിക്കുന്നതിനായി കോടതി തുടർവാദം കേൾക്കും. NMC-യുടെ വായ്പകൾ മറച്ചുവെച്ചതുമായി ബന്ധപ്പെട്ട ആരോപണങ്ങളിൽ ബാങ്ക് ഓഫ് ബറോഡയെയും തുടക്കത്തിൽ പ്രതിപ്പട്ടികയിൽ ഉൾപ്പെടുത്തിയിരുന്നു. NMC-യുടെ കുടിശ്ശികയുള്ള വായ്പകൾ തിരിച്ചടയ്ക്കാമെന്ന് ഡോ. ഷെട്ടി ബാങ്കിന്റെ അന്നത്തെ മാനേജിംഗ് ഡയറക്ടർ പി.എസ്. ജയകുമാറുമായി ധാരണയുണ്ടാക്കിയെന്നും, ഇതിനു പകരമായി ബാങ്ക് തങ്ങളുടെ അക്കൗണ്ടുകളുടെ യഥാർത്ഥ സ്ഥിതി കമ്പനിയുടെ ഓഡിറ്റർമാരെ അറിയിക്കില്ലെന്ന് സമ്മതിച്ചുവെന്നും അഡ്മിനിസ്‌ട്രേറ്റർമാർ ആരോപിച്ചു.
"ഡോ. ഷെട്ടിയും മിസ്റ്റർ ജയകുമാറും തമ്മിൽ ഒരു ധാരണയുണ്ടായിരുന്നുവെന്ന് അഡ്മിനിസ്‌ട്രേറ്റർമാർ വാദിച്ചു. അതായത്, ബാങ്ക് ഓഫ് ബറോഡയുമായുള്ള അക്കൗണ്ടുകളുടെ യഥാർത്ഥ സ്ഥിതി വെളിപ്പെടുത്താതിരിക്കാൻ ബാങ്ക് സമ്മതിക്കുകയും, അതിനു പകരമായി NMC ഗ്രൂപ്പ് തങ്ങളുടെ ബാധ്യതകളെല്ലാം ബാങ്കിന് തിരിച്ചടയ്ക്കാമെന്ന് ഉറപ്പുനൽകുകയും ചെയ്തു," എന്ന് കോടതി രേഖപ്പെടുത്തി. എന്നിരുന്നാലും, ബാങ്കിനെതിരെ കണ്ടെത്തലുകളൊന്നും നടത്താൻ ജസ്റ്റിസ് സ്മിത്ത് തയ്യാറായില്ല. "ഇക്കാര്യത്തിൽ ഒരു കണ്ടെത്തൽ നടത്തുന്നത് ബാങ്ക് ഓഫ് ബറോഡയോടും മിസ്റ്റർ ജയകുമാറിനോടും ചെയ്യുന്ന അനീതിയാകും," എന്ന് കോടതി നിരീക്ഷിച്ചു. വിചാരണയുടെ അവസാന ഘട്ടത്തിൽ ബാങ്ക് ഓഫ് ബറോഡ അഡ്മിനിസ്‌ട്രേറ്റർമാരുമായി ഒരു ഒത്തുതീർപ്പിലെത്തി. ഇതോടെ ബാങ്കിനെതിരായ ആരോപണങ്ങൾ പിൻവലിക്കപ്പെട്ടു
5.4 ബില്യൺ ഡോളറിന്റെ ആരോഗ്യമേഖലാ തട്ടിപ്പിൽ എൻഎംസി സ്ഥാപകൻ ബി.ആർ. ഷെട്ടി കുറ്റക്കാരനെന്ന് അബുദാബി കോടതി
