അമ്മാന്‍: ജോര്‍ദാനില്‍ ക്രൈസ്തവ ദേവാലയത്തിലുണ്ടായ ഭീകരാക്രമണത്തിന് തിരിച്ചടിയായി അയല്‍രാജ്യമായ സിറിയയിലെ ഭീകരസംഘടനകളുടെ കേന്ദ്രങ്ങളില്‍ വ്യോമാക്രമണം നടത്തി ജോര്‍ദാന്‍ സൈന്യം. തിങ്കളാഴ്ച നടത്തിയ ആക്രമണത്തില്‍ നിരവധി ഭീകരര്‍ കൊല്ലപ്പെടുകയും പരിക്കേല്‍ക്കുകയും ചെയ്തതായി ജോര്‍ദാന്‍ സൈന്യം അറിയിച്ചു. എന്നാല്‍, തെക്കന്‍ സിറിയയിലെ ദറാ പ്രവിശ്യയില്‍ നടത്തിയ ആക്രമണങ്ങളില്‍ സ്ത്രീകളും കുട്ടികളും ഉള്‍പ്പെടെ അഞ്ചു സാധാരണക്കാര്‍ കൊല്ലപ്പെട്ടതായി സിറിയന്‍ ഔദ്യോഗിക വാര്‍ത്താ ഏജന്‍സിയായ സന പ്രാദേശിക ആരോഗ്യ ഉദ്യോഗസ്ഥനെ ഉദ്ധരിച്ച് റിപ്പോര്‍ട്ട് ചെയ്തു.
കഴിഞ്ഞ വെള്ളിയാഴ്ച ജോര്‍ദാനിലെ തെക്കന്‍ കാരക് ഗവര്‍ണറേറ്റിലുള്ള ഹമ്മൂദ് ഗ്രാമത്തിലെ സെന്റ് ജോര്‍ജ് ഗ്രീക്ക് ഓര്‍ത്തഡോക്‌സ് പള്ളിയില്‍ നടന്ന ശവസംസ്‌കാരച്ചടങ്ങിനിടെ തോക്കുധാരികള്‍ നടത്തിയ ആക്രമണത്തില്‍ ഒമ്പത് പേര്‍ കൊല്ലപ്പെട്ടിരുന്നു. ഇതിനു പിന്നാലെയാണ് ജോര്‍ദാന്‍ സൈന്യത്തിന്റെ നടപടി. ആക്രമണവുമായി ബന്ധപ്പെട്ട് മൂന്നുപേരെ അറസ്റ്റ് ചെയ്തതിന് മണിക്കൂറുകള്‍ക്കുശേഷമാണ് വ്യോമാക്രമണം നടന്നത്.
ഭീകരാക്രമണത്തിന് ഉത്തരവാദികളായവരുമായി ബന്ധമുള്ള സംഘങ്ങളുടെ കേന്ദ്രങ്ങളും താവളങ്ങളും വ്യോമസേന തകര്‍ത്തതായി ജോര്‍ദാന്‍ സൈന്യം വ്യക്തമാക്കി. അതേസമയം, ആക്രമണത്തില്‍ സാധാരണക്കാര്‍ കൊല്ലപ്പെട്ടെന്ന സിറിയന്‍ റിപ്പോര്‍ട്ടിനോട് ജോര്‍ദാന്‍ ഔേദ്യാഗികമായി പ്രതികരിച്ചിട്ടില്ല.
മൂന്നു പ്രതികള്‍ അറസ്റ്റില്‍
ആക്രമണവുമായി ബന്ധപ്പെട്ട് ഹസ്സ സൈദാന്‍ മുഹമ്മദ്, മിഷാല്‍ സൈദാന്‍ മുഹമ്മദ്, അഹമ്മദ് സാമി ഹുസൈന്‍ എന്നിവരാണ് അറസ്റ്റിലായതെന്ന് ജോര്‍ദാന്‍ പൊതുസുരക്ഷാ വിഭാഗം മേധാവി മേജര്‍ ജനറല്‍ അബ്ദുള്ള അല്‍ മായ്ത അറിയിച്ചു. ഇവരില്‍ രണ്ടുപേര്‍ സഹോദരന്മാരും മൂന്നാമന്‍ വിവാഹബന്ധത്തിലൂടെ ബന്ധുവുമാണ്.
ഒഴിഞ്ഞുകിടന്ന വീട്ടില്‍ ഒളിച്ചിരുന്ന പ്രതികളെ വളഞ്ഞ സുരക്ഷാസേനയ്ക്കുനേരെ ഇവര്‍ വെടിയുതിര്‍ത്തതായും തുടര്‍ന്ന് നടന്ന ഏറ്റുമുട്ടലിലാണ് മൂന്നുപേരും പരിക്കേറ്റതെന്നും അധികൃതര്‍ പറഞ്ഞു. പരിക്കേറ്റ പ്രതികളെ ആശുപത്രിയില്‍ പ്രവേശിപ്പിച്ചു. ഒരാളുടെ നില ഗുരുതരമാണെന്ന് രാജ്യത്തെ ഔദ്യോഗിക ചാനലായ അല്‍ മംലക റിപ്പോര്‍ട്ട് ചെയ്തു. നടപടിക്കിടെ സുരക്ഷാസേനാംഗങ്ങള്‍ കൊല്ലപ്പെടുകയോ പരിക്കേല്‍ക്കുകയോ ചെയ്തിട്ടില്ല.
പ്രതികളില്‍നിന്ന് നിരവധി ആയുധങ്ങളും വന്‍തോതില്‍ വെടിക്കോപ്പുകളും പിടിച്ചെടുത്തതായി പൊതുസുരക്ഷാ വിഭാഗം അറിയിച്ചു. ജോര്‍ദാന്‍ നിയമപ്രകാരം കൊലപാതകത്തിന് തൂക്കിലേറ്റി വധശിക്ഷ നടപ്പാക്കാം.
ഭീകരതയ്‌ക്കെതിരെ കടുത്ത നടപടിയെന്ന് രാജാവ്
രാജ്യത്തിന്റെ സുരക്ഷയും സ്ഥിരതയും സംരക്ഷിക്കാന്‍ വിട്ടുവീഴ്ചയില്ലാത്ത നടപടികള്‍ തുടരുമെന്ന് ജോര്‍ദാന്‍ അധികൃതര്‍ വ്യക്തമാക്കി. സുരക്ഷാസേന പ്രതികളെ അവസാനംവരെ പിന്തുടര്‍ന്നുവെന്ന് രാജാവ് അബ്ദുള്ള രണ്ടാമന്‍ സാമൂഹികമാധ്യമമായ എക്‌സില്‍ കുറിച്ചു. രാജ്യത്തെ ജനങ്ങളെ ഭിന്നിപ്പിക്കുന്ന തീവ്രവാദ ആശയങ്ങള്‍ പ്രചരിപ്പിക്കുന്നവരെ അനുവദിക്കില്ലെന്നും അദ്ദേഹം വ്യക്തമാക്കി.
ആക്രമണത്തില്‍ പരിക്കേറ്റ് ആശുപത്രിയില്‍ കഴിയുന്നവരെ രാജാവ് നേരത്തെ സന്ദര്‍ശിച്ചിരുന്നു. രാജ്യത്തിന്റെ സുരക്ഷയെ തകര്‍ക്കാന്‍ ശ്രമിക്കുന്നവര്‍ക്കെതിരെ ശക്തമായ നടപടി സ്വീകരിക്കുമെന്ന് ആഭ്യന്തരമന്ത്രി മസെന്‍ അല്‍ ഫറായയും അറിയിച്ചു.
ആക്രമണം നടത്തിയവര്‍ എല്ലാവരും ജോര്‍ദാന്‍ പൗരന്മാരാണെന്നും വിദേശ ശക്തികളുമായുള്ള ബന്ധത്തിനോ സഹകരണത്തിനോ തെളിവുകളൊന്നും ലഭിച്ചിട്ടില്ലെന്നും ആഭ്യന്തരമന്ത്രി വ്യക്തമാക്കി. രാജ്യത്തിന്റെ സുരക്ഷയ്ക്ക് ഭീഷണിയാകുന്നവര്‍ക്കെതിരെ കര്‍ശന നടപടിയുണ്ടാകുമെന്ന് സര്‍ക്കാര്‍ വക്താവ് മുഹമ്മദ് അല്‍ മൊമാനിയും മുന്നറിയിപ്പ് നല്‍കി.
ജോര്‍ദാനില്‍ അപൂര്‍വമായ ദേവാലയാക്രമണം
ജോര്‍ദാനില്‍ ആരാധനാലയങ്ങള്‍ക്കുനേരെയുള്ള ആക്രമണങ്ങള്‍ അപൂര്‍വമാണ്. മുസ്ലിം ഭൂരിപക്ഷ രാജ്യമായ ജോര്‍ദാനിലെ ജനസംഖ്യയില്‍ രണ്ടു മുതല്‍ മൂന്നു ശതമാനം വരെയാണ് ക്രൈസ്തവര്‍. കാരക് മേഖലയില്‍ ഗണ്യമായ ക്രൈസ്തവ സമൂഹമുണ്ട്.
2016ല്‍ കാരക്കില്‍ സുരക്ഷാകേന്ദ്രത്തിനും പൊലീസ് പട്രോളിങ് സംഘങ്ങള്‍ക്കുമെതിരെ നടന്ന ആക്രമണത്തില്‍ പത്തുപേര്‍ കൊല്ലപ്പെട്ടിരുന്നു. പുതിയ ദേവാലയാക്രമണത്തെത്തുടര്‍ന്ന് പ്രധാനമന്ത്രി ജാഫര്‍ ഹസ്സന്‍ മൂന്നു ദിവസത്തെ ദേശീയ ദുഃഖാചരണം പ്രഖ്യാപിച്ചു. സര്‍ക്കാര്‍ സ്ഥാപനങ്ങളിലും പൊതുസ്ഥാപനങ്ങളിലും ദേശീയ പതാക പകുതി താഴ്ത്തിക്കെട്ടാനും നിര്‍ദേശിച്ചു.
ആക്രമണത്തില്‍ കൊല്ലപ്പെട്ട ഒമ്പതുപേരില്‍ എട്ടുപേരുടെ സംസ്‌കാരം ഞായറാഴ്ച പള്ളിക്കു സമീപം നടന്നു. ഒമ്പതാമത്തെ ഇരയായ മുഹമ്മദ് അല്‍ ഖസൂസിന്റെ സംസ്‌കാരം തിങ്കളാഴ്ച തെക്കന്‍ അമ്മാനില്‍ നടത്തി.
ജോര്‍ദാനുമായുള്ള പ്രധാന അതിര്‍ത്തി അടച്ച് സിറിയ
ജോര്‍ദാന്റെ വ്യോമാക്രമണത്തിന് പിന്നാലെ ഇരുരാജ്യങ്ങളെയും ബന്ധിപ്പിക്കുന്ന പ്രധാന തെക്കന്‍ അതിര്‍ത്തി കടവ് അടയ്ക്കുമെന്ന് സിറിയ പ്രഖ്യാപിച്ചു. നസീബ് എന്നറിയപ്പെടുന്ന സിറിയന്‍ അതിര്‍ത്തി കടവ്, ജോര്‍ദാന്‍ ഭാഗത്ത് ജാബര്‍ എന്ന പേരിലാണ് അറിയപ്പെടുന്നത്.
നിലവിലെ സാഹചര്യങ്ങള്‍ കണക്കിലെടുത്ത് ചൊവ്വാഴ്ച മുതല്‍ അതിര്‍ത്തി കടവിലൂടെയുള്ള യാത്രക്കാരുടെയും ചരക്കുകളുടെയും ഗതാഗതം ഇരുദിശകളിലേക്കും നിര്‍ത്തിവെക്കുമെന്ന് സിറിയന്‍ അതിര്‍ത്തികസ്റ്റംസ് അധികൃതര്‍ അറിയിച്ചു.
ദേവാലയാക്രമണത്തിന് പിന്നാലെ ജോര്‍ദാന്‍ നടത്തിയ സൈനിക നടപടി മേഖലയില്‍ കൂടുതല്‍ സംഘര്‍ഷത്തിന് വഴിവെക്കുമോ എന്ന ആശങ്ക ശക്തമാണ്. ഭീകരവിരുദ്ധ നടപടികള്‍ക്കൊപ്പം സാധാരണക്കാരുടെ സുരക്ഷയും അതിര്‍ത്തി മേഖലയിലെ സമാധാനവും ഉറപ്പാക്കേണ്ടത് നിര്‍ണായകമായിരിക്കുകയാണ്.
പള്ളിയിലെ ഭീകരാക്രമണത്തിന് തിരിച്ചടി; സിറിയയില്‍ ജോര്‍ദാന്റെ വ്യോമാക്രമണം, അഞ്ചു പേര്‍ കൊല്ലപ്പെട്ടതായി റിപ്പോര്‍ട്ട്
