വാഷിംഗ്ടൺ: ഇറാനെതിരായ യുദ്ധം എപ്പോൾ അവസാനിപ്പിക്കണമെന്നത് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവുമായുള്ള പരസ്പര ആലോചനയുടെ അടിസ്ഥാനത്തിലായിരിക്കുമെന്ന് അമേരിക്കൻ പ്രസിഡന്റ് ഡോണൾഡ് ട്രംപ് പറഞ്ഞു.
യുദ്ധവുമായി ബന്ധപ്പെട്ട തീരുമാനങ്ങൾ ഇരുവരും ചേർന്നാണ് ചർച്ച ചെയ്യുന്നതെന്ന് ട്രംപ് പറഞ്ഞു. എന്നാൽ അന്തിമ തീരുമാനം താനായിരിക്കും എടുക്കുകയെന്നും അദ്ദേഹം കൂട്ടിച്ചേർത്തു.
ഇറാൻ ഇസ്രയേലിനെ നശിപ്പിക്കാൻ ശ്രമിച്ച രാജ്യമാണ് എന്നും ട്രംപ് ആരോപിച്ചു. താനും നെതന്യാഹുവും ഒരുമിച്ച് പ്രവർത്തിച്ചില്ലെങ്കിൽ ഇസ്രയേൽ വലിയ അപകടത്തിലായേനെയെന്നും അദ്ദേഹം പറഞ്ഞു.
ഇറാൻ യുദ്ധം എത്രകാലം തുടരുമെന്ന കാര്യത്തിൽ കൃത്യമായ സമയം വ്യക്തമാക്കിയിട്ടില്ല. എന്നാൽ അമേരിക്കൻ ഭരണകൂടത്തിന്റെ വിലയിരുത്തൽ പ്രകാരം യുദ്ധം ഏതാനും ആഴ്ചകൾ കൂടി നീളാനിടയുണ്ടെന്നാണ് സൂചന.
ഇതിനിടെ അമേരിക്ക-ഇസ്രയേൽ സംയുക്താക്രമണത്തിൽ കൊല്ലപ്പെട്ട മുൻ ഇറാൻ പരമോന്നത നേതാവ് അലി ഖമേനിയുടെ മകനായ മൊജ്തബ ഖമേനിയെ പുതിയ നേതാവായി ഇറാൻ പ്രഖ്യാപിച്ചതിനെയും ട്രംപ് പരാമർശിച്ചു. പുതിയ നേതാവിനെക്കുറിച്ച് 'എന്ത് സംഭവിക്കുമെന്ന് കാണാം' എന്നായിരുന്നു അദ്ദേഹത്തിന്റെ പ്രതികരണം.
അതേസമയം അഴിമതി ആരോപണങ്ങളിൽ വിചാരണ നേരിടുന്ന നെതന്യാഹുവിന് മാപ്പ് നൽകണമെന്ന് ഇസ്രയേൽ പ്രസിഡന്റായ ഐസക് ഹെർസോഗിനോട് ട്രംപ് വീണ്ടും ആവശ്യപ്പെട്ടു. യുദ്ധകാലത്ത് നെതന്യാഹു മുഴുവൻ ശ്രദ്ധയും രാജ്യസുരക്ഷയിലേക്ക് തിരിക്കേണ്ടതിനാൽ മാപ്പ് ഉടൻ നൽകണമെന്നായിരുന്നു ട്രംപിന്റെ അഭിപ്രായം.
ഇറാൻ യുദ്ധം തുടരുന്ന സാഹചര്യത്തിൽ പശ്ചിമേഷ്യയിലെ സാഹചര്യം കൂടുതൽ സംഘർഷഭരിതമാകുകയാണ്.
ഇറാൻ യുദ്ധം അവസാനിപ്പിക്കൽ: തീരുമാനം നെതന്യാഹുവുമായി ചേർന്ന് എടുക്കുമെന്ന് ട്രംപ്
