ടെഹ്‌റാന്‍: ടെഹ്‌റാനിലെ ഇറാന്‍ റേഡിയോ, ടെലിവിഷന്‍ കേന്ദ്രത്തിനു നേരെ ഇസ്രായേല്‍ ആക്രമണം. ഇറാന്‍ സ്‌റ്റേറ്റ് ടിവിയുടെ പ്രവര്‍ത്തനം തടസ്സപ്പെട്ടു.
ഇറാന്റെ ദേശീയ ടെലിവിഷനായ ഇസ്ലാമിക് റിപ്പബ്ലിക് ഓഫ് ഇറാന്‍ ബ്രോഡ്കാസ്റ്റിങ് (ഐആര്‍ഐബി) ആസ്ഥാനത്താണ് ഇസ്രയേല്‍ ബോംബിട്ടത്. തത്സമയ സംപ്രേഷണം നടക്കുന്നതിനിടെയാണ് ആക്രമണം.
ആക്രമണത്തെ തുടര്‍ന്ന് കെട്ടിടം ഇടിഞ്ഞുവീഴുന്നതും അവതാരക കസേരയില്‍നിന്ന് എഴുന്നേല്‍ക്കുന്നതും ദൃശ്യത്തില്‍ കാണാം. ആക്രമണം നടന്നതായി ഇറാന്‍ സ്ഥിരീകരിക്കുകയും ചെയ്തു.
ഇറാന്‍ തലസ്ഥാനമായ ടെഹ്‌റാനിലെ ഐആര്‍ഐബിയുടെ ആസ്ഥാനത്താണ് ആക്രമണം നടന്നത്. ബോംബിടുകയായിരുന്നുവെന്നാണ് ഇസ്രയേല്‍ വ്യോമസേന അറിയിക്കുന്നത്. അതേസമയം ഇറാന്‍ ജനതയുടെ ശബ്ദം ഇല്ലാതാക്കാനുള്ള ശത്രുവിന്റെ കുടില നീക്കമാണിതെന്ന് ഇറാന്‍ ടിവി വ്യക്തമാക്കി.
നേരത്തെ ടെഹ്‌റാനിലെ മൂന്നു കേന്ദ്രങ്ങളില്‍ നിന്ന് ഒഴിഞ്ഞുപോകാന്‍ ഇസ്രായേല്‍ മുന്നറിയിപ്പ് നല്‍കിയിരുന്നു. ഇതിനിടെ ഇസ്രായേലിലേക്കുള്ള യാത്ര അമേരിക്ക വിലക്കി. യുഎസ് സ്‌റ്റേറ്റ് വകുപ്പിന്റേതാണ് ഉത്തരവ്.
ടെഹ്‌റാനിലെ ഇറാന്‍ റേഡിയോ, ടെലിവിഷന്‍ കേന്ദ്രത്തിനു നേരെ ഇസ്രായേല്‍ ആക്രമണം; സംപ്രേഷണം നിര്‍ത്തി
