തെഹ്റാന്/ ജറുസലേം: അമേരിക്കയുമായുള്ള കരട് ധാരണാപത്രത്തിന്റെ ഭാഗമായി തന്ത്രപ്രധാനമായ ഹോര്മുസ് കടലിടുക്കിന്റെ നിയന്ത്രണം വിട്ടുനല്കില്ലെന്ന് ഇറാനിയന് സര്ക്കാര് മാധ്യമങ്ങള് റിപ്പോര്ട്ട് ചെയ്തു. അതേസമയം, ഇറാനെ ആണവായുധം സ്വന്തമാക്കാന് അനുവദിക്കില്ലെന്ന കാര്യത്തില് അമേരിക്കന് പ്രസിഡന്റ് ഡൊണാള്ഡ് ട്രംപുമായി പൂര്ണ യോജിപ്പിലാണെന്ന് ഇസ്രായേല് പ്രധാനമന്ത്രി ബെഞ്ചമിന് നെതന്യാഹു വ്യക്തമാക്കി.
ഇറാനുമായുള്ള യുദ്ധം അവസാനിപ്പിക്കാന് ലക്ഷ്യമിട്ടുള്ള 'വലിയ ധാരണ' ഉടന് നിലവില് വരുമെന്ന് ട്രംപ് പ്രഖ്യാപിച്ചതിന് പിന്നാലെയാണ് ഇരു രാജ്യങ്ങളില് നിന്നുമുള്ള പ്രതികരണങ്ങള് പുറത്തുവന്നത്.
ഇറാന്റെ സര്ക്കാര് അനുകൂല മാധ്യമങ്ങള് വെള്ളിയാഴ്ച റിപ്പോര്ട്ട് ചെയ്തതനുസരിച്ച്, അമേരിക്കയുമായി ചര്ച്ച ചെയ്യപ്പെടുന്ന കരട് ധാരണാപത്രത്തിന്റെ അടിസ്ഥാനത്തില് 60 ദിവസത്തെ ചര്ച്ചാ കാലയളവ് നിശ്ചയിക്കുകയും ആണവ വിഷയത്തില് കൂടുതല് ചര്ച്ചകള് നടത്തുകയും ചെയ്യും.
എന്നാല്, ലോക എണ്ണവ്യാപാരത്തിന്റെ നിര്ണായക കേന്ദ്രമായ ഹോര്മുസ് കടലിടുക്കിന്റെ നിയന്ത്രണം തെഹ്റാന് വിട്ടുനല്കില്ലെന്നാണ് റിപ്പോര്ട്ടില് വ്യക്തമാക്കുന്നത്.
ഇറാന്റെ മെഹര് വാര്ത്താ ഏജന്സി പ്രസിദ്ധീകരിച്ച റിപ്പോര്ട്ട് പ്രകാരം അമേരിക്കയുമായുള്ള ധാരണാപത്രം ലെബനന് ഉള്പ്പെടെ വിവിധ മേഖലകളിലെ സംഘര്ഷങ്ങള്ക്ക് വിരാമമിടുന്നതിനുള്ള ചട്ടക്കൂട് ഒരുക്കുന്നതാണ്.
ലെബനന് ഉള്പ്പെടെ എല്ലാ മേഖലകളിലും ഉടനടിയും സ്ഥിരവുമായ ശത്രുത അവസാനിപ്പിക്കുന്നതിനുള്ള വ്യവസ്ഥകള് ധാരണാപത്രത്തില് ഉള്പ്പെടുമെന്ന് മെഹര് റിപ്പോര്ട്ട് ചെയ്തു.
വ്യാഴാഴ്ച അമേരിക്കന് പ്രസിഡന്റ് ഡൊണാള്ഡ് ട്രംപ്, ഇറാനെതിരായ കൂടുതല് സൈനിക ആക്രമണ ഭീഷണി പിന്വലിച്ചതായി പ്രഖ്യാപിച്ചിരുന്നു. ടെഹ്റാനുമായുള്ള ധാരണ ഏതാനും ദിവസങ്ങള്ക്കുള്ളില് ഒപ്പുവെക്കാന് സാധിക്കുമെന്നും അദ്ദേഹം പറഞ്ഞിരുന്നു.
ട്രംപിന്റെ പ്രഖ്യാപനത്തെ തുടര്ന്ന് ഓഹരി വിപണിയില് നേട്ടമുണ്ടാകുകയും എണ്ണ വിലയില് ഇടിവുണ്ടാകുകയും ചെയ്തു. എന്നാല് കരാറിനെക്കുറിച്ചുള്ള ഇറാന്റെ നിലപാട് വ്യക്തമായിരുന്നില്ല.
ഇറാനിയന് വിദേശകാര്യ മന്ത്രാലയ വക്താവ് ഇസ്മായില് ബഖായി ധാരണാപത്രവുമായി ബന്ധപ്പെട്ട് അന്തിമ തീരുമാനത്തിലെത്തിയിട്ടില്ല എന്ന് വ്യക്തമാക്കി.
ഇതിനിടെ, ഇസ്രായേല് പ്രധാനമന്ത്രി ബെഞ്ചമിന് നെതന്യാഹു വെള്ളിയാഴ്ച പുറത്തിറക്കിയ പ്രസ്താവനയില് ഇറാന് ആണവായുധം വികസിപ്പിക്കുന്നത് തടയുന്ന കാര്യത്തില് ട്രംപുമായി പൂര്ണ ധാരണയിലാണെന്ന് അറിയിച്ചു.
താന് ഇസ്രായേലിന്റെ പ്രധാനമന്ത്രിയായിരിക്കുന്നിടത്തോളം കാലം ഇറാന് ആണവായുധം ഉണ്ടാകില്ലെന്നും ഈ വിഷയത്തില് പ്രസിഡന്റ് ട്രംപും താനും പൂര്ണ യോജിപ്പിലാണെന്നും നെതന്യാഹു പ്രസ്താവനയില് പറഞ്ഞു.
യുദ്ധവിരാമവും ആണവ ചര്ച്ചകളും ഉള്പ്പെടുന്ന കരട് ധാരണാപത്രത്തെക്കുറിച്ച് ട്രംപ് വലിയ പ്രതീക്ഷ പ്രകടിപ്പിക്കുന്നുണ്ടെങ്കിലും അന്തിമ അംഗീകാരം ലഭിച്ചിട്ടില്ലെന്നാണ് ഇറാന്റെ ഔദ്യോഗിക നിലപാട്.
അതേസമയം, ഹോര്മുസ് കടലിടുക്കിന്റെ നിയന്ത്രണം പോലുള്ള സുപ്രധാന വിഷയങ്ങളില് തെഹ്റാന് വിട്ടുവീഴ്ചയ്ക്ക് തയ്യാറല്ലെന്ന സൂചനയാണ് ഇറാനിയന് മാധ്യമ റിപ്പോര്ട്ടുകള് നല്കുന്നത്.
അമേരിക്ക, ഇറാന്, ഇസ്രായേല് എന്നീ രാജ്യങ്ങള് തമ്മിലുള്ള ഈ പുതിയ നയതന്ത്ര നീക്കങ്ങള് പശ്ചിമേഷ്യയുടെ ഭാവി സുരക്ഷാ സാഹചര്യത്തെയും ആഗോള എണ്ണവിപണിയെയും നിര്ണായകമായി സ്വാധീനിക്കുമെന്നാണ് നിരീക്ഷകരുടെ വിലയിരുത്തല്.