ഇസ്ലാമാബാദ്: പാക്കിസ്ഥാനിലെ ആദിയാല ജയിലില്‍ കഴിയുന്ന മുന്‍ പ്രധാനമന്ത്രി ഇമ്രാന്‍ ഖാനെ 'മനുഷ്യത്വവിരുദ്ധമായി ഏകാന്ത തടവില്‍' അടച്ചിട്ടിരിക്കുകയാണെന്ന് ആരോപിച്ച് മകന്‍ കാസിം ഖാന്‍ രംഗത്തെത്തി. പിതാവ് ജീവനോടെയുണ്ടെന്ന കാര്യത്തില്‍ വ്യക്തമായ ഉറപ്പ് നല്‍കണമെന്നും കോടതി നിര്‍ദ്ദേശപ്രകാരമുള്ള സന്ദര്‍ശനാവകാശം അനുവദിക്കണമെന്നും അദ്ദേഹം പാക്കിസ്ഥാന്‍ സര്‍ക്കാരിനോട് ആവശ്യപ്പെട്ടു.
ഇമ്രാന്‍ ഖാന്‍ ജയിലില്‍ മരിച്ചു എന്ന നിലയിലുള്ള അഭ്യൂഹങ്ങള്‍ സാമൂഹ്യമാധ്യമങ്ങളില്‍ ശക്തമായ സാഹചര്യത്തിലാണ് കാസിം ഖാന്റെ മുന്നറിയിപ്പ്. 845 ദിവസമായി ജയിലില്‍ കഴിയുന്ന പിതാവിനെ കഴിഞ്ഞ ഒന്നര മാസമായി 'മരണ സെല്ലില്‍' പൂര്‍ണ ഒറ്റപ്പെടലിലാണ് പാര്‍പ്പിച്ചിരിക്കുന്നതെന്ന് എക്‌സ് (ട്വിറ്റര്‍) കുറിപ്പില്‍ അദ്ദേഹം പറഞ്ഞു. കുടുംബാംഗങ്ങള്‍ക്ക് സന്ദര്‍ശനമോ ഫോണ്‍ ബന്ധമോ അനുവദിക്കുന്നില്ലെന്നും സഹോദരനോ തനിക്കോ പിതാവുമായി ഒരു തരത്തിലുള്ള ബന്ധവും ലഭിച്ചിട്ടില്ലെന്നും കാസിം ആരോപിച്ചു. ഇത് യാതൊരു സുരക്ഷാനടപടിയുടെയും ഭാഗമല്ലെന്നും പിതാവിന്റെ അവസ്ഥ മറച്ചുവയ്ക്കാനുള്ള ബോധപൂര്‍വ ശ്രമമാണെന്നും അദ്ദേഹം കുറ്റപ്പെടുത്തി.
ഇമ്രാന്‍ ഖാന്റെ സുരക്ഷയ്ക്ക് പാക്കിസ്ഥാന്‍ സര്‍ക്കാരിനും 'അവരുടെ മേലുടമകള്‍ക്കും' പൂര്‍ണ നിയമ, നൈതിക, അന്താരാഷ്ട്ര ഉത്തരവാദിത്തമുണ്ടാകുമെന്ന് മുന്നറിയിപ്പും കാസിം ഖാന്‍ നല്‍കി. അന്താരാഷ്ട്ര സമൂഹവും മനുഷ്യാവകാശ സംഘടനകളും ഇടപെടണമെന്ന് ആവശ്യപ്പെട്ട അദ്ദേഹം, ഇമ്രാന്‍ ഖാന്‍ ജീവനോടെയുണ്ടെന്ന സ്ഥിരീകരണം, കോടതി ഉത്തരവുപ്രകാരമുള്ള സന്ദര്‍ശനം, ഏകാന്ത തടവ് അവസാനിപ്പിക്കല്‍, രാഷ്ട്രീയ പ്രതികാരത്തിന്റെ ഭാഗമായി തടവിലാക്കപ്പെട്ട 'ജനപ്രിയനായ നേതാവിന്റെ' മോചനം എന്നീ ആവശ്യങ്ങളും ഉന്നയിച്ചു.
ഇമ്രാന്‍ ഖാന്റെ സഹോദരി അലീമ ഖാനും അടക്കമുള്ള കുടുംബാംഗങ്ങള്‍ മാസങ്ങളായി സന്ദര്‍ശനം നിഷേധിക്കപ്പെടുന്നുവെന്ന് ആരോപിച്ചിരിക്കുകയാണ്. അതേസമയം, മരണവാര്‍ത്തകള്‍ നിഷേധിച്ച ആദിയാല ജയില്‍ അധികൃതര്‍ ഇമ്രാന്‍ ഖാന്‍ പൂര്‍ണ ആരോഗ്യവാനാണെന്ന് വ്യക്തമാക്കി. അദ്ദേഹത്തെ മറ്റൊരു ജയിലിലേക്ക് മാറ്റിയെന്ന പ്രചാരണവും അടിസ്ഥാനരഹിതമാണെന്ന് അധികൃതര്‍ പറഞ്ഞു.
2023 ഓഗസ്റ്റുമുതല്‍ കസ്റ്റഡിയിലുള്ള ഇമ്രാന്‍ ഖാനെതിരെ നിരവധി കേസുകളുണ്ട്; ഇവയെല്ലാം രാഷ്ട്രീയ പ്രേരിതമാണെന്നാണ് അദ്ദേഹത്തിന്റെ വാദം. ജനുവരിയില്‍ അഴിമതി കേസില്‍ ഇമ്രാനും ഭാര്യയും ശിക്ഷിക്കപ്പെട്ടിരുന്നു. മാര്‍ച്ചില്‍ പി.ടി.ഐ നേതാക്കള്‍ ഇമ്രാന്‍ ഖാനെ മരണ സെല്ലില്‍ ഏകാന്തതടവിലാണ് പാര്‍പ്പിച്ചിരിക്കുന്നതെന്ന ആരോപണം ഉന്നയിച്ചതിന് പിന്നാലെയാണ് ഇപ്പോഴത്തെ വിവാദം.
ഇമ്രാന്‍ ഖാനെ 'മരണ സെല്ലില്‍' ഏകാന്ത തടവിലാക്കി; പിതാവ് ജീവിച്ചിരിക്കുന്നതിനുള്ള തെളിവ് വേണമെന്ന് മകന്‍
