ഇസ്രയേലുമായി ചർച്ച നടത്തില്ലെന്ന് വ്യക്തമാക്കി ഹിസ്ബുല്ല. ചർച്ചയ്ക്ക് തയ്യാറാകുന്നത് കീഴടങ്ങലിന് തുല്യമാണെന്ന് സംഘടനയുടെ നേതാവ് നയീം ഖാസിം പറഞ്ഞു.
ലെബനൻ പ്രസിഡന്റ് മുന്നോട്ടുവച്ച സമാധാന ചർച്ചാ നിർദേശത്തെ തുടർന്നാണ് ഹിസ്ബുല്ലയുടെ പ്രതികരണം. ഇസ്രയേൽ അധിനിവേശവും തുടർച്ചയായ ആക്രമണവും തുടരുന്ന സാഹചര്യത്തിൽ ചർച്ച സാധ്യമല്ലെന്നും ഖാസിം വ്യക്തമാക്കി.
ഇറാൻ-അമേരിക്ക-ഇസ്രയേൽ സംഘർഷത്തിന്റെ പശ്ചാത്തലത്തിലാണ് ഹിസ്ബുല്ല യുദ്ധത്തിലേക്ക് കടന്നത്. ഇറാനോട് ഐക്യദാർഢ്യം പ്രഖ്യാപിച്ച് മാർച്ച് 2ന് ഇസ്രയേലിലേക്ക് ആക്രമണം ആരംഭിച്ചതോടെയാണ് ലെബനനിൽ ഇസ്രയേൽ കര-ആകാശ ആക്രമണം ശക്തമാക്കിയത്.
അതേസമയം, യുദ്ധം അവസാനിപ്പിക്കുന്നതിന് ഇസ്രയേൽ ഹിസ്ബുല്ലയ്ക്കെതിരായ ആക്രമണം നിർത്തണമെന്ന് ഇറാൻ ആവശ്യപ്പെട്ടിട്ടുണ്ട്. ഏതെങ്കിലും വെടിനിർത്തൽ കരാറിൽ ലെബനനെയും ഉൾപ്പെടുത്തണമെന്നാണ് ഇറാന്റെ നിലപാട്.
ഇതിനിടെ, പ്രദേശത്തെ സായുധസംഘടനകൾക്ക് പിന്തുണ നിർത്തണമെന്ന് അമേരിക്ക ഇറാനോട് ആവശ്യപ്പെട്ടു. ഹിസ്ബുല്ലയെ ആയുധരഹിതമാക്കുന്നതും സമാധാനത്തിനാവശ്യകമാണെന്നാണ് ഡോണൾഡ് ട്രംപ് ഭരണകൂടത്തിന്റെ വിലയിരുത്തൽ.
ഹിസ്ബുല്ലയെ വിമർശിച്ച ലെബനൻ സർക്കാർ, അവർ രാജ്യത്തെ യുദ്ധത്തിലേക്ക് വലിച്ചിഴച്ചുവെന്ന് ആരോപിച്ചു. അതേസമയം, ഇറാൻ അംബാസഡറെ പുറത്താക്കാനുള്ള നീക്കവും വിവാദമായി.
ട്രംപ് മുന്നോട്ടുവച്ച 15 പോയിന്റ് സമാധാന പദ്ധതിയെ പരിഗണിച്ചുകൊണ്ടിരിക്കുകയാണെങ്കിലും, നേരിട്ടുള്ള ചർച്ചയ്ക്ക് താത്പര്യമില്ലെന്നാണ് ഇറാൻ വ്യക്തമാക്കിയിരിക്കുന്നത്. മേഖലയിലെ സംഘർഷം കുറയാതെ തുടരുന്നതിനിടെ അനിശ്ചിതത്വം ശക്തമാകുകയാണ്.
ഇസ്രയേലുമായി ചർച്ചയില്ലെന്ന് ഹിസ്ബുല്ല; സംഘർഷം കടുക്കുന്നു
