വാഷിംഗ്ടൺ: അമേരിക്കയിലെ കോവിഡ് ഗവേഷണ സംവിധാനങ്ങൾ ഹാക്ക് ചെയ്തെന്നാരോപിച്ച് ചൈനീസ് പൗരനെ അപൂർവമായ രീതിയിൽ അമേരിക്കയിലേക്ക് കൈമാറി. ഇറ്റലിയിൽ പിടിയിലായ ഷു സെവെയ് എന്ന പ്രതിയെ അടുത്തിടെ അമേരിക്കൻ കസ്റ്റഡിയിൽ എത്തിച്ചതായി അധികൃതർ അറിയിച്ചു.
2020-21 കാലഘട്ടത്തിൽ കോവിഡ് വാക്സിൻ, ചികിത്സാ ഗവേഷണവുമായി ബന്ധപ്പെട്ട വിവരങ്ങൾ ലക്ഷ്യമിട്ട് നടത്തിയ സൈബർ ആക്രമണങ്ങളുമായി ഷുവിന് ബന്ധമുണ്ടെന്നാണ് അമേരിക്കയുടെ ആരോപണം. അമേരിക്കൻ സർവകലാശാലകളും ഗവേഷകരും സൈബർ ആക്രമണങ്ങഴിൽ ലക്ഷ്യമാക്കപ്പെട്ടതായി അന്വേഷണത്തിൽ കണ്ടെത്തിയിട്ടുണ്ട്.
ഇറ്റലിയിൽ നടന്ന ഏകോപിത നീക്കത്തിലൂടെയാണ് പ്രതിയെ പിടികൂടിയതെന്ന് എഫ്ബിഐ മേധാവി കാഷ് പട്ടേൽ വ്യക്തമാക്കി. ഇറ്റാലിയൻ ദേശീയ പോലീസുമായി ചേർന്നാണ് ഈ നടപടി വിജയകരമായി പൂർത്തിയാക്കിയത്. ഇറ്റലി സന്ദർശനവുമായി ബന്ധപ്പെട്ട വിമർശനങ്ങൾക്ക് മറുപടിയായും പട്ടേൽ ഈ വിവരം പുറത്തുവിട്ടു.
ഷു ചൈനയുടെ സ്റ്റേറ്റ് സെക്യൂരിറ്റി മന്ത്രാലയവുമായി ബന്ധപ്പെട്ടിരുന്നുവെന്നും ഷാങ്ഹായ് യൂണിറ്റുമായി ബന്ധമുണ്ടെന്നും പട്ടേൽ പറഞ്ഞു. എന്നാൽ ചില വിവരങ്ങൾ ഇപ്പോഴും രഹസ്യമായിരിക്കുകയാണ്. ഹാക്കിംഗ് കേസിൽ പ്രതിയെ അമേരിക്കയിലെ ഹ്യൂസ്റ്റണിൽ വിചാരണ ചെയ്യുമെന്നും അധികൃതർ അറിയിച്ചു.
'ഹാഫ്നിയം' എന്നറിയപ്പെടുന്ന ആഗോള സൈബർ ആക്രമണ ശൃംഖലയുടെ ഭാഗമായാണ് ഈ കേസും. മൈക്രോസോഫ്റ്റ് എക്സ്ചേഞ്ച് സർവറിലെ പിഴവുകൾ ഉപയോഗിച്ച് ആയിരക്കണക്കിന് സിസ്റ്റങ്ങൾ ഹാക്ക് ചെയ്യപ്പെട്ടതായി റിപ്പോർട്ടുണ്ട്. അമേരിക്കയിൽ മാത്രം 12,000ലധികം സംവിധാനങ്ങളെ ഇതിലൂടെ ബാധിച്ചതായാണ് കണക്കുകൾ.
ചൈനീസ് സൈബർ ചാരപ്രവർത്തനങ്ങളെ നേരിടുന്നത് എഫ്ബിഐയുടെ പ്രധാന ലക്ഷ്യമാണെന്നും ഇത്തരത്തിലുള്ള നടപടികൾ തുടരുമെന്നും പട്ടേൽ വ്യക്തമാക്കി.
ഇറ്റലിയിൽ പിടിയിലായ ചൈനീസ് ഹാക്കറെ അമേരിക്കയിലേക്ക് കൈമാറി
