വാഷിങ്ടണ്‍: 2026ലെ അമേരിക്കന്‍ ഇടക്കാല തിരഞ്ഞെടുപ്പിന് മുന്നോടിയായി ദക്ഷിണ കരോലിനയിലെ സെനറ്റ് പോരാട്ടത്തില്‍ ഡെമോക്രാറ്റിക് സ്ഥാനാര്‍ഥി ഡോ. ആനി ആന്‍ഡ്രൂസിന് പിന്തുണയുമായി മുന്‍ ഗവര്‍ണര്‍മാരായ ഡേവിഡ് ബീസ്ലിയും ജിം ഹോഡ്ജസും. റിപ്പബ്ലിക്കന്‍ പാര്‍ട്ടിക്കാരനായിരുന്ന ബീസ്ലിയും ഡെമോക്രാറ്റായ ഹോഡ്ജസും ഒരുമിച്ച് ആന്‍ഡ്രൂസിനെ പിന്തുണച്ചത് അപൂര്‍വമായ കക്ഷിരാഷ്ട്രീയ നീക്കമായാണ് വിലയിരുത്തപ്പെടുന്നത്. പ്രസിഡന്റ് ഡോണള്‍ഡ് ട്രംപിന്റെ പിന്തുണയുള്ള റിപ്പബ്ലിക്കന്‍ സ്ഥാനാര്‍ഥി ഡാര്‍ലിന്‍ ഗ്രഹാമിനെതിരെയാണ് ആന്‍ഡ്രൂസ് മത്സരിക്കുന്നത്.
തിങ്കളാഴ്ച പുറത്തുവിട്ട വീഡിയോയിലൂടെയാണ് ഇരുവരും ആന്‍ഡ്രൂസിന് പിന്തുണ പ്രഖ്യാപിച്ചത്. രാജ്യം കടുത്ത രാഷ്ട്രീയ വിഭജനത്തിലേക്ക് നീങ്ങുകയാണെന്നും രാഷ്ട്രീയ നേതാക്കളുടെ പ്രസ്താവനകളിലെ വിദ്വേഷവും കടുത്ത ഭാഷയും നിയന്ത്രണാതീതമായെന്നും ഇരുവരും അഭിപ്രായപ്പെട്ടു. ജനങ്ങളെ കൂടുതല്‍ പ്രകോപിപ്പിക്കുന്നതല്ല, പ്രശ്‌നങ്ങള്‍ക്ക് പരിഹാരം കണ്ടെത്തുന്നതാണ് നേതൃത്വത്തിന്റെ കടമയെന്ന് ബീസ്ലി പറഞ്ഞു.
1995 മുതല്‍ 1999 വരെ ദക്ഷിണ കരോലിന ഗവര്‍ണറായിരുന്ന ബീസ്ലി പിന്നീട് റിപ്പബ്ലിക്കന്‍ പാര്‍ട്ടിയില്‍ സജീവമായി പ്രവര്‍ത്തിച്ചിരുന്നു. ട്രംപിന്റെ നേതൃത്വത്തില്‍ റിപ്പബ്ലിക്കന്‍ പാര്‍ട്ടി സ്വീകരിക്കുന്ന രാഷ്ട്രീയ ദിശയെ വിമര്‍ശിച്ചും അദ്ദേഹം രംഗത്തെത്തിയിട്ടുണ്ട്. താന്‍ പരിചയപ്പെട്ടിരുന്ന പാര്‍ട്ടിയല്ല ഇപ്പോഴത്തേതെന്നും നിലവിലെ പാര്‍ട്ടിയെ പഴയതുപോലെ തന്റേതായി കാണാനാകുന്നില്ലെന്നും അദ്ദേഹം അടുത്തിടെ പ്രസിദ്ധീകരിച്ച ലേഖനത്തില്‍ വ്യക്തമാക്കിയിരുന്നു.
മറ്റ് സംസ്ഥാനങ്ങളിലും കക്ഷിമാറ്റ പിന്തുണ
ദക്ഷിണ കരോലിനയില്‍ മാത്രം ഒതുങ്ങുന്നതല്ല റിപ്പബ്ലിക്കന്‍ പാര്‍ട്ടിയിലെ മുന്‍ നേതാക്കള്‍ ഡെമോക്രാറ്റിക് സ്ഥാനാര്‍ഥികള്‍ക്ക് പിന്തുണ നല്‍കുന്ന പ്രവണത. റിപ്പബ്ലിക്കന്‍ സ്വാധീനം ശക്തമായ കാന്‍സസില്‍ മുന്‍ റിപ്പബ്ലിക്കന്‍ ഗവര്‍ണര്‍മാര്‍ ഡെമോക്രാറ്റിക് സ്ഥാനാര്‍ഥി ആദം ഹാമില്‍ട്ടണിനെ പിന്തുണച്ചിട്ടുണ്ട്. നിലവിലെ റിപ്പബ്ലിക്കന്‍ സെനറ്റര്‍ റോജര്‍ മാര്‍ഷലിനെതിരെയാണ് ഹാമില്‍ട്ടണ്‍ മത്സരിക്കുന്നത്.
ടെക്‌സസില്‍ മുന്‍ പ്രസിഡന്റ് ജോര്‍ജ് എച്ച്. ഡബ്ല്യു. ബുഷിന്റെയും മുന്‍ പ്രസിഡന്റ് ജോര്‍ജ് ഡബ്ല്യു. ബുഷിന്റെയും കുടുംബവുമായി ബന്ധപ്പെട്ട പ്രമുഖരും ഡെമോക്രാറ്റിക് സെനറ്റ് സ്ഥാനാര്‍ഥി ജെയിംസ് തലാരിക്കോയ്ക്ക് പിന്തുണ നല്‍കുന്നതായാണ് റിപ്പോര്‍ട്ട്. കടുത്ത രാഷ്ട്രീയ മത്സരങ്ങള്‍ നടക്കുന്ന സംസ്ഥാനങ്ങളില്‍ പാര്‍ട്ടിയുടെ പരമ്പരാഗത അതിരുകള്‍ മറികടന്നുള്ള പിന്തുണ ശ്രദ്ധേയമാകുകയാണ്.
ട്രംപിന്റെ പിന്തുണയുണ്ടെങ്കിലും ഗ്രഹാമിന് വെല്ലുവിളികള്‍
സെനറ്റര്‍ ലിന്‍ഡ്‌സി ഗ്രഹാമിന്റെ മരണത്തെത്തുടര്‍ന്ന് ജൂലൈയില്‍ അദ്ദേഹത്തിന് പകരക്കാരിയായി നിയമിക്കപ്പെട്ടതാണ് ഡാര്‍ലിന്‍ ഗ്രഹാം. സ്ഥാനത്തേക്കുള്ള അനുയോജ്യതയും ദേശീയ സുരക്ഷാ വിഷയങ്ങളിലെ അറിവും സംബന്ധിച്ച് പ്രചാരണത്തിനിടെ അവര്‍ ചോദ്യങ്ങള്‍ നേരിട്ടു. ഒരു സംവാദത്തിനിടെ ദേശീയ സുരക്ഷയെക്കുറിച്ച് തനിക്ക് വേണ്ടത്ര അറിവില്ലെന്ന് അവര്‍ സമ്മതിച്ചതായും റിപ്പോര്‍ട്ടുണ്ട്.
ലിന്‍ഡ്‌സി ഗ്രഹാമുമായി അടുത്ത ബന്ധം പുലര്‍ത്തിയിരുന്ന ട്രംപ് ഡാര്‍ലിന്‍ ഗ്രഹാമിനോട് മത്സരിക്കാന്‍ ആവശ്യപ്പെടുകയും അവരുടെ സ്ഥാനാര്‍ഥിത്വത്തെ പിന്തുണയ്ക്കുകയും ചെയ്തിരുന്നു. എന്നാല്‍, പ്രചാരണ ഫണ്ട് സമാഹരിക്കുന്നതില്‍ അവര്‍ പിന്നിലാണെന്നാണ് റിപ്പോര്‍ട്ട്. ആന്‍ഡ്രൂസ് ഗണ്യമായി കൂടുതല്‍ തുക സമാഹരിച്ചതായും സ്വന്തം പാര്‍ട്ടിയിലെ ചില യാഥാസ്ഥിതിക നേതാക്കള്‍ക്കിടയില്‍ ഗ്രഹാമിന് സംശയങ്ങളും വിമര്‍ശനങ്ങളും നേരിടേണ്ടിവരുന്നതായും റിപ്പോര്‍ട്ടുകള്‍ പറയുന്നു.
ഡെമോക്രാറ്റുകള്‍ക്ക് ഇപ്പോഴും കടുത്ത പോരാട്ടം
മുന്‍ ഗവര്‍ണര്‍മാരുടെ പിന്തുണയും മത്സരം പ്രതീക്ഷിച്ചതിലും കടുത്തതായതും ആന്‍ഡ്രൂസിന് രാഷ്ട്രീയ നേട്ടമാകാമെങ്കിലും ദക്ഷിണ കരോലിനയില്‍ വിജയം നേടുക എളുപ്പമല്ല. ഈ നൂറ്റാണ്ടില്‍ സംസ്ഥാനത്ത് ഒരു സെനറ്റ് സീറ്റുപോലും ഡെമോക്രാറ്റുകള്‍ക്ക് നേടാനായിട്ടില്ല. രണ്ട് വര്‍ഷം മുമ്പ് പ്രസിഡന്റ് തിരഞ്ഞെടുപ്പില്‍ ട്രംപ് ഇവിടെ 17 ശതമാനത്തിലധികം പോയിന്റിന്റെ ഭൂരിപക്ഷം നേടിയിരുന്നു.
ഇത്തവണത്തെ രാഷ്ട്രീയ സാഹചര്യം ഡെമോക്രാറ്റുകള്‍ക്ക് അനുകൂലമാകുന്നുവെന്ന വിലയിരുത്തലുകള്‍ക്കിടയിലും സ്വതന്ത്ര തിരഞ്ഞെടുപ്പ് വിശകലന സ്ഥാപനമായ കുക്ക് പൊളിറ്റിക്കല്‍ റിപ്പോര്‍ട്ട് ദക്ഷിണ കരോലിനയിലെ സെനറ്റ് മത്സരം ഇപ്പോഴും റിപ്പബ്ലിക്കന്‍ സ്ഥാനാര്‍ഥിക്ക് അനുകൂലമായ ചായ്വുള്ളതായാണ് വിലയിരുത്തുന്നത്.
മുന്‍ റിപ്പബ്ലിക്കന്‍ നേതാക്കളുടെ പിന്തുണ ആന്‍ഡ്രൂസിന്റെ പ്രചാരണത്തിന് എത്രത്തോളം ഗുണം ചെയ്യുമെന്നതും ട്രംപിന്റെ പിന്തുണ ഗ്രഹാമിന് എത്രമാത്രം രാഷ്ട്രീയ നേട്ടമാകുമെന്നതും തിരഞ്ഞെടുപ്പ് ഫലത്തില്‍ നിര്‍ണായകമാകും.
ട്രംപിന്റെ സ്ഥാനാര്‍ഥിക്കെതിരെ ഡെമോക്രാറ്റിക് സ്ഥാനാര്‍ഥിക്ക് മുന്‍ ഗവര്‍ണര്‍മാരുടെ പിന്തുണ; ദക്ഷിണ കരോലിനയില്‍ സെനറ്റ് പോരാട്ടം കടുക്കുന്നു
