വാഷിംഗ്ടണ്‍: ഡെമോക്രാറ്റുകളുടെ മുന്നേറ്റത്തില്‍ അടിപതറി പ്രസിഡന്റ് ഡൊണാള്‍ഡ് ട്രംപും റിപ്പബ്ലിക്കന്‍ പാര്‍ട്ടിയും. യു എസ് ഇടക്കാല തെരഞ്ഞെടുപ്പില്‍ സെനറ്റിന്റെയും ജനപ്രതിനിധിസഭയുടെയും നിയന്ത്രണം ഡെമോക്രാറ്റുകള്‍ പിടിച്ചെടുത്തതോടെ വാഷിംഗ്്ടണിലെ രാഷ്ട്രീയ സമവാക്യങ്ങളില്‍ നിര്‍ണായക മാറ്റമാണ് പ്രതീക്ഷിക്കുന്നത്.
ജീവിതച്ചെലവ് വര്‍ധിച്ചതിലുള്ള ജനങ്ങളുടെ പ്രതിഷേധമാണ് ഡെമോക്രാറ്റുകളുടെ മുന്നേറ്റത്തിന് പ്രധാന കാരണമായത്. റിപ്പബ്ലിക്കന്‍ പാര്‍ട്ടിയുടെ ശക്തികേന്ദ്രങ്ങളായ മെയിന്‍, അയോവ, ഒഹായോ, സൗത്ത് കരോലിന, നോര്‍ത്ത് കരോലിന എന്നിവിടങ്ങളില്‍ സെനറ്റ് സീറ്റുകള്‍ ഡെമോക്രാറ്റുകള്‍ പിടിച്ചെടുത്തു. കന്‍സസിലും ടെക്‌സസിലും അട്ടിമറി വിജയം നേടാനും പാര്‍ട്ടിക്ക് സാധിച്ചു.
പുറത്തുവന്ന കണക്കുകള്‍ പ്രകാരം 100 അംഗ സെനറ്റില്‍ ഡെമോക്രാറ്റുകള്‍ക്ക് 54 സീറ്റും റിപ്പബ്ലിക്കന്‍മാര്‍ക്ക് 42 സീറ്റുമാണ് ലഭിച്ചത്. റിപ്പബ്ലിക്കന്‍ ശക്തികേന്ദ്രമായി കരുതിയിരുന്ന മിസിസിപ്പിയിലും കടുത്ത മത്സരമാണ് നടന്നത്.
435 അംഗ ജനപ്രതിനിധിസഭയില്‍ ഡെമോക്രാറ്റുകള്‍ നിര്‍ണായക ഭൂരിപക്ഷം ഉറപ്പിച്ചു. റിപ്പബ്ലിക്കന്‍മാരുടെ രണ്ട് ഡസനിലധികം സീറ്റുകള്‍ പിടിച്ചെടുത്ത പാര്‍ട്ടിക്ക് 231 സീറ്റുകള്‍ ലഭിച്ചതായാണ് അമേരിക്കന്‍ ടെലിവിഷന്‍ നെറ്റ്വര്‍ക്കുകള്‍ പറയുന്നത്. ഭൂരിപക്ഷത്തിന് ആവശ്യമായ 218 സീറ്റുകളെക്കാള്‍ ഏറെ മുന്നിലാണ് ഡെമോക്രാറ്റുകള്‍.
ട്രംപിന്റെ നയങ്ങള്‍ക്കുള്ള ജനവിധിയായാണ് അദ്ദേഹം തന്നെ തെരഞ്ഞെടുപ്പിനെ വിശേഷിപ്പിച്ചിരുന്നത്. എന്നാല്‍ ഫലം അദ്ദേഹത്തിന്റെ രാഷ്ട്രീയ അജണ്ടയ്ക്കുള്ള കനത്ത തിരിച്ചടിയായി. ഭരണകാലയളവിലെ അവസാന രണ്ടുവര്‍ഷങ്ങളില്‍ നയപരിപാടികള്‍ നടപ്പാക്കാനുള്ള ട്രംപിന്റെ ശേഷി ഇതോടെ ഗണ്യമായി കുറയും.
കോണ്‍ഗ്രസിന്റെ ഇരുസഭകളും ഡെമോക്രാറ്റുകളുടെ നിയന്ത്രണത്തിലാകുന്നതോടെ സര്‍ക്കാരിന്റെ ബില്ലുകള്‍ തടയാനും ഭരണകൂടത്തിനെതിരെ അന്വേഷണങ്ങള്‍ നടത്താനും ട്രംപിന്റെ ബജറ്റ് നിര്‍ദേശങ്ങള്‍ക്ക് തടസ്സം സൃഷ്ടിക്കാനും അവര്‍ക്ക് കഴിയും. മുതിര്‍ന്ന സര്‍ക്കാര്‍ ഉദ്യോഗസ്ഥരുടെയും ഫെഡറല്‍ ജഡ്ജിമാരുടെയും നിയമനങ്ങള്‍ അംഗീകരിക്കുന്നതിലും ഡെമോക്രാറ്റുകള്‍ക്ക് നിര്‍ണായക പങ്കുണ്ടാകും. അതേസമയം, വിദേശനയത്തില്‍ പ്രസിഡന്റിന്റെ ഭരണഘടനാപരമായ അധികാരങ്ങള്‍ തുടരും.
പണപ്പെരുപ്പവും ജീവിതച്ചെലവിലെ വര്‍ധനവും സംബന്ധിച്ച ജനങ്ങളുടെ അതൃപ്തിയാണ് തെരഞ്ഞെടുപ്പില്‍ പ്രതിഫലിച്ചതെന്നാണ് വിലയിരുത്തല്‍. 2024ലെ പ്രസിഡന്റ് തെരഞ്ഞെടുപ്പ് പ്രചാരണത്തില്‍ വിലക്കയറ്റം നിയന്ത്രിക്കുമെന്ന് ട്രംപ് വാഗ്ദാനം ചെയ്തിരുന്നു. എന്നാല്‍ തെരഞ്ഞെടുപ്പിന് മുന്നോടിയായി ന്യൂയോര്‍ക്ക് ടൈംസ് നടത്തിയ അഭിപ്രായ സര്‍വേയില്‍ ട്രംപിന്റെ വ്യക്തിഗത അംഗീകാരനിരക്ക് 36 ശതമാനമായി കുറഞ്ഞിരുന്നു.
വോട്ടെടുപ്പിനു ശേഷം നടത്തിയ എക്‌സിറ്റ് പോളില്‍ പങ്കെടുത്തവരില്‍ 62 ശതമാനം പേര്‍ ഇറാനുമായുള്ള യുദ്ധവും ഇറക്കുമതി തീരുവകളും ഉള്‍പ്പെടെയുള്ള ട്രംപ് ഭരണകൂടത്തിന്റെ നയങ്ങളാണ് വിലക്കയറ്റത്തിന് കാരണമെന്ന് അഭിപ്രായപ്പെട്ടതായി അമേരിക്കന്‍ ടെലിവിഷന്‍ ചാനലുകള്‍ റിപ്പോര്‍ട്ട് ചെയ്തു.
തോല്‍വിയുടെ ഉത്തരവാദിത്വത്തില്‍നിന്ന് ആദ്യം ഒഴിഞ്ഞുമാറാനാണ് ട്രംപ് ശ്രമിച്ചത്. 'ഞാന്‍ ബാലറ്റിലുണ്ടായിരുന്നില്ല. ഉണ്ടായിരുന്നെങ്കില്‍ വന്‍ ഭൂരിപക്ഷത്തില്‍ വിജയിക്കുമായിരുന്നു' എന്നായിരുന്നു ട്രൂത്ത് സോഷ്യലിലെ അദ്ദേഹത്തിന്റെ പ്രതികരണം.
പിന്നീട് ഡെമോക്രാറ്റുകളെ അഭിനന്ദിച്ച ട്രംപ് ഫോക്‌സ് ന്യൂസിനോട്, 'ഡെമോക്രാറ്റുകള്‍ക്ക് അഭിനന്ദനങ്ങള്‍. അവര്‍ മികച്ച പ്രകടനം നടത്തി' എന്നു പറഞ്ഞു. രാജ്യത്തിന്റെ നന്മയ്ക്കായി ഡെമോക്രാറ്റുകളുമായി സഹകരിച്ച് പ്രവര്‍ത്തിക്കുമെന്നും പൊളിറ്റിക്കോയോട് വ്യക്തമാക്കി.
എന്നാല്‍ സാമൂഹികമാധ്യമത്തില്‍ 'വീറ്റോ' എന്ന് രേഖപ്പെടുത്തിയ ചുവന്ന തൊപ്പിയുടെ ചിത്രം പങ്കുവെച്ച അദ്ദേഹം തെരഞ്ഞെടുപ്പ് വാര്‍ത്താ അവതരണത്തെച്ചൊല്ലി ഫോക്‌സ് ന്യൂസിനെ വിമര്‍ശിക്കുകയും ചെയ്തു.
മുന്‍ പ്രസിഡന്റ് ബറാക് ഒബാമ ഡെമോക്രാറ്റുകളുടെ വിജയത്തെ വോട്ടര്‍മാരുടെ വ്യക്തമായ സന്ദേശമെന്ന് വിശേഷിപ്പിച്ചു. ജനങ്ങളെ ഭിന്നിപ്പിക്കുന്നതിനുപകരം ഒന്നിപ്പിക്കുന്ന രാഷ്ട്രീയവും പ്രായോഗിക പരിഹാരങ്ങള്‍ മുന്നോട്ടുവയ്ക്കുന്ന നേതാക്കളുമാണ് ജനങ്ങള്‍ ആഗ്രഹിക്കുന്നതെന്ന് അദ്ദേഹം പറഞ്ഞു.
ഡെമോക്രാറ്റിക് നേതാവ് ഹക്കീം ജെഫ്രീസ് ജനപ്രതിനിധിസഭയുടെ അടുത്ത സ്പീക്കറാകാനുള്ള സാധ്യതയും തെരഞ്ഞെടുപ്പ് ഫലത്തോടെ ശക്തമായി. ഈ സ്ഥാനത്തെത്തുന്ന ആദ്യ കറുത്ത വര്‍ഗക്കാരനായ വ്യക്തിയാകും അദ്ദേഹം.
2028-ലെ പ്രസിഡന്റ് തെരഞ്ഞെടുപ്പില്‍ ട്രംപിന് വീണ്ടും മത്സരിക്കാനാവാത്ത സാഹചര്യത്തില്‍ റിപ്പബ്ലിക്കന്‍ പാര്‍ട്ടിയുടെ ഭാവിയെക്കുറിച്ചുള്ള ചര്‍ച്ചകള്‍ക്കും തെരഞ്ഞെടുപ്പ് ഫലം വഴിവെച്ചിട്ടുണ്ട്.
റിപ്പബ്ലിക്കന്‍ പാര്‍ട്ടിയുടെ ശക്തികേന്ദ്രമായ ടെക്‌സസില്‍ ഗവര്‍ണര്‍ സ്ഥാനവും യു എസ് സെനറ്റ് സീറ്റും പിടിച്ചെടുത്തതാണ് ഡെമോക്രാറ്റുകളുടെ ഏറ്റവും വലിയ നേട്ടങ്ങളിലൊന്ന്.
ട്രംപിന്റെ പിന്തുണയുള്ള റിപ്പബ്ലിക്കന്‍ സ്ഥാനാര്‍ഥി കെന്‍ പാക്സ്റ്റണെ പരാജയപ്പെടുത്തി ഡെമോക്രാറ്റിക് സ്ഥാനാര്‍ഥി ജെയിംസ് തലാറിക്കോ സെനറ്റിലേക്ക് തെരഞ്ഞെടുക്കപ്പെട്ടു. 1988-നുശേഷം ടെക്‌സസില്‍നിന്ന് സെനറ്റിലേക്ക് തെരഞ്ഞെടുക്കപ്പെടുന്ന ആദ്യ ഡെമോക്രാറ്റാണ് തലാറിക്കോ.
'നമ്മള്‍ ടെക്‌സസിനെ തിരിച്ചുപിടിച്ചു' എന്ന് വിജയത്തിനുശേഷം അനുയായികളെ അഭിസംബോധന ചെയ്ത് തലാറിക്കോ പറഞ്ഞു. ഭിന്നിപ്പിന്റെ രാഷ്ട്രീയത്തെ സ്‌നേഹത്തിന്റെ രാഷ്ട്രീയം പരാജയപ്പെടുത്തിയെന്നും അദ്ദേഹം അവകാശപ്പെട്ടു.
ലോകത്തിലെ ഏറ്റവും സമ്പന്നനായ വ്യക്തി ഇലോണ്‍ മസ്‌ക്, അമേരിക്കയിലെ ഏറ്റവും ശക്തനായ വ്യക്തി ട്രംപ്, വാഷിംഗ്ടണിലെ രാഷ്ട്രീയ സംവിധാനം എന്നിവയ്‌ക്കെതിരെയാണ് തങ്ങള്‍ വിജയിച്ചതെന്നും അദ്ദേഹം പറഞ്ഞു. പാക്സ്റ്റണിന്റെ തെരഞ്ഞെടുപ്പ് പ്രചാരണത്തിന് മസ്‌ക് 15 കോടി ഡോളറിലധികം സാമ്പത്തിക പിന്തുണ നല്‍കിയിരുന്നു.
ഗവര്‍ണര്‍ തെരഞ്ഞെടുപ്പില്‍ നിലവിലെ റിപ്പബ്ലിക്കന്‍ ഗവര്‍ണര്‍ ഗ്രെഗ് ആബട്ടിനെ പരാജയപ്പെടുത്തി ഡെമോക്രാറ്റിക് സ്ഥാനാര്‍ഥി ജിന ഹിനോജോസയും ചരിത്രം കുറിച്ചു. ടെക്‌സസിന്റെ ആദ്യ ലാറ്റിന വംശജയായ വനിതാ ഗവര്‍ണറായി അവര്‍ അധികാരത്തിലെത്തും. മൂന്ന് പതിറ്റാണ്ടിലേറെയായി സംസ്ഥാനത്ത് തുടര്‍ന്ന റിപ്പബ്ലിക്കന്‍ ഗവര്‍ണര്‍ ഭരണത്തിനും ഇതോടെ വിരാമമായി.
'ഇന്ന് രാത്രി ലോകത്തെ ഞങ്ങള്‍ അമ്പരപ്പിച്ചു. എന്തും സാധ്യമാണെന്ന് തെളിയിച്ചു' എന്നായിരുന്നു ഹിനോജോസയുടെ പ്രതികരണം.
ജീവിതച്ചെലവിലെ വര്‍ധനവായിരുന്നു അവരുടെ പ്രചാരണത്തിലെ പ്രധാന വിഷയം. സാധാരണ ജനങ്ങളുടെ ആവശ്യങ്ങള്‍ക്കുപകരം സമ്പന്നമായ സാങ്കേതികവിദ്യാ കമ്പനികള്‍ക്ക് മുന്‍ഗണന നല്‍കുന്നുവെന്ന് അവര്‍ ആബട്ടിനെതിരെ ആരോപിച്ചിരുന്നു. പ്രത്യേകിച്ച് ഡേറ്റാ സെന്ററുകളുടെ വികസനത്തിന് ആബട്ട് നല്‍കിയ പിന്തുണയും തെരഞ്ഞെടുപ്പ് പ്രചാരണത്തില്‍ ചര്‍ച്ചയായി.
മിഷിഗണില്‍ റിപ്പബ്ലിക്കന്‍ സ്ഥാനാര്‍ഥി മൈക്ക് റോജേഴ്‌സിനെ പരാജയപ്പെടുത്തി പുരോഗമനവാദിയായ ഡെമോക്രാറ്റിക് നേതാവ് അബ്ദുല്‍ എല്‍-സയീദ് വിജയിച്ചു. 42-കാരനായ അദ്ദേഹം അടുത്ത ജനുവരിയില്‍ അധികാരമേല്‍ക്കുന്നതോടെ അമേരിക്കന്‍ സെനറ്റിലെത്തുന്ന ആദ്യ മുസ്ലിം അംഗമാകും.
മുസ്ലിം മതവിശ്വാസം തെരഞ്ഞെടുപ്പ് പ്രചാരണത്തില്‍ നിരന്തരം ചര്‍ച്ചയായ കടുത്ത മത്സരത്തിനൊടുവിലാണ് എല്‍-സയീദിന്റെ വിജയം. ഡെട്രോയിറ്റില്‍ നടന്ന വിജയാഘോഷത്തില്‍ 'മിഷിഗണ്‍, നമ്മള്‍ വിജയിച്ചു' എന്ന് അദ്ദേഹം അനുയായികളോട് പറഞ്ഞു.
കന്‍സസില്‍ റിപ്പബ്ലിക്കന്‍ സ്ഥാനാര്‍ഥിയും നിലവിലെ സെനറ്ററുമായ റോജര്‍ മാര്‍ഷലിനെ പരാജയപ്പെടുത്തി ആദം ഹാമില്‍ട്ടണ്‍ വിജയിച്ചു. 1932-നുശേഷം കന്‍സസില്‍നിന്ന് സെനറ്റിലേക്ക് തെരഞ്ഞെടുക്കപ്പെടുന്ന ആദ്യ ഡെമോക്രാറ്റാണ് അദ്ദേഹം.
ഒഹായോയില്‍ മുന്‍ സെനറ്റര്‍ ഷെറോഡ് ബ്രൗണ്‍ വീണ്ടും വിജയം നേടി. വൈസ് പ്രസിഡന്റ് ജെ ഡി വാന്‍സ് 2025-ല്‍ ഒഴിഞ്ഞ സീറ്റിലേക്കാണ് ബ്രൗണ്‍ തിരിച്ചെത്തുന്നത്.
സൗത്ത് കരോലിനയില്‍ ശിശുരോഗ വിദഗ്ധയായ ആനി ആന്‍ഡ്രൂസ് റിപ്പബ്ലിക്കന്‍ സ്ഥാനാര്‍ഥി ഡാര്‍ലിന്‍ ഗ്രഹാമിനെ പരാജയപ്പെടുത്തി. അന്തരിച്ച റിപ്പബ്ലിക്കന്‍ സെനറ്റര്‍ ലിന്‍ഡ്‌സി ഗ്രഹാമിന്റെ സഹോദരിയാണ് ഡാര്‍ലിന്‍. രണ്ട് പതിറ്റാണ്ടിലേറെയായി സംസ്ഥാനത്ത് ഡെമോക്രാറ്റുകള്‍ക്ക് ലഭിക്കാത്ത സെനറ്റ് വിജയമാണ് ആന്‍ഡ്രൂസ് നേടിയത്.
ജോര്‍ജിയയില്‍ ഡെമോക്രാറ്റിക് സെനറ്റര്‍ ജോണ്‍ ഒസോഫ് തന്റെ സീറ്റ് നിലനിര്‍ത്തി. ഇതോടെ 2028-ലെ പ്രസിഡന്റ് തെരഞ്ഞെടുപ്പില്‍ മത്സരിക്കാന്‍ സാധ്യതയുള്ള നേതാക്കളിലൊരാളെന്ന നിലയില്‍ അദ്ദേഹത്തിന്റെ രാഷ്ട്രീയപ്രാധാന്യവും വര്‍ധിച്ചു.
ഡെമോക്രാറ്റുകളുടെ വിജയം ട്രംപ് ഭരണകൂടത്തിനെതിരെ കോണ്‍ഗ്രസ് അന്വേഷണങ്ങള്‍ നടത്താനുള്ള സാധ്യത വര്‍ധിപ്പിച്ചിട്ടുണ്ട്. ട്രംപിന്റെ കുടുംബത്തിന്റെ ബിസിനസ് ഇടപാടുകള്‍, കുടിയേറ്റ നിയമങ്ങള്‍ നടപ്പാക്കുന്നതിനിടെയുണ്ടായ കടുത്ത നടപടികള്‍, വാഷിംഗ്ടണിലെ വിവാദ നിര്‍മാണ പദ്ധതികള്‍ എന്നിവ അന്വേഷണപരിധിയില്‍ വരാം.
ഏകദേശം 15 വര്‍ഷത്തിനുശേഷം ആദ്യമായി അമേരിക്കയിലെ ഭൂരിപക്ഷം ഗവര്‍ണര്‍ പദവികളും ഡെമോക്രാറ്റുകള്‍ക്ക് ലഭിക്കുമെന്നും തെരഞ്ഞെടുപ്പ് പ്രവചനങ്ങള്‍ സൂചിപ്പിച്ചു. 50 സംസ്ഥാനങ്ങളില്‍ കുറഞ്ഞത് 26 എണ്ണത്തിലും ഡെമോക്രാറ്റിക് ഗവര്‍ണര്‍മാര്‍ അധികാരത്തിലെത്തുമെന്നാണ് കണക്കുകൂട്ടല്‍.
ജോര്‍ജിയ, അയോവ, ടെക്‌സസ്, ഒഹായോ എന്നിവയുള്‍പ്പെടെ റിപ്പബ്ലിക്കന്‍മാര്‍ ഭരിച്ചിരുന്ന കുറഞ്ഞത് നാല് സംസ്ഥാനങ്ങളിലെ ഗവര്‍ണര്‍ സ്ഥാനങ്ങളും ഡെമോക്രാറ്റുകള്‍ പിടിച്ചെടുത്തു. അമേരിക്കന്‍ രാഷ്ട്രീയത്തില്‍ ട്രംപിന്റെ സ്വാധീനത്തിനും റിപ്പബ്ലിക്കന്‍ പാര്‍ട്ടിയുടെ ഭാവിക്കും പുതിയ വെല്ലുവിളികള്‍ ഉയര്‍ത്തുന്നതാണ് ഈ തെരഞ്ഞെടുപ്പ് ഫലം.