ഗ്രീൻ കാർഡിന് ക്ഷേമപദ്ധതികൾ തടസ്സമാകുമോ? ട്രംപ് ഭരണകൂടത്തിനെതിരെ അമേരിക്കൻ നഗരങ്ങളും സംസ്ഥാനങ്ങളും കോടതിയിൽ

---

ന്യൂയോർക്ക്:  ഭക്ഷ്യസഹായം, മെഡികെയ്ഡ് തുടങ്ങിയ സർക്കാർ ക്ഷേമപദ്ധതികളുടെ ഉപയോഗം ഗ്രീൻ കാർഡിനും വീസയ്ക്കുമുള്ള അപേക്ഷയെ പ്രതികൂലമായി ബാധിച്ചേക്കാവുന്ന ട്രംപ് ഭരണകൂടത്തിന്റെ പുതിയ നയത്തിനെതിരെ അമേരിക്കയിലെ ഡെമോക്രാറ്റിക് നേതൃത്വത്തിലുള്ള സംസ്ഥാനങ്ങളും നഗരങ്ങളും കോടതിയെ സമീപിച്ചു. മാൻഹട്ടനിലെ ഫെഡറൽ കോടതിയിൽ സമർപ്പിച്ച രണ്ട് ഹർജികളിലൂടെയാണ് പുതിയ നിയമത്തെ ചോദ്യം ചെയ്തിരിക്കുന്നത്.

വെള്ളിയാഴ്ച പ്രാബല്യത്തിൽ വരാനിരിക്കുന്ന പുതിയ ചട്ടം, അമേരിക്കയിൽ സ്ഥിരതാമസാനുമതിയായ ഗ്രീൻ കാർഡിന് അപേക്ഷിക്കുന്നവർ ഭാവിയിൽ സർക്കാർ സഹായങ്ങളെ പ്രധാനമായും ആശ്രയിക്കുന്ന 'പബ്ലിക് ചാർജ്' ആയി മാറാൻ സാധ്യതയുള്ളവരാണോ എന്നത് പരിഗണിക്കാൻ കുടിയേറ്റ ഉദ്യോഗസ്ഥർക്ക് കൂടുതൽ അധികാരം നൽകുന്നു.

ഒന്നാം ട്രംപ് ഭരണകാല നയത്തിന്റെ തിരിച്ചുവരവ്

ട്രംപ് ഭരണകൂടം ജൂലൈയിലാണ് പുതിയ ചട്ടം പ്രഖ്യാപിച്ചത്. ആദ്യ ട്രംപ് ഭരണകാലത്ത് 2019ൽ നടപ്പാക്കിയ 'പബ്ലിക് ചാർജ്' നയത്തിന്റെ വിപുലമായ സമീപനമാണ് ഇതോടെ വീണ്ടും കൊണ്ടുവരുന്നത്. എന്നാൽ ജോ ബൈഡൻ ഭരണകൂടം അധികാരത്തിലെത്തിയതോടെ ഈ നയം പിൻവലിക്കുകയും 2022ൽ സർക്കാർ സഹായങ്ങളെ പരിഗണിക്കുന്നതിൽ കൂടുതൽ പരിമിതമായ വ്യാഖ്യാനം സ്വീകരിക്കുകയും ചെയ്തിരുന്നു.

അമേരിക്കൻ കുടിയേറ്റ നിയമത്തിൽ സർക്കാർ സഹായത്തെ പ്രധാനമായും ആശ്രയിക്കാൻ സാധ്യതയുള്ളവരെ ചില സാഹചര്യങ്ങളിൽ രാജ്യത്തേക്ക് പ്രവേശിക്കുന്നതിൽനിന്നോ സ്ഥിരതാമസത്തിന് അനുമതി നൽകുന്നതിൽനിന്നോ തടയാൻ വ്യവസ്ഥയുണ്ട്. എന്നാൽ ബൈഡൻ കാലത്തെ ചട്ടപ്രകാരം സപ്ലിമെന്റൽ സെക്യൂരിറ്റി ഇൻകം പോലുള്ള ചില പണസഹായങ്ങൾ മാത്രമാണ് പ്രധാനമായും പരിഗണിച്ചിരുന്നത്.

ഭക്ഷ്യ കൂപ്പൺ ഉൾപ്പെടെയുള്ള ഭക്ഷ്യസഹായവും കുറഞ്ഞ വരുമാനക്കാരുടെ ആരോഗ്യപരിരക്ഷാ പദ്ധതിയായ മെഡികെയ്ഡും പോലുള്ള പണരഹിത ആനുകൂല്യങ്ങൾ പരിഗണിച്ചിരുന്നില്ല. പുതിയ ചട്ടം ഇത്തരം ആനുകൂല്യങ്ങൾ വീണ്ടും പരിഗണിക്കാനുള്ള സാഹചര്യം സൃഷ്ടിക്കുന്നു.

'കുടുംബങ്ങളെ ഭയത്തിലാക്കുന്നു'

പുതിയ നയത്തിൽ ഏത് സർക്കാർ ആനുകൂല്യങ്ങൾ ഗ്രീൻ കാർഡ് അപേക്ഷയെ ബാധിക്കുമെന്ന് വ്യക്തമായ പരിധികളില്ലെന്നാണ് സംസ്ഥാനങ്ങളുടെ പ്രധാന ആരോപണം. ഇതോടെ നിയമപരമായി അർഹതയുള്ള ഭക്ഷ്യസഹായവും ആരോഗ്യപരിരക്ഷയും ഉപേക്ഷിക്കാൻ കുടിയേറ്റ കുടുംബങ്ങൾ നിർബന്ധിതരാകുമെന്ന ആശങ്കയും ഹർജിക്കാർ ഉയർത്തുന്നു.

പുതിയ നയം കുടിയേറ്റ കുടുംബങ്ങളുടെ ഭയത്തെ മുതലെടുക്കുന്നതാണെന്ന് ന്യൂയോർക്ക് അറ്റോർണി ജനറൽ ലെറ്റീഷ്യ ജെയിംസ് ആരോപിച്ചു. ഭക്ഷണം, ആരോഗ്യപരിരക്ഷ തുടങ്ങിയ നിയമപരമായി ലഭിക്കേണ്ട ആനുകൂല്യങ്ങൾ പോലും ഉപേക്ഷിക്കേണ്ടിവരുമെന്ന ആശങ്ക കുടുംബങ്ങളിൽ സൃഷ്ടിക്കുകയാണ് നയത്തിന്റെ പ്രത്യാഘാതമെന്നും അവർ പറഞ്ഞു.

ന്യൂയോർക്ക്, കാലിഫോർണിയ, ഇല്ലിനോയ്  എന്നിവയുടെ നേതൃത്വത്തിൽ 23 സംസ്ഥാനങ്ങളും ഡിസ്ട്രിക്ട് ഓഫ് കൊളംബിയയും ചേർന്നാണ് ആദ്യ ഹർജി നൽകിയിരിക്കുന്നത്. ന്യൂയോർക്ക് സിറ്റി, ഷിക്കാഗോ, സാൻ ഫ്രാൻസിസ്‌കോ, സിയാറ്റിൽ എന്നിവ ഉൾപ്പെടെ ആറ് നഗരങ്ങളും കൗണ്ടികളും രണ്ടാമത്തെ ഹർജിയിലും പങ്കാളികളാണ്.

നിയമപോരാട്ടം വീണ്ടും ശക്തമാകുന്നു

പുതിയ ചട്ടം നടപ്പാക്കുന്നതിലൂടെ ആഭ്യന്തര സുരക്ഷാ വകുപ്പായ ഡി.എച്ച്.എസ് കോൺഗ്രസ് നൽകിയ അധികാരം മറികടക്കുന്നുവെന്നാണ് സംസ്ഥാനങ്ങളുടെ നിയമവാദം. കൂടാതെ, ദീർഘകാലമായി നിലനിന്നിരുന്ന 'പബ്ലിക് ചാർജ്' വ്യവസ്ഥയുടെ അർഥത്തിൽനിന്ന് ഭരണകൂടം വ്യതിചലിച്ചെന്നും അവർ ആരോപിക്കുന്നു.

ഇതിന് നിയമപരമായ അടിത്തറയായി Administrative Procedure Act ചൂണ്ടിക്കാട്ടിയാണ് ഹർജികൾ. ആദ്യ ട്രംപ് ഭരണകാലത്ത് സമാനമായ നയത്തിനെതിരെ സമർപ്പിച്ച കേസുകളിലും കോടതികൾ ഭരണകൂടത്തിനെതിരെ വിധി പുറപ്പെടുവിച്ചിരുന്നു. പിന്നീട് ബൈഡൻ ഭരണകൂടം മുൻ നയത്തെ സംരക്ഷിക്കുന്ന നിയമനടപടികളിൽനിന്ന് പിന്മാറുകയായിരുന്നു.

അതുകൊണ്ടുതന്നെ പുതിയ ചട്ടത്തിനെതിരായ നിയമപോരാട്ടം കുടിയേറ്റ നയത്തിലെ മറ്റൊരു രാഷ്ട്രീയ ഏറ്റുമുട്ടൽ മാത്രമല്ല. സർക്കാർ ക്ഷേമപദ്ധതികൾ ഉപയോഗിക്കുന്നതും അമേരിക്കയിൽ സ്ഥിരതാമസത്തിനുള്ള അവകാശവും തമ്മിൽ എത്രത്തോളം ബന്ധിപ്പിക്കാം എന്ന അടിസ്ഥാന ചോദ്യമാണ് കോടതികളുടെ മുന്നിലെത്തുന്നത്. ചട്ടം പ്രാബല്യത്തിൽ വന്നാൽ കുറഞ്ഞ വരുമാനക്കാരായ കുടിയേറ്റ കുടുംബങ്ങൾ ഭക്ഷണവും ആരോഗ്യപരിരക്ഷയും പോലുള്ള ആനുകൂല്യങ്ങൾ സ്വീകരിക്കുന്നതിൽ പോലും ആശങ്കപ്പെടാനുള്ള സാഹചര്യമുണ്ടാകുമെന്നാണ് സംസ്ഥാനങ്ങളുടെ മുന്നറിയിപ്പ്.