കാലിഫോര്‍ണിയ: അമേരിക്കയിലെ കാലിഫോര്‍ണിയയില്‍ വിദ്യാര്‍ഥികള്‍ തമ്മിലുണ്ടായ സംഘര്‍ഷത്തിനിടെ ഹൈസ്‌കൂളില്‍ കത്തിക്കുത്ത്. എല്‍ക് ഗ്രോവിലെ പ്ലസന്റ് ഗ്രോവ് ഹൈസ്‌കൂളിലുണ്ടായ സംഭവത്തില്‍ കുറഞ്ഞത് രണ്ട് വിദ്യാര്‍ഥികളെ ആശുപത്രിയില്‍ പ്രവേശിപ്പിച്ചു. സംഭവവുമായി ബന്ധപ്പെട്ട് രണ്ടുപേരെ പൊലീസ് കസ്റ്റഡിയിലെടുത്തു. ഇവരില്‍ ഒരാളാണ് രണ്ട് വിദ്യാര്‍ഥികളെയും കുത്തിയതെന്നാണ് പൊലീസിന്റെ പ്രാഥമിക നിഗമനം.
വൈകിട്ട് 3.45ഓടെ രണ്ട് വിദ്യാര്‍ഥികള്‍ക്ക് പരിക്കേറ്റതായി വിവരം ലഭിച്ചതിനെത്തുടര്‍ന്ന് സ്‌കൂളിലെ സുരക്ഷാ ഉദ്യോഗസ്ഥരും ജീവനക്കാരും സ്ഥലത്തെത്തി. വിദ്യാര്‍ഥികള്‍ തമ്മിലുണ്ടായ തര്‍ക്കമാണ് കത്തിക്കുത്തില്‍ കലാശിച്ചതെന്ന് എല്‍ക് ഗ്രോവ് പൊലീസ് വകുപ്പ് അറിയിച്ചു. സംഭവസ്ഥലത്തുനിന്ന് കത്തിയും കണ്ടെടുത്തു.
കസ്റ്റഡിയിലെടുത്ത രണ്ടുപേരും വിദ്യാര്‍ഥികളാണോയെന്ന കാര്യം വ്യക്തമായിട്ടില്ല. പരിക്കേറ്റവരുടെ ആരോഗ്യനില സംബന്ധിച്ച കൂടുതല്‍ വിവരങ്ങളും പുറത്തുവന്നിട്ടില്ല.
രണ്ട് സ്‌കൂളുകളില്‍ ജാഗ്രതാ നിയന്ത്രണം
സംഭവത്തെത്തുടര്‍ന്ന് മുന്‍കരുതല്‍ നടപടിയായി പ്ലസന്റ് ഗ്രോവ് ഹൈസ്‌കൂളിലും സമീപത്തെ ജൂനിയര്‍ ഹൈസ്‌കൂളിലും താല്‍ക്കാലിക ലോക്ക്ഡൗണ്‍ ഏര്‍പ്പെടുത്തി. സാഹചര്യം നിയന്ത്രണവിധേയമായതോടെ നിയന്ത്രണങ്ങള്‍ പിന്‍വലിച്ചു.
സംഭവം നടക്കുമ്പോഴേക്കും അന്നത്തെ ക്ലാസുകള്‍ കഴിഞ്ഞ് വിദ്യാര്‍ഥികളെ വിട്ടയച്ചിരുന്നതായി എല്‍ക് ഗ്രോവ് യൂണിഫൈഡ് സ്‌കൂള്‍ ഡിസ്ട്രിക്ട് അധികൃതര്‍ വ്യക്തമാക്കി.
മറ്റൊരു കുത്തിക്കൊലക്കേസിലും പ്രതിക്കെതിരെ കുറ്റം
ഇതിനിടെ, കാലിഫോര്‍ണിയയിലെ ഓറഞ്ച് കൗണ്ടിയില്‍ കുടുംബപ്രശ്‌നവുമായി ബന്ധപ്പെട്ട മറ്റൊരു കുത്തിക്കൊലക്കേസില്‍ 34കാരനായ ഇസ്മായേല്‍ പിനെഡലോപസിനെതിരെ കൊലക്കുറ്റം ചുമത്തി.
ഒക്ടോബര്‍ 24ന് ജോലിയില്‍നിന്ന് നേരത്തേ വീട്ടിലെത്തിയ പിനെഡലോപസ്, ഭാര്യയുമായി പങ്കിട്ടിരുന്ന കിടപ്പുമുറിയില്‍ 28കാരനായ നിക്കോളാസ് ഗാര്‍ഷ്യയെ അടിവസ്ത്രം ധരിച്ച നിലയില്‍ കണ്ടെത്തിയെന്നാണ് പ്രോസിക്യൂഷന്റെ ആരോപണം. തുടര്‍ന്ന് പോക്കറ്റ് കത്തി ഉപയോഗിച്ച് ഗാര്‍ഷ്യയെ പലതവണ കുത്തിയെന്നും റിപ്പോര്‍ട്ടുണ്ട്. ഗാര്‍ഷ്യ സംഭവസ്ഥലത്തുവെച്ചുതന്നെ മരിച്ചതായി സ്ഥിരീകരിച്ചു.
പിനെഡലോപസിനെതിരെ ഒരു ഗുരുതര കൊലക്കുറ്റവും ആയുധം ഉപയോഗിച്ചതുമായി ബന്ധപ്പെട്ട അധിക കുറ്റവും ചുമത്തിയിട്ടുണ്ട്. കുറ്റം തെളിഞ്ഞാല്‍ പരമാവധി 26 വര്‍ഷം മുതല്‍ ജീവപര്യന്തം വരെ തടവുശിക്ഷ ലഭിക്കാം.
കാലിഫോര്‍ണിയ സ്‌കൂളില്‍ വിദ്യാര്‍ഥികള്‍ക്ക് കുത്തേറ്റു; രണ്ടുപേര്‍ ആശുപത്രിയില്‍, രണ്ടുപേര്‍ കസ്റ്റഡിയില്‍
