വാഷിംഗ്ടണ്: ഹോര്മുസ് കടലിടുക്ക് തുറന്നും സുരക്ഷിതവുമായി നിലനിര്ത്താന് അമേരിക്കയോടൊപ്പം പല രാജ്യങ്ങളും യുദ്ധക്കപ്പലുകള് അയയ്ക്കുമെന്ന് യു എസ് പ്രസിഡന്റ് ഡൊണാള്ഡ് ട്രംപ് അറിയിച്ചു. എന്നാല് ഏത് രാജ്യങ്ങളാണ് കപ്പലുകള് അയയ്ക്കുന്നതെന്നതിനെക്കുറിച്ച് അദ്ദേഹം വ്യക്തമായ വിവരങ്ങള് നല്കിയിട്ടില്ല.
സോഷ്യല് മീഡിയ പ്ലാറ്റ്ഫോമായ ട്രൂത്ത് സോഷ്യലില് പ്രസിദ്ധീകരിച്ച പോസ്റ്റിലാണ് ട്രംപ് ഈ വിവരം പങ്കുവെച്ചത്. ഇറാന് ഹോര്മുസ് കടലിടുക്ക് അടയ്ക്കാന് ശ്രമിച്ചതിനെ തുടര്ന്ന് ബാധിക്കപ്പെടുന്ന പല രാജ്യങ്ങളും അമേരിക്കയോടൊപ്പം ചേര്ന്ന് കടലിടുക്ക് തുറന്നും സുരക്ഷിതവുമായി നിലനിര്ത്താന് യുദ്ധക്കപ്പലുകള് അയക്കും എന്നാണ് ട്രംപ് കുറിച്ചത്.
ചൈന, ഫ്രാന്സ്, ജപ്പാന്, ദക്ഷിണ കൊറിയ, ബ്രിട്ടന് തുടങ്ങിയ രാജ്യങ്ങള് ഈ ദൗത്യത്തില് പങ്കുചേരുമെന്ന് പ്രതീക്ഷിക്കുന്നതായും അദ്ദേഹം പറഞ്ഞു. അതേസമയം, ഈ രാജ്യങ്ങള് കപ്പലുകള് അയക്കാന് സമ്മതിച്ചിട്ടുണ്ടോയെന്ന കാര്യത്തില് വൈറ്റ് ഹൗസ് ഇതുവരെ ഔദ്യോഗിക സ്ഥിരീകരണം നല്കിയിട്ടില്ല.
ഹോര്മുസ് കടലിടുക്കിലൂടെ ലോകത്തിലെ ഏകദേശം അഞ്ചിലൊന്ന് എണ്ണ കയറ്റുമതിയാണ് സാധാരണയായി കടന്നുപോകുന്നത്. എന്നാല് യു എസ്- ഇസ്രായേല് ആക്രമണങ്ങള്ക്ക് പിന്നാലെ ഇറാനുമായി സംഘര്ഷം ശക്തമായതോടെ ഈ പ്രധാന കടല്പാതയിലെ കപ്പല്ഗതാഗതത്തെ വലിയ തോതില് ബാധിച്ചിട്ടുണ്ട്.
ഇതിനിടെ, കടലിടുക്ക് തുറന്നുവെക്കുന്നതിനായി അമേരിക്ക ശക്തമായ സൈനിക നടപടി തുടരുന്നുണ്ടെന്നും ആവശ്യമായാല് ഇറാന്റെ തീരപ്രദേശങ്ങളിലെ ലക്ഷ്യങ്ങള് ആക്രമിക്കുമെന്നും ട്രംപ് മുന്നറിയിപ്പ് നല്കി.