വാഷിങ്ടൺ: യുഎസ് നീതിന്യായ വകുപ്പിലെ 'പാർഡൻ അറ്റോർണി' എഡ് മാർട്ടിൻ പദവി ഒഴിയുകയാണെന്ന് പ്രസിഡന്റ് ഡോണൾഡ് ട്രംപ്. വരാനിരിക്കുന്ന മിഡ്ടേം തിരഞ്ഞെടുപ്പിലും 2028ലെ പ്രസിഡന്റ് തിരഞ്ഞെടുപ്പിലും നിയമപോരാട്ടം നടത്തുന്നതിനായാണ് മാർട്ടിൻ സർക്കാർ പദവിയിൽനിന്ന് പുറത്തുപോകുന്നതെന്ന് ട്രംപ് സമൂഹമാധ്യമത്തിലൂടെ അറിയിച്ചു. സ്വതന്ത്രവും നീതിയുക്തവും സത്യസന്ധവുമായ തിരഞ്ഞെടുപ്പുകൾ ഉറപ്പാക്കുന്നതിനും ഭരണഘടനാപരമായ അവകാശങ്ങൾ ശക്തമായി സംരക്ഷിക്കുന്നതിനും മാർട്ടിൻ മികച്ച പ്രവർത്തനം നടത്തുമെന്ന് ട്രംപ് പറഞ്ഞു.
2025 ജനുവരി മുതൽ മേയ് വരെയാണ് മാർട്ടിൻ വാഷിങ്ടൺ ഡിസിയിലെ യുഎസ് അറ്റോർണിയായി പ്രവർത്തിച്ചത്. എന്നാൽ സ്ഥിരനിയമനത്തിന് ആവശ്യമായ റിപ്പബ്ലിക്കൻ പിന്തുണ കോൺഗ്രസിൽനിന്ന് ലഭിക്കാതെ വന്നതോടെ താൽക്കാലിക നിയമനം അവസാനിച്ചു. തുടർന്ന് നീതിന്യായ വകുപ്പിൽ വിവിധ ഉന്നത ചുമതലകൾ വഹിച്ച മാർട്ടിൻ പിന്നീട് 'പാർഡൻ അറ്റോർണി' സ്ഥാനത്തെത്തി. പ്രസിഡന്റിന് നൽകുന്ന മാപ്പ്, ശിക്ഷാ ഇളവ് തുടങ്ങിയ വിഷയങ്ങളിൽ ശുപാർശ നൽകുകയായിരുന്നു ചുമതല.
ഈ സ്ഥാനത്തിരിക്കെ മാർട്ടിൻ നിരവധി വിവാദങ്ങളിലും അകപ്പെട്ടു. വാഷിങ്ടൺ ഡിസി ബാറിൽ 2026 ജനുവരിയിൽ അദ്ദേഹത്തിനെതിരെ നൈതികപരാതി ലഭിച്ചിരുന്നു. യുഎസ് അറ്റോർണിയായിരിക്കെ ജോർജ്ടൗൺ സർവകലാശാലയിലെ നിയമവിദ്യാലയത്തിനുള്ള ഫെഡറൽ ഫണ്ട് തടയുമെന്ന് ഭീഷണിപ്പെടുത്തിയെന്നും തനിക്കെതിരായ അന്വേഷണത്തെ സ്വാധീനിക്കാൻ ശ്രമിച്ചെന്നും പരാതിയിൽ ആരോപിച്ചിരുന്നു.
മുൻ പ്രസിഡന്റ് ജോ ബൈഡൻ അധികാരമൊഴിയുന്നതിന് തൊട്ടുമുൻപ് കുടുംബാംഗങ്ങൾക്കും ജീവനക്കാർക്കും നൽകിയ മാപ്പുകളെക്കുറിച്ച് അന്വേഷണം നടത്താൻ തന്റെ പദവി ഉപയോഗിക്കാമെന്നും മാർട്ടിൻ നേരത്തെ വ്യക്തമാക്കിയിരുന്നു. ട്രംപിന്റെ പ്രഖ്യാപനം എക്സിൽ പുനഃപ്രസിദ്ധീകരിച്ച മാർട്ടിൻ 'Proud to serve. Fight Fight Fight' എന്ന കുറിപ്പോടെയാണ് പ്രതികരിച്ചത്.
സർക്കാർ പദവി ഒഴിഞ്ഞ ശേഷം തിരഞ്ഞെടുപ്പ് സംബന്ധമായ നിയമപോരാട്ടങ്ങളിലേക്ക് മാർട്ടിൻ കടക്കുമെന്ന ട്രംപിന്റെ പ്രഖ്യാപനം, വരാനിരിക്കുന്ന യുഎസ് തിരഞ്ഞെടുപ്പുകളിൽ നിയമനടപടികൾക്കും രാഷ്ട്രീയ പോരാട്ടങ്ങൾക്കും കൂടുതൽ പ്രാധാന്യം ലഭിക്കുമെന്ന സൂചനയായാണ് വിലയിരുത്തപ്പെടുന്നത്.
ട്രംപിന്റെ 'പാർഡൻ അറ്റോർണി' എഡ് മാർട്ടിൻ പദവി ഒഴിയുന്നു; തിരഞ്ഞെടുപ്പ് നിയമപോരാട്ടത്തിലേക്ക്
