വാഷിംഗ്ടണ്‍: റഷ്യന്‍ കസ്റ്റഡിയില്‍ കഴിഞ്ഞിരുന്ന അമേരിക്കന്‍ പൗരന്‍ സ്റ്റീഫന്‍ ഹബ്ബാര്‍ഡ് മോചിതനായെന്നും അദ്ദേഹം നാട്ടിലേക്ക് മടങ്ങുകയാണെന്നും അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. റഷ്യന്‍ പ്രസിഡന്റ് വ്‌ളാദിമിര്‍ പുടിനുമായി കഴിഞ്ഞയാഴ്ച നടത്തിയ ഫോണ്‍ സംഭാഷണത്തില്‍ താന്‍ നേരിട്ട് അഭ്യര്‍ഥിച്ചതിനെ തുടര്‍ന്നാണ് മോചനമെന്നും ട്രംപ് അവകാശപ്പെട്ടു. ഹബ്ബാര്‍ഡിന്റെ മോചനത്തിന് പകരമായി അമേരിക്ക ഒന്നും നല്‍കേണ്ടിവന്നിട്ടില്ലെന്നും തടവുകാരുടെ കൈമാറ്റം നടന്നിട്ടില്ലെന്നും അദ്ദേഹം വ്യക്തമാക്കി.
ട്രംപിന്റെ സാമൂഹികമാധ്യമ പ്ലാറ്റ്ഫോമായ ട്രൂത്ത് സോഷ്യലിലൂടെയാണ് പ്രഖ്യാപനം നടത്തിയത്. അമേരിക്കന്‍ പ്രത്യേക ദൂതന്‍ സ്റ്റീവ് വിറ്റ്‌കോഫുമായുള്ള കൂടിക്കാഴ്ചയ്ക്കിടെ ഹബ്ബാര്‍ഡിന്റെ മോചനവിവരം പുടിന് അറിയിച്ചതിനു പിന്നാലെയായിരുന്നു ട്രംപിന്റെ പ്രതികരണം.
74 വയസ്സുള്ള വിരമിച്ച ഇംഗ്ലീഷ് അധ്യാപകനാണ് സ്റ്റീഫന്‍ ഹബ്ബാര്‍ഡ്. യുക്രെയ്നുവേണ്ടി കൂലിപ്പടയാളിയായി പ്രവര്‍ത്തിച്ചെന്ന കുറ്റത്തിന് 2024 ഒക്ടോബറില്‍ റഷ്യന്‍ കോടതി ഇദ്ദേഹത്തെ ഏഴുവര്‍ഷത്തോളം തടവിന് ശിക്ഷിച്ചിരുന്നു. എന്നാല്‍, തനിക്കെതിരായ ആരോപണം ഹബ്ബാര്‍ഡ് നിഷേധിച്ചിട്ടുണ്ട്.
റഷ്യന്‍ അധികൃതര്‍ ഹബ്ബാര്‍ഡിനെ മോചിപ്പിച്ചതായി അറിയിച്ച ട്രംപ്, ജോ ബൈഡന്‍ പ്രസിഡന്റായിരുന്ന കാലത്താണ് നാലുവര്‍ഷം മുമ്പ് ഹബ്ബാര്‍ഡ് റഷ്യയുടെ പിടിയിലായതെന്ന് പറഞ്ഞു. സ്റ്റീഫന്‍ നാട്ടിലേക്ക് മടങ്ങുകയാണെന്നും ഉടന്‍ കുടുംബത്തോടൊപ്പം ചേരുമെന്നും ട്രംപ് കുറിച്ചു.
ഹബ്ബാര്‍ഡിന്റെ മോചനത്തിന് പകരമായി അമേരിക്ക ഒന്നും നല്‍കേണ്ടിവന്നില്ലെന്നും റഷ്യയുമായി ബന്ധപ്പെട്ട ഇത്തരം കേസുകളില്‍ ഇത് അസാധാരണമായ സംഭവമാണെന്നും ട്രംപ് അവകാശപ്പെട്ടു. തടവുകാരെ പരസ്പരം കൈമാറുന്ന നടപടി ആവശ്യമായി വന്നില്ലെന്നും അദ്ദേഹം കൂട്ടിച്ചേര്‍ത്തു.
മുന്‍ പ്രസിഡന്റ് ജോ ബൈഡന്റെ ഭരണകൂടത്തെയും ട്രംപ് വിമര്‍ശിച്ചു. ഹബ്ബാര്‍ഡിന്റെ മോചനം ബൈഡന്റെ ഭരണകാലത്തുതന്നെ സാധ്യമാകേണ്ടതായിരുന്നുവെന്നും ക്രെംലിനുമായുള്ള ചര്‍ച്ചകളില്‍ അന്നത്തെ ഭരണകൂടത്തിന് കാര്യമായ പുരോഗതി കൈവരിക്കാനായില്ലെന്നും ട്രംപ് ആരോപിച്ചു.
റഷ്യയ്‌ക്കെതിരായ ചില ഉപരോധങ്ങളും തീരുവകളും അടുത്തിടെ താത്ക്കാലികമായി നിര്‍ത്തിവച്ച നടപടികളുമായും ഹബ്ബാര്‍ഡിന്റെ മോചനത്തെ ട്രംപ് ബന്ധപ്പെടുത്തി. ഉപരോധങ്ങള്‍ ഏര്‍പ്പെടുത്തിയിരുന്നെങ്കില്‍ ചര്‍ച്ചകള്‍ പൂര്‍ണമായും തടസ്സപ്പെടുമായിരുന്നുവെന്നും അദ്ദേഹം പറഞ്ഞു.
യുക്രെയ്ന്‍ പ്രസിഡന്റ് വൊളോഡിമിര്‍ സെലന്‍സ്‌കിയുമായി ഓസ്ലോയില്‍ നടത്തിയ കൂടിക്കാഴ്ചയുടെ വിവരങ്ങള്‍ പുടിനെ അറിയിക്കുന്നതിനായി ബുധനാഴ്ചയാണ് വിറ്റ്‌കോഫ് റഷ്യന്‍ പ്രസിഡന്റുമായി കൂടിക്കാഴ്ച നടത്തിയത്. സെലന്‍സ്‌കിയുമായുള്ള ചര്‍ച്ചകള്‍ ഫലപ്രദമായിരുന്നുവെന്ന് വിറ്റ്‌കോഫ് വിശേഷിപ്പിച്ചു.
ഹബ്ബാര്‍ഡിന്റെ മോചനത്തില്‍ പുടിന് നന്ദി അറിയിച്ച വിറ്റ്‌കോഫ്, ട്രംപിനും അമേരിക്കന്‍ ജനതയ്ക്കും വേണ്ടി റഷ്യന്‍ പ്രസിഡന്റിനോട് നന്ദി പറയുന്നതായും വ്യക്തമാക്കി. പുടിനെ അദ്ദേഹം 'മനുഷ്യത്വമുള്ള നേതാവ്' എന്നും വിശേഷിപ്പിച്ചു.
ഹബ്ബാര്‍ഡിന്റെ മോചനത്തിലേക്ക് നയിച്ച കൃത്യമായ നയതന്ത്ര നടപടികളെക്കുറിച്ചോ മോചനവുമായി ബന്ധപ്പെട്ട ഔദ്യോഗിക ധാരണകളെക്കുറിച്ചോ കൂടുതല്‍ വിവരങ്ങള്‍ പുറത്തുവന്നിട്ടില്ല.