വാഷിംഗ്ടണ്‍: അമേരിക്കയിലെ തൊഴില്‍ വിപണിയില്‍ വളര്‍ച്ചയുടെ വേഗം കുറഞ്ഞു. കഴിഞ്ഞ മാസം തൊഴിലുടമകള്‍ 29,000 പുതിയ തൊഴിലവസരങ്ങള്‍ മാത്രമാണ് സൃഷ്ടിച്ചത്. തൊഴിലില്ലായ്മ നിരക്ക് 4.2 ശതമാനമായി ഉയര്‍ന്നതായും വെള്ളിയാഴ്ച പുറത്തുവിട്ട ഫെഡറല്‍ കണക്കുകള്‍ വ്യക്തമാക്കുന്നു.
സമീപ മാസങ്ങളില്‍ പ്രതീക്ഷിച്ചതിലും ശക്തമായ നിലയിലായിരുന്ന തൊഴില്‍ വിപണിയില്‍ വളര്‍ച്ച കുത്തനെ മന്ദഗതിയിലായതിന്റെ സൂചനയാണ് പുതിയ കണക്കുകള്‍ നല്‍കുന്നത്.
ഇറാന്‍ യുദ്ധം ആരംഭിച്ചതിന് പിന്നാലെ പണപ്പെരുപ്പം ഉയര്‍ന്നതോടെ ജീവിതച്ചെലവ് വര്‍ധിച്ച സാഹചര്യത്തിലാണ് തൊഴില്‍ വിപണിയിലെ ഈ പ്രകടനം. ഭൂരിഭാഗം തൊഴിലാളികള്‍ക്കും വേതന വര്‍ധന വിലക്കയറ്റത്തിനൊപ്പമെത്തിയിട്ടില്ല. സെപ്റ്റംബറില്‍ ശരാശരി മണിക്കൂര്‍ വേതനത്തിലെ വാര്‍ഷിക വളര്‍ച്ച 3 ശതമാനമായി കുറഞ്ഞു. നിലവിലെ പണപ്പെരുപ്പ നിരക്കിനേക്കാള്‍ വളരെ താഴെയാണിത്.
നിര്‍മാണ മേഖലയില്‍ തൊഴില്‍ വര്‍ധന
നിര്‍മാണ മേഖലയില്‍ തൊഴില്‍ വളര്‍ച്ച തുടര്‍ന്നു. സെപ്റ്റംബറില്‍ മേഖലയില്‍ 9,000 തൊഴിലവസരങ്ങള്‍ വര്‍ധിച്ചു. ഈ വര്‍ഷം ഇതുവരെ നിര്‍മാണ മേഖലയില്‍ 72,000 തൊഴിലവസരങ്ങളാണ് കൂട്ടിച്ചേര്‍ത്തത്.
അതേസമയം, ആഫ്രിക്കന്‍- അമേരിക്കന്‍ വിഭാഗത്തിലെ തൊഴിലില്ലായ്മ നിരക്ക് സെപ്റ്റംബറില്‍ ഒരു ശതമാനം പോയിന്റ് ഉയര്‍ന്ന് 7 ശതമാനമായി. വെള്ളക്കാരുടെ തൊഴിലില്ലായ്മ നിരക്ക് 3.6 ശതമാനമായിരുന്നു.
ഓരോ മാസവും വിവിധ ജനവിഭാഗങ്ങളിലെ തൊഴിലില്ലായ്മ കണക്കുകളില്‍ വലിയ മാറ്റങ്ങള്‍ ഉണ്ടാകാറുള്ളതിനാല്‍ ഒറ്റ മാസത്തെ വര്‍ധനയെ മാത്രം അടിസ്ഥാനമാക്കി ദീര്‍ഘകാല പ്രവണത വിലയിരുത്താനാകില്ല. എന്നാല്‍, താരതമ്യേന ശക്തമായ തൊഴില്‍ വിപണിയുടെ നേട്ടം എല്ലാ വിഭാഗങ്ങള്‍ക്കും ഒരുപോലെ ലഭിക്കുന്നില്ലെന്നതിലേക്കാണ് കണക്കുകള്‍ വിരല്‍ചൂണ്ടുന്നത്.
25- 54 പ്രായക്കാരില്‍ തൊഴില്‍നിരക്ക് ഉയര്‍ന്നു
റിപ്പോര്‍ട്ടിലെ ആശ്വാസകരമായൊരു കണക്ക് 25 മുതല്‍ 54 വയസ്സുവരെയുള്ള പ്രധാന തൊഴില്‍പ്രായ വിഭാഗത്തിലെ തൊഴില്‍നിരക്ക് സെപ്റ്റംബറില്‍ ഉയര്‍ന്നതാണ്.
തൊഴില്‍ വിപണിയുടെ മൊത്തത്തിലുള്ള ആരോഗ്യനില വിലയിരുത്തുന്നതിനുള്ള പ്രധാന സൂചികകളിലൊന്നായി പല സാമ്പത്തിക വിദഗ്ധരും കാണുന്ന ഈ നിരക്ക് വേനല്‍ക്കാലത്ത് അപ്രതീക്ഷിതമായി കുറഞ്ഞിരുന്നു. സെപ്റ്റംബറിലെ വര്‍ധന അതിനാല്‍ പ്രതീക്ഷ നല്‍കുന്നതാണെന്നാണ് വിലയിരുത്തല്‍.
ആരോഗ്യ മേഖലയില്‍ തൊഴില്‍ സൃഷ്ടി കുറഞ്ഞു
ആരോഗ്യപരിചരണ മേഖലയാണ് ഇപ്പോഴും തൊഴില്‍ വളര്‍ച്ചയ്ക്ക് പ്രധാന സംഭാവന നല്‍കുന്നത്. എന്നാല്‍ സെപ്റ്റംബറിലെ വളര്‍ച്ച താരതമ്യേന ദുര്‍ബലമായിരുന്നു. മേഖലയില്‍ കഴിഞ്ഞ മാസം 17,000 തൊഴിലവസരങ്ങള്‍ വര്‍ധിച്ചു. കഴിഞ്ഞ 12 മാസത്തെ പ്രതിമാസ ശരാശരിയായ 33,000 തൊഴിലവസരങ്ങളേക്കാള്‍ ഇത് ഗണ്യമായി കുറവാണ്.
എഐയുമായി ബന്ധപ്പെട്ട മേഖലകളില്‍ തൊഴില്‍ നഷ്ടം
നിര്‍മിത ബുദ്ധി (എ ഐ) സാങ്കേതികവിദ്യയുടെ സ്വാധീനത്തിന് കൂടുതല്‍ വിധേയമായ ചില മേഖലകളില്‍ സെപ്റ്റംബറില്‍ തൊഴിലവസരങ്ങള്‍ കുറഞ്ഞു.
വിവരസാങ്കേതിക മേഖലയോട് ബന്ധപ്പെട്ട ഇന്‍ഫര്‍മേഷന്‍ ഇന്‍ഡസ്ട്രിയില്‍ 10,000 തൊഴിലവസരങ്ങള്‍ കുറഞ്ഞു. ഫിനാന്‍ഷ്യല്‍ ആക്ടിവിറ്റീസ് മേഖലയില്‍ 7,000 തൊഴിലവസരങ്ങളും പ്രൊഫഷണല്‍, ബിസിനസ് സര്‍വീസ് മേഖലയില്‍ 9,000 തൊഴിലവസരങ്ങളും നഷ്ടപ്പെട്ടു.
ഈ തൊഴില്‍ നഷ്ടങ്ങള്‍ക്ക് എത്രത്തോളം എ ഐ സാങ്കേതികവിദ്യ കാരണമാകുന്നുവെന്ന് ഇപ്പോഴും വ്യക്തമായിട്ടില്ല. എന്നാല്‍ പുതിയ കണക്കുകള്‍ സാങ്കേതികവിദ്യയുടെ തൊഴില്‍ വിപണിയിലുള്ള സ്വാധീനത്തെക്കുറിച്ചുള്ള ചില സൂചനകള്‍ നല്‍കുന്നതായി വിലയിരുത്തപ്പെടുന്നു.