വാഷിംഗ്ടണ്‍: ഇല്ലിനോയി സംസ്ഥാനത്തെ അറോറയിലുള്ള ഹിന്ദു ക്ഷേത്രത്തിനു നേരെ ആക്രമണം നടത്താന്‍ ഗൂഢാലോചന നടത്തിയെന്ന ആരോപണം വിദ്വേഷ കുറ്റകൃത്യത്തിന്റെ സാധ്യത കൂടി പരിഗണിച്ച് അന്വേഷിക്കണമെന്ന് ഇന്ത്യന്‍ വംശജനായ അമേരിക്കന്‍ കോണ്‍ഗ്രസ് അംഗം രാജാ കൃഷ്ണമൂര്‍ത്തി എഫ് ബി ഐയോട് ആവശ്യപ്പെട്ടു. ശ്രീ വെങ്കിടേശ്വര സ്വാമി (ബാലാജി) ഹിന്ദു ക്ഷേത്രത്തില്‍ ഒക്ടോബര്‍ 11-ന് നടന്ന സംഭവത്തില്‍ സമഗ്രമായ ഫെഡറല്‍ അന്വേഷണം വേണമെന്നാവശ്യപ്പെട്ട് 105 കോണ്‍ഗ്രസ് അംഗങ്ങളുടെ പിന്തുണയോടെ എഫ് ബി ഐ ഡയറക്ടര്‍ കാഷ് പട്ടേലിന് അദ്ദേഹം കത്തയച്ചു.
സംഭവം നടക്കുമ്പോള്‍ കൃഷ്ണമൂര്‍ത്തിയും കുടുംബവും ക്ഷേത്രത്തില്‍ പ്രാര്‍ഥനയ്‌ക്കെത്തിയിരുന്നു. ഇന്ത്യന്‍ അമേരിക്കക്കാര്‍ക്കും മറ്റ് ദക്ഷിണേഷ്യന്‍ വംശജര്‍ക്കുമെതിരെ ഓണ്‍ലൈനിലൂടെ ഉയരുന്ന ഭീഷണികള്‍ നേരിടാന്‍ ഫെഡറല്‍ ഏജന്‍സികള്‍ സ്വീകരിക്കുന്ന നടപടികളെക്കുറിച്ചും കത്തില്‍ വിശദീകരണം തേടിയിട്ടുണ്ട്.
ഇല്ലിനോയിയില്‍ നിന്നുള്ള മുഴുവന്‍ ഡെമോക്രാറ്റിക് ജനപ്രതിനിധികളും ഇന്ത്യന്‍ വംശജരായ എല്ലാ കോണ്‍ഗ്രസ് അംഗങ്ങളും സെനറ്റര്‍മാരായ ഡിക്ക് ഡര്‍ബിന്‍, ടാമി ഡക്ക്‌വര്‍ത്ത്, ആന്‍ഡി കിം, ക്രിസ് വാന്‍ ഹോളന്‍ എന്നിവരും കത്തില്‍ ഒപ്പുവച്ചിട്ടുണ്ട്.
പ്രോസിക്യൂട്ടര്‍മാരുടെ ആരോപണമനുസരിച്ച്, സ്വയം നവനാസിയെന്ന് വിശേഷിപ്പിച്ചിട്ടുള്ള 19-കാരനായ അലക്‌സാന്‍ഡ്രോസ് പാപൊറാക്കിസ് ക്ഷേത്രത്തിനു പുറത്ത് ഒരാള്‍ക്കുനേരെ വെടിയുതിര്‍ക്കാന്‍ ശ്രമിച്ചെങ്കിലും തോക്ക് പ്രവര്‍ത്തിച്ചില്ല. തുടര്‍ന്ന് ഇയാള്‍ സംഭവസ്ഥലത്തുനിന്ന് രക്ഷപ്പെടുകയായിരുന്നു. പിന്നീട് തിരിച്ചെത്തി ആക്രമണം നടത്താനുള്ള പദ്ധതികളെക്കുറിച്ച് ഇയാള്‍ ആശയവിനിമയം നടത്തിയതോടെ സഹപ്രവര്‍ത്തകന്‍ പൊലീസിനെ വിവരമറിയിക്കുകയും അന്നുതന്നെ അധികൃതര്‍ ഇയാളെ അറസ്റ്റ് ചെയ്യുകയുമായിരുന്നു.
ഇന്ത്യന്‍ വംശജര്‍ക്കെതിരെ ഹിന്ദു ആരാധനാലയത്തില്‍ അക്രമം നടത്തണമെന്ന് ആഹ്വാനം ചെയ്യുന്ന എട്ടു പേജുള്ള വംശീയവാദ രേഖ ഇയാള്‍ തയ്യാറാക്കിയിരുന്നുവെന്നാണ് പ്രോസിക്യൂട്ടര്‍മാരുടെ ആരോപണം. പ്രതിയില്‍നിന്ന് റൈഫിള്‍, നൂറുകണക്കിന് വെടിയുണ്ടകള്‍, ശരീരസംരക്ഷണ കവചം, വെള്ളക്കാരുടെ വംശീയ മേധാവിത്വത്തെ പിന്തുണയ്ക്കുന്ന ചിത്രങ്ങള്‍ എന്നിവ അന്വേഷണ ഉദ്യോഗസ്ഥര്‍ കണ്ടെത്തിയതായി കോണ്‍ഗ്രസ് അംഗങ്ങളുടെ കത്തില്‍ പറയുന്നു.
വംശീയ വിദ്വേഷം ലക്ഷ്യമിട്ടുള്ള ആക്രമണശ്രമം, മതപരമായ ആരാധനാലയം, കൂട്ടക്കൊലയ്ക്കുള്ള ഒരുക്കങ്ങള്‍ എന്നിവ ഒരുമിച്ചുവരുന്ന സാഹചര്യം സമഗ്രമായ ഫെഡറല്‍ ഇടപെടല്‍ ആവശ്യപ്പെടുന്നുവെന്ന് കത്തില്‍ പറയുന്നു. വിദ്വേഷ കുറ്റകൃത്യങ്ങളുമായി ബന്ധപ്പെട്ട നിയമലംഘനങ്ങളുടെ സാധ്യത അന്വേഷണത്തില്‍ വ്യക്തമായി പരിഗണിക്കണമെന്നും അവര്‍ ആവശ്യപ്പെട്ടു.
ക്ഷേത്രത്തിലെ ആക്രമണശ്രമം ഫെഡറല്‍ വിദ്വേഷ കുറ്റകൃത്യമായി എഫ് ബി ഐ അന്വേഷിക്കുന്നുണ്ടോ എന്നതാണ് കത്തിലെ പ്രധാന ചോദ്യം. വംശം, വംശീയ പശ്ചാത്തലം, മതം എന്നിവ അടിസ്ഥാനമാക്കിയുള്ള വിദ്വേഷമാണോ സംഭവത്തിനു പിന്നിലെന്നും അന്വേഷിക്കുന്നുണ്ടോ എന്ന് വ്യക്തമാക്കണമെന്നും ആവശ്യപ്പെട്ടു.
അമേരിക്കന്‍ നീതിന്യായ വകുപ്പിന്റെ പൗരാവകാശ വിഭാഗവുമായും ബന്ധപ്പെട്ട യു എസ് അറ്റോര്‍ണി ഓഫീസുമായും അന്വേഷണത്തില്‍ ഏര്‍പ്പെടുത്തിയിട്ടുള്ള ഏകോപനത്തെക്കുറിച്ചും വിശദീകരണം തേടിയിട്ടുണ്ട്.
അമേരിക്കയില്‍ ദക്ഷിണേഷ്യന്‍ വംശജര്‍ക്കെതിരെ ഓണ്‍ലൈനില്‍ വര്‍ധിച്ചുവരുന്ന വിദ്വേഷപ്രചാരണങ്ങളെക്കുറിച്ചുള്ള ആശങ്കകള്‍ക്കിടയിലാണ് കത്ത്. 2025 ജനുവരി മുതല്‍ 2026 ജൂണ്‍ വരെ എക്‌സില്‍ ദക്ഷിണേഷ്യന്‍ സമൂഹങ്ങളെ ലക്ഷ്യമിട്ട് 5.42 ലക്ഷത്തിലധികം വിദ്വേഷ പോസ്റ്റുകള്‍ വന്നതായി 2026 സെപ്റ്റംബറിലെ ഒരു റിപ്പോര്‍ട്ട് ചൂണ്ടിക്കാട്ടിയതായി കത്തില്‍ പറയുന്നു. 2024 ജനുവരി മുതല്‍ 2026 ജൂണ്‍ വരെയുള്ള കാലയളവില്‍ ഇത്തരം പോസ്റ്റുകളുടെ പ്രതിമാസ എണ്ണം ഏകദേശം 240 ശതമാനം വര്‍ധിച്ചതായും കത്തില്‍ പരാമര്‍ശിക്കുന്നു.
കാര്‍ണഗി എന്‍ഡോവ്മെന്റ് നടത്തിയ സര്‍വേയില്‍ പങ്കെടുത്ത ഇന്ത്യന്‍ അമേരിക്കക്കാരില്‍ 48 ശതമാനം പേര്‍ 2025-ന്റെ തുടക്കം മുതല്‍ തങ്ങളുടെ സമൂഹത്തെ ലക്ഷ്യമിട്ടുള്ള വംശീയ അധിക്ഷേപ പോസ്റ്റുകള്‍ പലപ്പോഴായി കണ്ടിട്ടുണ്ടെന്ന് വ്യക്തമാക്കിയതായി കത്തില്‍ പറയുന്നു. സര്‍വേയില്‍ പങ്കെടുത്ത നാലില്‍ ഒരാള്‍ വംശീയ അധിക്ഷേപവാക്കുകള്‍ നേരിട്ടതായും അറിയിച്ചു.
ട്രംപ് ഭരണകൂടത്തിനു കീഴിലുള്ള ചില സര്‍ക്കാര്‍ ഏജന്‍സികള്‍ സാമൂഹിക മാധ്യമങ്ങളില്‍ പങ്കുവച്ച സന്ദേശങ്ങള്‍ വംശീയവും മതപരവുമായ മുന്‍വിധികള്‍ ശക്തിപ്പെടുത്താന്‍ ഇടയാക്കുന്നതായി കോണ്‍ഗ്രസ് അംഗങ്ങള്‍ വിമര്‍ശിച്ചു.
സിഖ് വംശജനായ ഒരാളുടെ ചിത്രം ഉള്‍പ്പെടുത്തി യു എസ് ആഭ്യന്തര സുരക്ഷാ വകുപ്പ് പങ്കുവച്ച പോസ്റ്റും അവര്‍ ചൂണ്ടിക്കാട്ടി. 'ഞങ്ങളുടെ റോഡുകളില്‍നിന്ന് ഒഴിഞ്ഞുപോകൂ, മിസ്റ്റര്‍ സിങ്, നിങ്ങള്‍ക്ക് വാഹനമോടിക്കാന്‍ അറിയില്ല' എന്നായിരുന്നു പോസ്റ്റിലെ സന്ദേശം.
ടെക്‌സസിലെ റിപ്പബ്ലിക്കന്‍ നേതാവ് ടെക്‌സസ് സര്‍വകലാശാലയുടെ ഫുട്‌ബോള്‍ മത്സരം കാണാന്‍ ദക്ഷിണേഷ്യന്‍ വംശജര്‍ എത്തിയതിനെ വിമര്‍ശിച്ചതിനു പിന്നാലെ വിദ്യാഭ്യാസ വകുപ്പ് 'മേക്ക് കോളജ് ഫുട്‌ബോള്‍ ഗ്രേറ്റ് എഗെയ്ന്‍' എന്ന സന്ദേശം പങ്കുവച്ചതും കത്തില്‍ പരാമര്‍ശിച്ചിട്ടുണ്ട്.
ഇത്തരം സന്ദേശങ്ങള്‍ വംശീയവും മതപരവുമായ മുന്‍വിധികള്‍ക്ക് സര്‍ക്കാര്‍തലത്തില്‍ അംഗീകാരം ലഭിക്കുന്നുവെന്ന പ്രതീതി സൃഷ്ടിക്കുമെന്ന് തങ്ങള്‍ ആശങ്കപ്പെടുന്നുവെന്ന് കോണ്‍ഗ്രസ് അംഗങ്ങള്‍ കത്തില്‍ വ്യക്തമാക്കി.
കുടിയേറ്റത്തെയും പൊതുസുരക്ഷയെയും കുറിച്ചുള്ള ചര്‍ച്ചകള്‍ ഇന്ത്യന്‍, സിഖ്, ഹിന്ദു, മറ്റ് ദക്ഷിണേഷ്യന്‍ സമൂഹങ്ങളെ ഒന്നടങ്കം സംശയത്തോടെ കാണുന്നതിനുള്ള ന്യായീകരണമാകരുതെന്നും അവര്‍ കൂട്ടിച്ചേര്‍ത്തു.
ആക്രമണശ്രമവുമായി ബന്ധപ്പെട്ട് ഓണ്‍ലൈന്‍ പ്ലാറ്റ്ഫോമുകള്‍ക്കോ മറ്റ് വ്യക്തികള്‍ക്കോ പങ്കുണ്ടോയെന്നും എഫ് ബി ഐ പരിശോധിക്കുന്നുണ്ടോ എന്ന് കത്തില്‍ ചോദിക്കുന്നു. ഭീഷണികള്‍ കൈമാറുന്നതിനോ ലക്ഷ്യമിടേണ്ടവരെ കണ്ടെത്തുന്നതിനോ സഹായം ലഭ്യമാക്കുന്നതിനോ ആക്രമണം ഏകോപിപ്പിക്കുന്നതിനോ ആരെങ്കിലും ഇടപെട്ടിട്ടുണ്ടോയെന്നും അന്വേഷിക്കണമെന്നാണ് ആവശ്യം.
ദക്ഷിണേഷ്യന്‍ സമൂഹങ്ങള്‍ക്കെതിരായ വിശ്വസനീയമായ ഓണ്‍ലൈന്‍ ഭീഷണികള്‍ കണ്ടെത്തുമ്പോള്‍ ഭരണഘടനയുടെ ഒന്നാം ഭേദഗതി ഉറപ്പുനല്‍കുന്ന അഭിപ്രായസ്വാതന്ത്ര്യം സംരക്ഷിക്കാന്‍ എഫ് ബി ഐ സ്വീകരിക്കുന്ന നടപടികളെക്കുറിച്ചും വിശദീകരണം തേടിയിട്ടുണ്ട്.
ഭീഷണികളുമായി ബന്ധപ്പെട്ട വിവരങ്ങള്‍ സംസ്ഥാന- പ്രാദേശിക നിയമപാലക ഏജന്‍സികള്‍ക്കും ഭീഷണി നേരിടാന്‍ സാധ്യതയുള്ള ആരാധനാലയങ്ങള്‍ക്കും കൈമാറുന്ന രീതിയും ബാധിക്കപ്പെട്ട സമൂഹങ്ങള്‍ക്ക് നല്‍കുന്ന സുരക്ഷാ സഹായങ്ങളും വിശദീകരിക്കണമെന്നും ആവശ്യപ്പെട്ടു.
ഇന്ത്യന്‍ വിരുദ്ധ, ഹിന്ദു വിരുദ്ധ, വിശാലമായ ദക്ഷിണേഷ്യന്‍ വിരുദ്ധ വിദ്വേഷം ഉള്‍പ്പെട്ട ഭീഷണികള്‍ അന്വേഷിക്കാന്‍ ആവശ്യമായ ഉദ്യോഗസ്ഥരും ഭാഷാപരമായ വൈദഗ്ധ്യവും വിശകലനശേഷിയും എഫ് ബി ഐക്കുണ്ടോ എന്നും കൂടുതല്‍ വിഭവങ്ങള്‍ ആവശ്യമാണോ എന്നും കോണ്‍ഗ്രസ് അംഗങ്ങള്‍ ചോദിച്ചു.
നിലവിലുള്ള അന്വേഷണത്തെ ബാധിക്കാത്ത പരിധിയില്‍ ഒക്ടോബര്‍ 29-നകം രേഖാമൂലം മറുപടി നല്‍കണമെന്നും അവര്‍ ആവശ്യപ്പെട്ടു.
വംശപരമ്പരയുടെയോ രൂപത്തിന്റെയോ മതവിശ്വാസത്തിന്റെയോ പേരില്‍ ആരും ലക്ഷ്യമിടപ്പെടുമെന്ന ഭയത്തില്‍ കഴിയേണ്ടതില്ലെന്നും ആരാധനയ്ക്കായി ഒത്തുചേരുന്നത് തങ്ങളെ കൂട്ടക്കൊലയുടെ ലക്ഷ്യങ്ങളാക്കുമോയെന്ന് ഒരു മതസമൂഹവും ആശങ്കപ്പെടേണ്ട സാഹചര്യമുണ്ടാകരുതെന്നും കത്തില്‍ പറയുന്നു.
സംഭവവുമായി ബന്ധപ്പെട്ട എല്ലാ തെളിവുകളും വിശദമായി പരിശോധിക്കണമെന്നും ബാധകമായ എല്ലാ നിയമങ്ങള്‍ പ്രകാരവും നടപടിയെടുക്കണമെന്നും ബാധിക്കപ്പെട്ട സമൂഹങ്ങളുടെ സുരക്ഷയ്ക്കായി സ്വീകരിക്കുന്ന നടപടികള്‍ വ്യക്തമാക്കണമെന്നും കോണ്‍ഗ്രസ് അംഗങ്ങള്‍ എഫ് ബി ഐയോട് ആവശ്യപ്പെട്ടു.