ഷിക്കാഗോ: അമേരിക്കയുടെ മിഡ്‌വെസ്റ്റ് സംസ്ഥാനങ്ങളെ മൂടിയ കനത്ത മഞ്ഞുവീഴ്ച യാത്രാസൗകര്യങ്ങളെ പൂര്‍ണ്ണമായി തകര്‍ത്തു. താങ്ക്‌സ്ഗിവിങ്ങിന് ശേഷമുള്ള തിരക്കേറിയ യാത്രാദിവസത്തില്‍ രാജ്യത്ത് 1,400ല്‍പ്പരം വിമാനങ്ങള്‍ റദ്ദാക്കുകയും നൂറുകണക്കിന് സര്‍വീസുകള്‍ വൈകുകയും ചെയ്തു.
ഏറ്റവും വലിയ തിരിച്ചടിയേറ്റത് ഷിക്കാഗോ ഒ'ഹെയര്‍ ഇന്റര്‍നാഷണല്‍ എയര്‍പോര്‍ട്ടിനാണ്. ശനിയാഴ്ച ഉച്ചവരെ 930ത്തിലധികം റദ്ദാക്കലുകളും 750ത്തിലധികം വൈകലുകളുമാണ് ഇവിടെ രേഖപ്പെടുത്തിയത്. മഞ്ഞും ഐസും കാരണം പുറപ്പെടുന്ന വിമാനങ്ങള്‍ക്ക് ശരാശരി അഞ്ച് മണിക്കൂറിലധികമാണ് താമസം. ഷിക്കാഗോ മിഡ്‌വേ എയര്‍പോര്‍ട്ടിലും 187 റദ്ദാക്കലുകളും 85 വൈകലുകളും ഉണ്ടായി. ഇരു വിമാനത്താവളങ്ങള്‍ക്കും ഗ്രൗണ്ട് സ്‌റ്റോപ്പ് ഉത്തരവും പുറപ്പെടുവിച്ചിരുന്നു.
ഇന്ത്യാനയിലെ പുത്‌നംവില്ലില്‍ ഇന്റര്‍സ്‌റ്റേറ്റ്-70 ല്‍ നടന്ന ഭീമമായ കൂട്ടിയിടിയില്‍ 45 വാഹനങ്ങള്‍ പെട്ടു. ഭാഗ്യവശാല്‍ വലിയ പരിക്കുകള്‍ റിപ്പോര്‍ട്ട് ചെയ്തിട്ടില്ലെന്ന് സ്‌റ്റേറ്റ് പൊലിസ് അറിയിച്ചു.
മഞ്ഞുമഴ മുന്നറിയിപ്പുകള്‍ക്കിടയില്‍ ഐവായില്‍ നിന്ന് സൗത്ത് വിസ്‌കോണ്‍സിനിലേക്കും നോര്‍തേണ്‍ ഇല്ലിനോയ് , ഇന്ത്യാന, വെസ്റ്റ് മിഷിഗണ്‍ ഭാഗങ്ങളിലേക്കും അര അടി വരെ മഞ്ഞുവീഴ്ച സാധ്യതയുണ്ട്. ശക്തമായ കാറ്റും കനത്ത മഞ്ഞും ചേര്‍ന്നപ്പോള്‍ വൈറ്റ്ഔട്ട് സാഹചര്യങ്ങളും അതിവിശേഷമായ യാത്രാപ്രതിസന്ധികളും പ്രതീക്ഷിക്കാം.
മഞ്ഞുപെയ്ത്തിന് പിന്നാലെ തണുപ്പ് കൂടുതല്‍ അനുഭവപ്പെടാമെന്നാണ് കാലാവസ്ഥാ നിരീക്ഷണം. ഉത്തര അമേരിക്കയില്‍ താപനില സാധാരണ ഡിസംബര്‍ തുടക്കത്തേക്കാള്‍ 10-20 ഡിഗ്രി വരെ താഴെയായേക്കും.
അടുത്ത ആഴ്ച മറ്റൊരു ശക്തമായ മഞ്ഞുപെയ്ത്ത് എത്താനുണ്ടെന്ന മുന്നറിയിപ്പും കാലാവസ്ഥാ വിദഗ്ധര്‍ നല്‍കി.
മിഡ്‌വെസ്റ്റില്‍ കനത്ത മഞ്ഞ്: 1,400ല്‍പ്പരം വിമാനങ്ങള്‍ റദ്ദാക്കി; ഇന്ത്യാന ഹൈവേയില്‍ 45 കാറുകള്‍ കൂട്ടിയിടിച്ചു
