വാഷിംഗ്ടണ്‍: പ്രമുഖ ചിപ്പ് നിര്‍മാതാക്കളായ എന്‍വിഡിയയുടെ സഹസ്ഥാപകനും സി ഇ ഒയുമായ ജെന്‍സന്‍ ഹുവാങ്ങിനെതിരെ സ്വതന്ത്ര അന്വേഷണം നടത്താന്‍ അമേരിക്കയിലെ പ്രമുഖ നിയമസ്ഥാപനത്തെ ചുമതലപ്പെടുത്തി കമ്പനി. ചൈനീസ് രഹസ്യാന്വേഷണ വിഭാഗവുമായി ബന്ധമുണ്ടെന്ന് അമേരിക്കന്‍ അധികൃതര്‍ ആരോപിക്കുന്ന ഒരു ബിസിനസ് എക്‌സിക്യൂട്ടീവുമായി വിവാഹേതര ബന്ധമുണ്ടായിരുന്നുവെന്ന് ഹുവാങ് സമ്മതിച്ചതിനെത്തുടര്‍ന്നാണ് നടപടി.
കോര്‍പ്പറേറ്റ് നിയമരംഗത്ത് പ്രമുഖ സ്ഥാനമുള്ള വാച്ച്ടെല്‍, ലിപ്റ്റണ്‍, റോസന്‍ ആന്‍ഡ് കാറ്റ്‌സ് എന്ന നിയമസ്ഥാപനത്തിനാണ് അന്വേഷണച്ചുമതല. ന്യൂയോര്‍ക്ക് ടൈംസാണ് ഇക്കാര്യം റിപ്പോര്‍ട്ട് ചെയ്തത്. സ്ഥാപനത്തിലെ അഭിഭാഷകനും ന്യൂയോര്‍ക്കിലെ മുന്‍ ഫെഡറല്‍ പ്രോസിക്യൂട്ടറുമായ ജൂണ്‍ കിമ്മിന്റെ നേതൃത്വത്തിലായിരിക്കും അന്വേഷണം. എഫ് ബി ഐയും വിഷയത്തില്‍ സമാന്തര അന്വേഷണം നടത്തുന്നുണ്ട്.
വിവാഹബന്ധത്തിന് പുറത്തൊരു പ്രണയബന്ധമുണ്ടായിരുന്നുവെന്ന് ജെന്‍സന്‍ ഹുവാങ് സമ്മതിച്ചതായാണ് റിപ്പോര്‍ട്ട്. ആലീസ് ഹുവാങ് എന്നറിയപ്പെടുന്ന യുവതിയാണ് ബന്ധത്തിലെ മറ്റൊരു വ്യക്തി. ഇവര്‍ ചൈനീസ് രഹസ്യാന്വേഷണ ഏജന്‍സിയുടെ പ്രവര്‍ത്തകയാണെന്നാണ് അമേരിക്കന്‍ അധികൃതരുടെ ആരോപണം. ഹുവാങ്ങുമായി കുടുംബബന്ധമില്ലാത്ത ഇവര്‍ ഹുവാങ് ലെ എന്ന പേരിലും അറിയപ്പെടുന്നു.
വഞ്ചന ഉള്‍പ്പെടെയുള്ള സാമ്പത്തിക കുറ്റകൃത്യങ്ങളുമായി ബന്ധപ്പെട്ട അന്വേഷണങ്ങളില്‍ വര്‍ഷങ്ങളോളം പ്രവര്‍ത്തിച്ചിട്ടുള്ള വ്യക്തിയാണ് ജൂണ്‍ കിം. കമ്പനിയുടെ അന്വേഷണത്തിന് പുറമെ എഫ് ബി ഐ നടത്തുന്ന അന്വേഷണവും പുരോഗമിക്കുകയാണ്.
നിര്‍മിത ബുദ്ധി രംഗത്തെ ആഗോള കുതിപ്പിന് പിന്നിലെ ഏറ്റവും നിര്‍ണായക കമ്പനികളിലൊന്നാണ് എന്‍വിഡിയ. എ ഐ ഉപകരണങ്ങളില്‍ വ്യാപകമായി ഉപയോഗിക്കുന്ന അത്യാധുനിക ചിപ്പുകളുടെ നിര്‍മാണത്തില്‍ കമ്പനിക്കുള്ള ആധിപത്യം അമേരിക്കയുടെ ദേശീയ സുരക്ഷയുമായും ബന്ധപ്പെട്ടിരിക്കുന്നു. എ ഐ സാങ്കേതികവിദ്യയിലെ ആഗോള മത്സരത്തില്‍ മുന്നിലെത്താനുള്ള അമേരിക്കയുടെ ശ്രമങ്ങളില്‍ എന്‍വിഡിയയ്ക്ക് നിര്‍ണായക സ്ഥാനമാണുള്ളത്.
അതേസമയം, വിവാദം പുറത്തുവന്നതിനു പിന്നാലെ കമ്പനിയുടെ ഓഹരിമൂല്യത്തില്‍ വന്‍ ഇടിവുണ്ടായതായും റിപ്പോര്‍ട്ടുകളുണ്ട്. വെള്ളിയാഴ്ച മുതല്‍ ഏകദേശം 500 ബില്യണ്‍ ഡോളറിന്റെ വിപണിമൂല്യം നഷ്ടപ്പെട്ടതോടെ ഓഹരിവില ഒരു വര്‍ഷത്തെ ഏറ്റവും താഴ്ന്ന നിലയിലേക്ക് എത്തിയതായാണ് റിപ്പോര്‍ട്ട്.
എന്‍വിഡിയയുടെ ഉപഭോക്താക്കളിലൊന്നായ സിംഗപ്പൂര്‍ ആസ്ഥാനമായ മെഗാസ്പീഡ് കമ്പനിയില്‍ ആലീസ് ഹുവാങ് ഉന്നത പദവിയില്‍ പ്രവര്‍ത്തിച്ചിരുന്നു. എന്‍വിഡിയയുടെ ചിപ്പുകള്‍ ചൈനയിലേക്ക് വഴിതിരിച്ചുവിടാന്‍ മെഗാസ്പീഡ് സഹായിച്ചിട്ടുണ്ടെന്ന സംശയം നേരത്തെ ഉയര്‍ന്നിരുന്നു. എന്നാല്‍, മെഗാസ്പീഡ് ദേശീയ സുരക്ഷയുമായി ബന്ധപ്പെട്ട ആശങ്കകള്‍ക്ക് കാരണമാകുന്ന സ്ഥാപനമാണെന്ന് അമേരിക്കന്‍ സര്‍ക്കാര്‍ തങ്ങളെ അറിയിച്ചിട്ടില്ലെന്നാണ് എന്‍വിഡിയയുടെ വിശദീകരണം.
അമേരിക്കന്‍ വിദേശകാര്യ സെക്രട്ടറി മാര്‍ക്കോ റൂബിയോ ഈ വര്‍ഷം ആദ്യം വാഷിങ്ടണിലെ ഉന്നത ഉദ്യോഗസ്ഥര്‍ക്ക് അയച്ച മെമ്മോയില്‍ ജെന്‍സന്‍ ഹുവാങ്ങിന് ചൈനീസ് ചാരവനിതയെന്ന് ആരോപിക്കപ്പെടുന്ന യുവതിയുമായി അടുത്ത ബന്ധമുണ്ടെന്ന് മുന്നറിയിപ്പ് നല്‍കിയിരുന്നതായി ന്യൂയോര്‍ക്ക് ടൈംസ് റിപ്പോര്‍ട്ട് ചെയ്തു.
യുവതി ചാരയാണെന്ന് തനിക്ക് അറിയില്ലായിരുന്നുവെന്ന് ജെന്‍സന്‍ ഹുവാങ് പറഞ്ഞതായി അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് തിങ്കളാഴ്ച വെളിപ്പെടുത്തി. ഹുവാങ്ങുമായി താന്‍ സംസാരിച്ചിരുന്നുവെന്നും ട്രംപ് പറഞ്ഞു.
വിഷയം അമേരിക്കന്‍ രാഷ്ട്രീയരംഗത്തും ശ്രദ്ധ നേടിയിട്ടുണ്ട്. യു എസ് ജനപ്രതിനിധിസഭയുടെ വിദേശകാര്യ സമിതിയിലെ നേതാക്കള്‍ അടുത്തയാഴ്ച അടച്ചിട്ട മുറിയില്‍ നടക്കുന്ന വിശദീകരണ യോഗത്തില്‍ പങ്കെടുക്കാന്‍ ജെന്‍സന്‍ ഹുവാങ്ങിനോട് ആവശ്യപ്പെട്ടിട്ടുണ്ട്. ആവശ്യമെങ്കില്‍ സമന്‍സിലൂടെ ഹാജരാകാന്‍ നിര്‍ബന്ധിക്കാനുള്ള അധികാരവും സമിതിക്കുണ്ട്.
അതേസമയം, കമ്പനിയുടെ രഹസ്യവിവരങ്ങളോ അമേരിക്കയുടെ ദേശീയ സുരക്ഷയോ അപകടത്തിലായതായി വിശ്വസിക്കാന്‍ നിലവില്‍ കാരണമില്ലെന്ന് എന്‍വിഡിയയുടെ ഡയറക്ടര്‍ ബോര്‍ഡ് ഞായറാഴ്ച വ്യക്തമാക്കി. സ്വതന്ത്ര ഡയറക്ടര്‍മാരുടെ സമിതിയായിരിക്കും അന്വേഷണത്തിന് മേല്‍നോട്ടം വഹിക്കുക.
കമ്പനിയുടെ പൊതുജനങ്ങള്‍ക്കിടയിലെ പ്രതിച്ഛായ ജെന്‍സന്‍ ഹുവാങ്ങിന്റെ വ്യക്തിത്വവുമായി ഏറെ ബന്ധപ്പെട്ടിരിക്കുന്നതിനാല്‍ അന്വേഷണം അടിയന്തര പ്രാധാന്യത്തോടെ പൂര്‍ത്തിയാക്കാനാണ് സാധ്യതയെന്ന് വിഷയവുമായി അടുത്ത വൃത്തങ്ങളെ ഉദ്ധരിച്ച് റിപ്പോര്‍ട്ട് പറയുന്നു.
കമ്പനിയുടെ അന്വേഷണത്തിനും എഫ് ബി ഐയുടെ പ്രത്യേക അന്വേഷണത്തിനും മുന്നില്‍ ഹാജരാകുന്നതിനായി ഹുവാങ് വ്യക്തിപരമായി അഭിഭാഷകനെ നിയോഗിച്ചിട്ടുണ്ടോയെന്ന ചോദ്യത്തോട് എന്‍വിഡിയ വക്താവ് ചൊവ്വാഴ്ച പ്രതികരിച്ചില്ല.
അന്വേഷണവുമായി പൂര്‍ണമായി സഹകരിക്കുമെന്ന് ജെന്‍സന്‍ ഹുവാങ് അറിയിച്ചിട്ടുണ്ടെന്നും നടപടിയെ അദ്ദേഹം പിന്തുണയ്ക്കുന്നുണ്ടെന്നും കമ്പനി വ്യക്തമാക്കി. ദേശീയ സുരക്ഷയെയോ എന്‍വിഡിയയുടെ രഹസ്യവിവരങ്ങളെയോ ബാധിച്ചിട്ടുണ്ടെന്ന് കരുതാന്‍ നിലവില്‍ കാരണമില്ലെന്നും കമ്പനി ആവര്‍ത്തിച്ചു.