വാഷിംഗ്ടൺ ഡിസി: നവംബർ 3-ന് നടക്കുന്ന അമേരിക്കൻ തെരഞ്ഞെടുപ്പിൽ ചരിത്രവിജയം ലക്ഷ്യമിട്ട് ഇന്ത്യൻ വംശജരായ നിത്യ രാമനും പൂജ സേഥിയും ശക്തമായ മുന്നേറ്റത്തിൽ. ഇന്ത്യൻ-അമേരിക്കൻ സ്ഥാനാർത്ഥികളായ ഇരുവരും തങ്ങളുടെ മണ്ഡലങ്ങളിൽ ജനപ്രീതി നേടിക്കൊണ്ട് വിജയ കുതിപ്പിലാണ്.ലോസ് ഏഞ്ചൽസ് സിറ്റി കൗൺസിൽ അംഗം നിത്യ രാമൻ മേയർ കാരെൻ ബാസിനെ പരാജയപ്പെടുത്താൻ ശ്രമിക്കുമ്പോൾ, ടെക്സാസ് നിയമസഭയിലേക്ക് തിരഞ്ഞെടുക്കപ്പെടുന്ന ആദ്യ ഇന്ത്യൻ-അമേരിക്കൻ വംശജയും ഹിന്ദുവും ആകാനുള്ള ശ്രമത്തിലാണ് ഡെമോക്രാറ്റ് പൂജ സേഥി പ്രചാരണം നടത്തുന്നത്. ഒക്ടോബർ 9-ന് പ്രസിദ്ധീകരിച്ച ഒരു അഭിപ്രായ വോട്ടെടുപ്പിൽ ലോസ് ഏഞ്ചൽസ് മേയർ സ്ഥാനത്തേക്കുള്ള മത്സരത്തിൽ മുന്നിലാണ് നിത്യ രാമൻ.
'പൊളിറ്റിക്കൽ വയർ' റിപ്പോർട്ട് പ്രകാരം, വോട്ട് ചെയ്യാൻ സാധ്യതയുള്ളവരെ ഉൾപ്പെടുത്തി 'മാൻഹട്ടൻ ഇൻസ്റ്റിറ്റ്യൂട്ട്' നടത്തിയ സർവേയിൽ നിത്യ രാമന് 38 ശതമാനവും കാരെൻ ബാസിന് 32 ശതമാനവും പിന്തുണ ലഭിച്ചു. ഇതിലെ പിശക് സാധ്യത 4.6 ശതമാനം പോയിന്റാണ്. വിജയിച്ചാൽ ലോസ് ഏഞ്ചൽസിലെ ആദ്യ ഇന്ത്യൻ-അമേരിക്കൻ മേയറായി നിത്യ രാമൻ മാറും. പാർട്ടി അടിസ്ഥാനത്തിലല്ല ഈ മേയർ തിരഞ്ഞെടുപ്പ് നടക്കുന്നത്. ജൂണിൽ നടന്ന പ്രൈമറി തെരഞ്ഞെടുപ്പിൽ റിപ്പബ്ലിക്കൻ സ്ഥാനാർത്ഥി സ്പെൻസർ പ്രാറ്റിനെ പിന്നിലാക്കി രണ്ടാം സ്ഥാനം ഉറപ്പിച്ചു. തുടർന്ന് നിലവിലെ മേയർ കാരെൻ ബാസുമായി നവംബറിലെ റൺ-ഓഫ് പോരാട്ടത്തിന് യോഗ്യത നേടി.
ഇമിഗ്രേഷൻ അഭിഭാഷകയും കമ്മ്യൂണിറ്റി പ്രവർത്തകയുമായ പൂജ സേഥി ഡെമോക്രാറ്റിക് പാർട്ടി സ്ഥാനാർത്ഥിയായി ടെക്സസ് ഹൗസ് ഡിസ്ട്രിക്റ്റ് 47-ൽ നിന്നാണ് മത്സരിക്കുന്നത്. പ്രൈമറിയിൽ ഏകദേശം 76 ശതമാനം വോട്ട് നേടി വിജയിച്ച പൂജ സേഥി, റിപ്പബ്ലിക്കൻ സ്ഥാനാർത്ഥി ജെന്നിഫർ മുഷ്താലറിനെതിരെ മത്സരിക്കുന്നു. സേഥി വിജയിച്ചാൽ, ടെക്സാസ് നിയമസഭയിലേക്ക് തിരഞ്ഞെടുക്കപ്പെടുന്ന ആദ്യ ഇന്ത്യൻ-അമേരിക്കൻ വംശജയും ആദ്യ ഹിന്ദുവുമായ വ്യക്തിയായി മാറും.
'ടേണിംഗ് പോയിന്റ്' കമന്റേറ്റർ സവന്ന ഹെർണാണ്ടസിന് 'എക്സ്' പ്ലാറ്റ്‌ഫോമിലൂടെ മറുപടി നൽകിയതോടെ ഈ വർഷം ആദ്യം അവർ ശ്രദ്ധ നേടിയിരുന്നു. "എന്റെ പാരമ്പര്യം ഒരു അപമാനമല്ല. അതൊരു കഥയാണ്. ദശലക്ഷക്കണക്കിന് അമേരിക്കക്കാരെപ്പോലെ തന്നെ കഠിനാധ്വാനം, ഈ രാജ്യത്തോടുള്ള വിശ്വാസം, സമൂഹത്തോടുള്ള സേവനം എന്നിവയിൽ അധിഷ്ഠിതമാണ് എന്റെ കഥയും. അത് നിങ്ങൾക്ക് അസ്വസ്ഥതയുണ്ടാക്കുന്നുണ്ടെങ്കിൽ, അത് എന്നെക്കുറിച്ചല്ല, നിങ്ങളെക്കുറിച്ചാണ് കൂടുതൽ കാര്യങ്ങൾ വെളിപ്പെടുത്തുന്നത്," സേത്തി കുറിച്ചു.
ജോർജിയയിൽ, ഗ്വിനെറ്റ് കൗണ്ടിയിലെ ഹൗസ് ഡിസ്ട്രിക്റ്റ് 97-ലേക്ക് ഡെമോക്രാറ്റ് ജ്യോത് സിംഗ് റിപ്പബ്ലിക്കൻ യാസിൻ മൊഗാസിക്കെതിരെ മത്സരിക്കുന്നുണ്ട്. മെയ് 19-ന് നടന്ന പ്രൈമറിയിൽ 59.1 ശതമാനം വോട്ട് നേടിയാണ് സിംഗ് വിജയിച്ചത്. യേൽ സർവകലാശാലയിൽ നിന്ന് ബിരുദം നേടിയ സിംഗിന് കോൺഗ്രസ് അംഗം റോ ഖന്നയുടെ പിന്തുണയുണ്ട്. തിരഞ്ഞെടുക്കപ്പെട്ടാൽ ജോർജിയയിലെ ആദ്യ സിഖ് ജനപ്രതിനിധിയായി അദ്ദേഹം മാറും.
ന്യൂയോർക്കിൽ, ഡെമോക്രാറ്റ് അറ്റോർണി ജനറൽ ലെറ്റീഷ്യ ജെയിംസിനെതിരെ റിപ്പബ്ലിക്കൻ സ്ഥാനാർത്ഥി സരിത കൊമാറ്റിറെഡ്ഡി മത്സരിക്കുന്നു. ന്യൂയോർക്കിൽ സംസ്ഥാനതല പദവിയിലേക്ക് മത്സരിക്കുന്ന, പ്രമുഖ രാഷ്ട്രീയ പാർട്ടിയിൽ നിന്നുള്ള ആദ്യത്തെ ദക്ഷിണേഷ്യൻ സ്ഥാനാർത്ഥിയാണ് കോമതിറെഡ്ഡി. 1980-കളിൽ ഇന്ത്യയിൽ നിന്ന് കുടിയേറിയ മാതാപിതാക്കളുടെ മകനായി ബ്രൂക്ക്‌ലിനിൽ ജനിച്ച ഇദ്ദേഹം, സുപ്രീം കോടതി ജസ്റ്റിസ് ബ്രെറ്റ് കവനോയുടെ മുൻ നിയമ സഹായിയും (law clerk) മുൻ ഫെഡറൽ ഭീകരവിരുദ്ധ വിഭാഗം ഉദ്യോഗസ്ഥനുമാണ്. സെപ്റ്റംബർ 11 മുതൽ 17 വരെ നടത്തിയ സിയീന അഭിപ്രായ വോട്ടെടുപ്പിൽ ജെയിംസിന് 52 ശതമാനവും കൊമാറ്റിറെഡ്ഡിക്ക് 39 ശതമാനവും പിന്തുണ ലഭിച്ചു; ഇതോടെ ഓഗസ്റ്റിലുണ്ടായിരുന്ന 18 പോയിന്റ് എന്ന ജെയിംസിന്റെ ലീഡ് കുറഞ്ഞു.
മേരിലാൻഡിൽ, മോണ്ട്ഗോമറി കൗണ്ടിയിലെ ഡിസ്ട്രിക്റ്റ് 39-ലേക്കുള്ള ജൂണിലെ പ്രൈമറി തിരഞ്ഞെടുപ്പിൽ സെനറ്റ് മെജോറിറ്റി ലീഡർ നാൻസി കിംഗിനെ പരാജയപ്പെടുത്തിയതോടെ, ഡെമോക്രാറ്റ് സ്ഥാനാർത്ഥി അമർ മുകുന്ദയുടെ വിജയം ഏതാണ്ട് ഉറപ്പായിക്കഴിഞ്ഞു. ഈ സീറ്റിലേക്ക് റിപ്പബ്ലിക്കൻ സ്ഥാനാർത്ഥികളാരും മത്സരിക്കുന്നില്ല. കിംഗിന് 36.1 ശതമാനം വോട്ട് ലഭിച്ചപ്പോൾ മുകുന്ദ 48.6 ശതമാനം വോട്ടുകൾ നേടി. ഇന്ത്യയിൽ നിന്നും പാകിസ്ഥാനിൽ നിന്നുമുള്ളവരാണ് മുകുന്ദയുടെ മാതാപിതാക്കൾ. അദ്ദേഹം വിജയിക്കുകയാണെങ്കിൽ മേരിലാൻഡിലെ ആദ്യത്തെ ദക്ഷിണേഷ്യൻ വംശജനായ സ്റ്റേറ്റ് സെനറ്ററായി മാറുമെന്ന് 'ദി സെന്റിനൽ' (The Sentinel) റിപ്പോർട്ട് ചെയ്യുന്നു.
മേരിലാൻഡിൽ തന്നെ, ഹൈദരാബാദിൽ ജനിച്ച ലഫ്റ്റനന്റ് ഗവർണർ അരുണ മില്ലർ, ഗവർണർ വെസ് മൂറിനൊപ്പം രണ്ടാമതൊരു തവണ കൂടി അധികാരത്തിലെത്താൻ മത്സരിക്കുന്നുണ്ട്. അമേരിക്കൻ രാഷ്ട്രീയത്തിലെ മറ്റ് സുപ്രധാന നാഴികക്കല്ലുകൾക്ക് പിന്നാലെയാണ് ഈ സ്ഥാനാർത്ഥികളുടെ പ്രചാരണങ്ങളും നടക്കുന്നത്. കഴിഞ്ഞ വർഷം സോഹ്‌റാൻ മംദാനി ന്യൂയോർക്ക് സിറ്റിയുടെ ആദ്യ ഇന്ത്യൻ-അമേരിക്കൻ മേയറായി മാറിയിരുന്നു; ബോബി ജിൻഡാൽ, നിക്കി ഹേലി എന്നിവരായിരുന്നു ആദ്യത്തെ രണ്ട് ഇന്ത്യൻ-അമേരിക്കൻ ഗവർണർമാർ.
രാഷ്ട്രീയ പ്രാതിനിധ്യം നിരീക്ഷിക്കുന്ന 'ഇന്ത്യൻ അമേരിക്കൻ ഇംപാക്ട്' എന്ന സംഘടനയുടെ കണക്കുകൾ പ്രകാരം, 250-ലധികം ഇന്ത്യൻ-അമേരിക്കക്കാർ നിലവിൽ തിരഞ്ഞെടുക്കപ്പെട്ട പദവികൾ വഹിക്കുന്നുണ്ട്.
അമേരിക്കൻ തെരഞ്ഞെടുപ്പിൽ വിജയ കുതിപ്പുമായി നിത്യ രാമനും പൂജ സേഥിയും
