അമേരിക്കൻ തൊഴിലാളികളെ കുറഞ്ഞ വേതനക്കാരായ വിദേശ തൊഴിലാളികളെ കൊണ്ട് മാറ്റിസ്ഥാപിക്കുന്നുവെന്ന് ആരോപണം; ഒരു ലക്ഷം ഡോളർ ഫീസിനെയും വൈസ് പ്രസിഡന്റ് പിന്തുണച്ചു
വാഷിങ്ടൺ: അമേരിക്കയിലെ വിദേശ വിദഗ്ധ തൊഴിലാളികൾക്കുള്ള എച്ച് 1 ബി വിസാ പദ്ധതി 'പൂർണമായും തകരാറിലായിരിക്കുകയാണ്' എന്ന വിമർശനവുമായി വൈസ് പ്രസിഡന്റ് ജെ.ഡി. വാൻസ്. അമേരിക്കൻ തൊഴിലാളികളെ കുറഞ്ഞ വേതനത്തിന് വിദേശ തൊഴിലാളികളെ ഉപയോഗിച്ച് മാറ്റിസ്ഥാപിക്കാൻ ചില കമ്പനികൾ പദ്ധതി ദുരുപയോഗം ചെയ്യുന്നുവെന്ന ആരോപണവും അദ്ദേഹം ഉന്നയിച്ചു. ഇത്തരം രീതികൾ തുടരുകയാണെങ്കിൽ എച്ച് 1 ബി പദ്ധതി തന്നെ പൂർണമായി റദ്ദാക്കുന്നതിനെ പിന്തുണയ്ക്കുമെന്നും വാൻസ് വ്യക്തമാക്കി.
റിയൽ അമേരിക്കാസ് വോയ്‌സിന് നൽകിയ അഭിമുഖത്തിലാണ് വാൻസിന്റെ പ്രതികരണം. സാങ്കേതികവിദ്യാ മേഖലയിൽ മാത്രമല്ല, അക്കൗണ്ടിങ് ഉൾപ്പെടെയുള്ള വിവിധ മേഖലകളിലും കമ്പനികൾ എച്ച് 1 ബി സംവിധാനത്തെ കുറഞ്ഞ തൊഴിൽച്ചെലവിനുള്ള മാർഗമായി ഉപയോഗിക്കുന്നുണ്ടെന്നാണ് വാൻസ് ആരോപിച്ചത്.
അമേരിക്കയിൽ ലഭ്യമായ തൊഴിലാളികളിൽനിന്ന് നിർവഹിക്കാവുന്ന ജോലികൾക്കായി കുറഞ്ഞ വേതനക്കാരായ വിദേശ തൊഴിലാളികളെ നിയമിക്കുന്നത് എച്ച് 1 ബി പദ്ധതിയുടെ ലക്ഷ്യവുമായി പൊരുത്തപ്പെടുന്നില്ലെന്നും അദ്ദേഹം പറഞ്ഞു. പ്രത്യേക വൈദഗ്ധ്യം ആവശ്യമായ ജോലികൾക്കായി വിദേശ വിദഗ്ധരെ നിയമിക്കുന്നതും അമേരിക്കൻ തൊഴിലാളികളെ മാറ്റിസ്ഥാപിക്കുന്നതും രണ്ടായി കാണണമെന്നും വാൻസ് അഭിപ്രായപ്പെട്ടു.
ഒരു അക്കൗണ്ടന്റിന് വർഷം 45,000 ഡോളർ വേതനം നൽകുമ്പോൾ സമാന ജോലി ചെയ്യുന്ന അമേരിക്കൻ തൊഴിലാളിക്ക് 60,000 ഡോളർ നൽകേണ്ടിവരുന്ന സാഹചര്യം ഉദാഹരണമായി ചൂണ്ടിക്കാട്ടിയായിരുന്നു വാൻസിന്റെ വിമർശനം. ഇത്തരത്തിലുള്ള നിയമനരീതി വിദേശ വിദഗ്ധരെ ആകർഷിക്കുന്നതിനു പകരം തൊഴിൽച്ചെലവ് കുറയ്ക്കാനുള്ള മാർഗമായി എച്ച് 1 ബി സംവിധാനത്തെ മാറ്റുകയാണെന്നാണ് അദ്ദേഹത്തിന്റെ വാദം.
എച്ച് 1 ബി വിസ അമേരിക്കൻ കമ്പനികൾക്ക് പ്രത്യേക വൈദഗ്ധ്യവും സാങ്കേതിക പരിജ്ഞാനവും ആവശ്യമായ ജോലികളിലേക്ക് വിദേശ പൗരന്മാരെ നിയമിക്കാൻ അനുവദിക്കുന്ന സംവിധാനമാണ്. സാങ്കേതികവിദ്യ, എൻജിനീയറിങ് തുടങ്ങിയ മേഖലകളിൽ വ്യാപകമായി ഉപയോഗിക്കുന്നുണ്ടെങ്കിലും അക്കൗണ്ടിങ് ഉൾപ്പെടെയുള്ള മറ്റ് പ്രൊഫഷനുകളിലേക്കും പദ്ധതി ബാധകമാണ്.
അതേസമയം, എച്ച് 1 ബി പദ്ധതിയെ അനുകൂലിക്കുന്നവർ അമേരിക്കൻ കമ്പനികൾക്ക് രാജ്യത്ത് ലഭ്യമല്ലാത്ത പ്രത്യേക വൈദഗ്ധ്യമുള്ള തൊഴിലാളികളെ കണ്ടെത്താൻ ഈ സംവിധാനം സഹായിക്കുന്നുവെന്നാണ് വാദിക്കുന്നത്. വിമർശകർ ചില തൊഴിലുടമകൾ കുറഞ്ഞ വേതനത്തിന് വിദേശ തൊഴിലാളികളെ നിയമിക്കാൻ പദ്ധതി ഉപയോഗിക്കുന്നുവെന്നും ആരോപിക്കുന്നു. വാൻസിന്റെ ഇപ്പോഴത്തെ വിമർശനം പ്രധാനമായും ഈ രണ്ടാമത്തെ ആശങ്കയിലാണ് കേന്ദ്രീകരിച്ചിരിക്കുന്നത്.
എച്ച് 1 ബി നിയമനങ്ങൾക്ക് 1 ലക്ഷം ഡോളർ അധിക പേയ്‌മെന്റ് നിർബന്ധമാക്കിയ നടപടിയെയും വാൻസ് പിന്തുണച്ചു. കുറഞ്ഞ വേതനക്കാരായ വിദേശ തൊഴിലാളികളെ ഉപയോഗിച്ച് അമേരിക്കൻ ജീവനക്കാരെ മാറ്റിസ്ഥാപിക്കുന്നതിലൂടെ ചെലവ് കുറയ്ക്കാനുള്ള കമ്പനികളുടെ താൽപര്യം ഈ അധിക സാമ്പത്തിക ബാധ്യത തടയുമെന്നാണ് അദ്ദേഹത്തിന്റെ വാദം. 2025 സെ്ര്രപംബറിൽ ട്രംപ് ഭരണകൂടം പുതിയ ചില എച്ച്1ബി അപേക്ഷകൾക്ക് 1 ലക്ഷം ഡോളർ പേയ്‌മെന്റ് നിർബന്ധമാക്കിയിരുന്നു. 2026 സെ്ര്രപംബർ 18ലെ പുതിയ പ്രഖ്യാപനത്തിലൂടെ ഈ നിയന്ത്രണം 2027 സെപ്തംബർ വരെ തുടരാനും തീരുമാനിച്ചിട്ടുണ്ട്.
എച്ച് 1 ബി പദ്ധതിയിലെ പരിശോധനകൾ കൂടുതൽ ശക്തമാക്കാനും ട്രംപ് ഭരണകൂടം നടപടികൾ സ്വീകരിച്ചിട്ടുണ്ട്. സെപ്തംബർ 18ലെ എക്‌സിക്യൂട്ടീവ് ഉത്തരവ് പ്രകാരം, എച്ച്1ബി അപേക്ഷകൾ പരിഗണിക്കുമ്പോൾ ബന്ധപ്പെട്ട സ്ഥാനങ്ങളിൽ അമേരിക്കൻ തൊഴിലാളികളെ അടുത്തിടെ പിരിച്ചുവിട്ടിട്ടുണ്ടോ, ഭാവിയിൽ പിരിച്ചുവിടാൻ പദ്ധതിയുണ്ടോ തുടങ്ങിയ കാര്യങ്ങൾ അധികൃതർ പരിശോധിക്കണം. നേരത്തെ സമർപ്പിച്ച ലേബർ കണ്ടീഷൻ അപേക്ഷകളും തൊഴിൽ വകുപ്പ് പരിശോധിക്കും.
വൈറ്റ് ഹൗസിന്റെ ഔദ്യോഗിക വിശദീകരണപ്രകാരം, 2025ലെ 1 ലക്ഷം ഡോളർ പേയ്‌മെന്റ് വ്യവസ്ഥ നിലവിൽ വന്നതിന് ശേഷം വലിയ ഐ.ടി. ഔട്ട്‌സോഴ്‌സിങ് കമ്പനികൾ സമർപ്പിച്ച എച്ച്1ബി രജിസ്‌ട്രേഷനിൽ 92 ശതമാനം കുറവുണ്ടായതായി സർക്കാർ പറയുന്നു. ഉയർന്ന വേതനവും ഉയർന്ന വൈദഗ്ധ്യവും ആവശ്യമായ ജോലികളിലേക്ക് പദ്ധതിയെ കൂടുതൽ കേന്ദ്രീകരിക്കുകയാണ് പുതിയ നടപടികളുടെ ലക്ഷ്യമെന്നും വൈറ്റ് ഹൗസ് വ്യക്തമാക്കുന്നു.
എച്ച് 1 ബി പദ്ധതി പൂർണമായി റദ്ദാക്കണമെന്ന വാൻസിന്റെ നിലപാട് നിലവിലെ നിയന്ത്രണങ്ങൾ കൂടുതൽ കടുപ്പിക്കുന്നതിൽനിന്ന് വ്യത്യസ്തമായ സമീപനമാണ്. പദ്ധതി തുടരണമോ, പരിഷ്‌കരിക്കണമോ, പൂർണമായി ഒഴിവാക്കണമോ എന്നതിനെക്കുറിച്ചുള്ള അമേരിക്കയിലെ കുടിയേറ്റതൊഴിൽ നയ ചർച്ചകൾക്കാണ് അദ്ദേഹത്തിന്റെ പരാമർശം പുതിയ ശ്രദ്ധ നൽകുന്നത്.