വാഷിംഗ്ടണ്‍: മധ്യപൂര്‍വദേശത്തും അതിനുപുറത്തും അമേരിക്കന്‍ നയതന്ത്ര പ്രതിനിധികളെയും ഉദ്യോഗസ്ഥരെയും ലക്ഷ്യമിടാനുള്ള ശ്രമങ്ങള്‍ ഇറാന്‍ ഗണ്യമായി വര്‍ധിപ്പിച്ചതായി യു എസ് രഹസ്യാന്വേഷണ വിഭാഗത്തിന്റെ മുന്നറിയിപ്പ്. വധശ്രമങ്ങള്‍ ഉള്‍പ്പെടെയുള്ള നീക്കങ്ങള്‍ 'വലിയ ഘട്ടത്തിലെത്തിയതായി' രഹസ്യാന്വേഷണ വിവരങ്ങള്‍ സൂചിപ്പിക്കുന്നുവെന്ന് യു എസ് വിദേശകാര്യ സെക്രട്ടറി മാര്‍ക്കോ റൂബിയോയ്ക്ക് ഒക്ടോബര്‍ 23-ന് നല്‍കിയ മെമ്മോയില്‍ വ്യക്തമാക്കിയതായി വാര്‍ത്താ വെബ്‌സൈറ്റായ ആക്‌സിയോസ് റിപ്പോര്‍ട്ട് ചെയ്തു. അമേരിക്കന്‍ ഉദ്യോഗസ്ഥരുടെ സുരക്ഷയെക്കുറിച്ച് ആശങ്ക ഉയര്‍ത്തുന്നതാണ് ഈ മുന്നറിയിപ്പ്. മേഖലയില്‍ സംഘര്‍ഷം വ്യാപിക്കാനുള്ള സാധ്യത നിലനില്‍ക്കുന്നതിനിടെ മധ്യപൂര്‍വദേശത്തെ വിവിധ യു എസ് എംബസികളില്‍ ജീവനക്കാരുടെ എണ്ണം കുറയ്ക്കാനുള്ള വിദേശകാര്യ വകുപ്പിന്റെ തീരുമാനത്തിന് പിന്നിലെ കാരണങ്ങളിലൊന്നും ഈ ഭീഷണിയാണ്.
യെമനിലെ ഇറാന്‍ പിന്തുണയുള്ള ഹൂതി വിമതര്‍ സൗദി അറേബ്യയ്ക്കു പുറമേ മേഖലയിലെ മറ്റ് രാജ്യങ്ങളിലേക്കും ആക്രമണം വ്യാപിപ്പിച്ചേക്കാമെന്നും അമേരിക്കന്‍ ഉദ്യോഗസ്ഥര്‍ ആശങ്കപ്പെടുന്നു. ഇറാനെതിരെ അമേരിക്കയും ഇസ്രായേലും വീണ്ടും സൈനിക നടപടി സ്വീകരിക്കാനുള്ള സാധ്യതയും മേഖലയുടെ സുരക്ഷാ സാഹചര്യം കൂടുതല്‍ സങ്കീര്‍ണമാക്കുന്നു. ഇടക്കാല തെരഞ്ഞെടുപ്പുകള്‍ക്കുശേഷം ഇത്തരം നീക്കങ്ങള്‍ ഉണ്ടായേക്കാമെന്ന ആശങ്കയും നിലനില്‍ക്കുന്നുണ്ട്.
വെള്ളിയാഴ്ച ഫ്‌ളോറിഡയില്‍ നടന്ന തെരഞ്ഞെടുപ്പ് പ്രചാരണ റാലിയില്‍ ഇറാനെതിരെ വീണ്ടും സൈനിക നടപടി സ്വീകരിക്കുന്നതിനെക്കുറിച്ച് പ്രസിഡന്റ് ഡൊണാള്‍ഡ് ട്രംപ് പറഞ്ഞിരുന്നു.
വീണ്ടും ചെറിയ 'ഓപ്പറേഷന്‍ എപിക് ഫ്യൂറി' നടത്തേണ്ടിവന്നേക്കാമെന്നായിരുന്നു ട്രംപ് പറഞ്ഞത്. ഇറാന്‍ ഭരണകൂടം ബുദ്ധിയുള്ളവരാണെങ്കില്‍ 'നമുക്ക് കാര്യത്തിലേക്ക് കടക്കാം' എന്ന് പറയുമെന്നും എന്നാല്‍ അവര്‍ അങ്ങനെ ചെയ്യുമെന്ന കാര്യത്തില്‍ തനിക്ക് സംശയമുണ്ടെന്നും ഒരുപക്ഷേ അവര്‍ അത്ര ബുദ്ധിയുള്ളവരല്ലായിരിക്കാമെന്നും അദ്ദേഹം കൂട്ടിച്ചേര്‍ത്തു.
ആക്‌സിയോസിന് ലഭിച്ച ഒരു പേജുള്ള, രഹസ്യസ്വഭാവമില്ലാത്ത മെമ്മോയിലാണ് ദേശീയ രഹസ്യാന്വേഷണ ഡയറക്ടര്‍ ജെയ് ക്ലെയ്റ്റണ്‍, ഇറാനുമായി ബന്ധപ്പെട്ട വധഗൂഢാലോചനകളെക്കുറിച്ചുള്ള വിവരങ്ങള്‍ നിലവില്‍ അനുമതിയുള്ളവരെക്കാള്‍ കൂടുതല്‍ യു എസ് ഉദ്യോഗസ്ഥരുമായി പങ്കുവെക്കേണ്ടതുണ്ടെന്ന് റൂബിയോയെ അറിയിച്ചത്.
ലക്ഷ്യമാകാന്‍ സാധ്യതയുള്ള വ്യക്തികള്‍ ആരാണെന്നോ മധ്യപൂര്‍വദേശത്തിന് പുറത്തുള്ള ഏതെല്ലാം രാജ്യങ്ങളാണ് ഭീഷണിയിലുള്ളതെന്നോ ഗൂഢാലോചനകളുടെ കൃത്യമായ സ്വഭാവമെന്തെന്നോ മെമ്മോയില്‍ വ്യക്തമാക്കിയിട്ടില്ല. എന്നാല്‍, ഇതുമായി ബന്ധപ്പെട്ട രഹസ്യാന്വേഷണ വിവരങ്ങള്‍ മുതിര്‍ന്ന വിദേശകാര്യ വകുപ്പ് ഉദ്യോഗസ്ഥരുമായി ഇതിനകം പങ്കുവെച്ചിട്ടുണ്ടെന്ന് രേഖ വ്യക്തമാക്കുന്നു.
സുരക്ഷാ ഭീഷണിയുള്ള കൂടുതല്‍ ഉദ്യോഗസ്ഥരിലേക്ക് വിവരങ്ങള്‍ എത്തിക്കാന്‍, രഹസ്യാന്വേഷണ വിവരങ്ങളില്‍ കഴിയുന്നത്ര ഭാഗങ്ങള്‍ കുറഞ്ഞ രഹസ്യസ്വഭാവമുള്ള വിഭാഗത്തിലേക്ക് മാറ്റാമെന്നും ക്ലെയ്റ്റണ്‍ വാഗ്ദാനം ചെയ്തു.
ഈ ആഴ്ച ആദ്യം, റിയാദിലെ യു എസ് എംബസിയിലും ജിദ്ദ, ദഹ്‌റാന്‍ എന്നിവിടങ്ങളിലെ കോണ്‍സുലേറ്റുകളിലും ജോലി ചെയ്യുന്നവരുടെ കുടുംബാംഗങ്ങളോടും അത്യാവശ്യമല്ലാത്ത ജീവനക്കാരോടും മടങ്ങിപ്പോകാന്‍ യു എസ് വിദേശകാര്യ വകുപ്പ് നിര്‍ദേശിച്ചിരുന്നു.
വെള്ളിയാഴ്ച, യുണൈറ്റഡ് അറബ് എമിറേറ്റ്‌സ്, ലെബനന്‍, ഖത്തര്‍, ജോര്‍ദാന്‍ എന്നിവിടങ്ങളിലെ യു എസ് എംബസികളിലും നയതന്ത്ര- സര്‍ക്കാര്‍ ഉദ്യോഗസ്ഥരുടെ എണ്ണം കുറയ്ക്കാന്‍ നിര്‍ദേശിച്ചതായി ഒരു യു എസ് ഉദ്യോഗസ്ഥന്‍ അറിയിച്ചു.
ഹൂതി ആക്രമണങ്ങളുടെയും ഇറാന്റെ ഭീകരാക്രമണ ഗൂഢാലോചനകളുടെയും ഭീഷണി കണക്കിലെടുത്ത്, തങ്ങളുടെ സാന്നിധ്യം കുറച്ച് അത്യാവശ്യ ജീവനക്കാരെ മാത്രം നിലനിര്‍ത്താന്‍ തീരുമാനിച്ചുവെന്ന് ഉദ്യോഗസ്ഥന്‍ പറഞ്ഞു.
മേഖലയിലെ സുരക്ഷാ സാഹചര്യം കൂടുതല്‍ വഷളാകാനുള്ള സാധ്യത നിലനില്‍ക്കുന്നതിനിടെ, അമേരിക്കന്‍ നയതന്ത്ര ഉദ്യോഗസ്ഥരുടെ സുരക്ഷ ഉറപ്പാക്കുന്നതിനുള്ള മുന്‍കരുതല്‍ നടപടികളായാണ് ഈ നീക്കങ്ങള്‍ വിലയിരുത്തപ്പെടുന്നത്.