വാഷിംഗ്ടണ് / കാരക്കസ്: വെനിസ്വേലയിലെ അപ്രതീക്ഷിത യുഎസ് സൈനിക നീക്കവും പ്രസിഡന്റ് നിക്കോളാസ് മദൂറോയും ഭാര്യ സിലിയ ഫ്ലോറസും പിടിയിലായെന്ന പ്രഖ്യാപനവും അന്താരാഷ്ട്ര തലത്തില് വന് പ്രതികരണങ്ങള്ക്കിടയാക്കി. ശനിയാഴ്ച (ജനുവരി 3) ട്രൂത്ത് സോഷ്യല് പ്ലാറ്റ്ഫോമില് യുഎസ് പ്രസിഡന്റ് ഡോണള്ഡ് ട്രംപ് നടത്തിയ പ്രസ്താവനയിലാണ് 'വലിയ തോതിലുള്ള ആക്രമണം' വിജയകരമായി പൂര്ത്തിയാക്കിയതായും മഡൂറോയെ രാജ്യത്തുനിന്ന് കൊണ്ടുപോയതായും അറിയിച്ചത്.
ആദ്യ റിപ്പോര്ട്ടുകള് പ്രകാരം, ഈ അതിസൂക്ഷ്മ ദൗത്യത്തിന്റെ കേന്ദ്രത്തില് നിന്നത് യുഎസ് സൈന്യത്തിന്റെ ഏറ്റവും രഹസ്യസ്വഭാവമുള്ള യൂണിറ്റുകളിലൊന്നായ ഡെല്റ്റ ഫോഴ്സ് ആയിരുന്നു. കാരക്കസ് നഗരമധ്യത്തില് നടത്തിയ ധീരമായ ഓപ്പറേഷനിലൂടെയാണ് മഡൂറോയെ പിടികൂടി വ്യോമമാര്ഗം പുറത്തേക്കു കൊണ്ടുപോയതെന്നാണ് സൂചന.
ഡെല്റ്റ ഫോഴ്സ്: രൂപീകരണവും ദൗത്യവും
യുഎസ് ആര്മിയുടെ 1st Special Forces Operational Detachment–Delta എന്ന ഔദ്യോഗിക നാമത്തില് അറിയപ്പെടുന്ന ഡെല്റ്റ ഫോഴ്സ് 1977ലാണ് രൂപീകരിച്ചത്. അന്താരാഷ്ട്ര ഭീകരവാദ ഭീഷണികളെ നേരിടുന്നതില് യുഎസിന് ഉണ്ടായിരുന്ന പരിമിതികള് തിരിച്ചറിഞ്ഞതിനെ തുടര്ന്നാണ് കേണല് ചാള്സ് ബെക്വിത്തിന്റെ നേതൃത്വത്തില് ഈ പ്രത്യേക സേന പിറവിയെടുത്തത്.
യുഎസ് ആര്മി സ്പെഷ്യല് ഓപ്പറേഷന്സ് കമാന്ഡിന് കീഴില് പ്രവര്ത്തിക്കുന്ന ഡെല്റ്റ ഫോഴ്സിന്റെ ദൗത്യങ്ങള് സാധാരണയായി പരമോന്നത സര്ക്കാര് തലങ്ങളില് നിന്നാണ് നിര്ദ്ദേശിക്കപ്പെടുന്നത്. പ്രവര്ത്തനങ്ങളുടെ ഭൂരിഭാഗവും രഹസ്യമായതിനാല് വര്ഷങ്ങള്ക്കുശേഷമാണ് പല വിവരങ്ങളും പുറത്തുവരുന്നത്.
ആദ്യ ദൗത്യങ്ങള് മുതല് മോഗാദിഷുവുവരെ
1980ലെ ഓപ്പറേഷന് ഈഗിള് ക്ലോ (ഇറാനിലെ അമേരിക്കന് ബന്ദികളെ മോചിപ്പിക്കാന് നടത്തിയ പരാജയപ്പെട്ട ശ്രമം) ഡെല്റ്റ ഫോഴ്സിനെ പൊതുസമൂഹത്തിന്റെ ശ്രദ്ധയില് കൊണ്ടുവന്നു. പരാജയമായിരുന്നെങ്കിലും, യുഎസ് സ്പെഷ്യല് ഓപ്പറേഷന്സ് സംവിധാനങ്ങളില് വന് പരിഷ്കാരങ്ങള്ക്ക് അത് വഴിവെച്ചു.
1989ലെ പനാമ അധിനിവേശത്തിനിടെ സൈനിക ഭരണാധികാരി മാനുവല് നോറിയേഗയെ പിടികൂടുന്നതില് ഡെല്റ്റ ഫോഴ്സ് നിര്ണായക പങ്കുവഹിച്ചു. 1993ല് സൊമാലിയയിലെ മോഗാദിഷുവില് നടന്ന കടുത്ത നഗരയുദ്ധങ്ങളിലും ഈ യൂണിറ്റ് മുന്നിരയില് ഉണ്ടായിരുന്നു.
9/11ന് ശേഷമുള്ള നിര്ണായക പങ്ക്
2001 സെപ്റ്റംബര് 11 ആക്രമണങ്ങള്ക്ക് പിന്നാലെ, ആഗോള ഭീകരവിരുദ്ധ പോരാട്ടത്തിലെ മുഖ്യ ആയുധമായി ഡെല്റ്റ ഫോഴ്സ് മാറി. അഫ്ഗാനിസ്ഥാന്, ഇറാഖ്, സിറിയ തുടങ്ങിയ മേഖലകളില് ഭീകര ശൃംഖലകളെ തകര്ക്കുന്നതിനും മുതിര്ന്ന ഭീകര നേതാക്കളെ ലക്ഷ്യമിടുന്നതിനും ഈ സേന നിര്ണായക ദൗത്യങ്ങള് നിര്വഹിച്ചു.
2019ല് ഐഎസ് തലവന് അബൂബക്കര് അല്ബഗ്ദാദിയുടെ മരണം സംഭവിച്ച രഹസ്യ ഓപ്പറേഷനിലും ഡെല്റ്റ ഫോഴ്സിന്റെ പങ്ക് വ്യാപകമായി റിപ്പോര്ട്ട് ചെയ്തിരുന്നു.
ഇന്നും, പരമ്പരാഗത സേനകള്ക്ക് കൈകാര്യം ചെയ്യാന് അത്യന്തം അപകടകരമോ സൂക്ഷ്മമോ ആയ ദൗത്യങ്ങള് നിര്വഹിക്കുന്ന യുഎസ് സൈന്യത്തിന്റെ ' നിഴല് സേന'യായാണ് ഡെല്റ്റ ഫോഴ്സ് കണക്കാക്കപ്പെടുന്നത്. വെനിസ്വേല ഓപ്പറേഷന്, ആ രഹസ്യചരിത്രത്തിലേക്ക് മറ്റൊരു നിര്ണായക അധ്യായം കൂടി ചേര്ത്തിരിക്കുകയാണ്.
രഹസ്യ ദൗത്യങ്ങളുടെ മുന്നിരയില് ഡെല്റ്റ ഫോഴ്സ്; വെനിസ്വേല ഓപ്പറേഷന് എങ്ങനെ
