മിഡ്‌ടേം തിരഞ്ഞെടുപ്പിലെ പണമൊഴുക്കില്‍ ഖേദം; 'ഞാന്‍ മാഗാ അനുകൂലിയല്ല': ഇലോണ്‍ മസ്‌ക്

മിഡ്‌ടേം തിരഞ്ഞെടുപ്പിലെ പണമൊഴുക്കില്‍ ഖേദം; 'ഞാന്‍ മാഗാ അനുകൂലിയല്ല': ഇലോണ്‍ മസ്‌ക്


ന്യൂയോര്‍ക്ക്: അമേരിക്കന്‍ ഇടക്കാല തിരഞ്ഞെടുപ്പില്‍ റിപ്പബ്ലിക്കന്‍ പാര്‍ട്ടിയുടെ വിജയത്തിനായി 400 ദശലക്ഷം ഡോളറിലേറെ (ഏകദേശം 3,600 കോടി രൂപ) ചെലവഴിച്ചതില്‍ ഖേദം പ്രകടിപ്പിച്ച് ശതകോടീശ്വരന്‍ ഇലോണ്‍ മസ്‌ക്. ഇത്രയധികം പണം ചെലവഴിച്ചിട്ടും കാര്യമായ നേട്ടമുണ്ടാക്കാനായില്ലെന്നും ഇക്കാര്യത്തില്‍ തനിക്ക് വിഡ്ഢിത്തം തോന്നുന്നുവെന്നും അദ്ദേഹം പറഞ്ഞു. ന്യൂയോര്‍ക്ക് ടൈംസ് സംഘടിപ്പിച്ച ഡീല്‍ബുക്ക് ഉച്ചകോടിയില്‍ സംസാരിക്കുകയായിരുന്നു ടെസ്‌ല, സ്‌പേസ് എക്‌സ് മേധാവി. അമേരിക്കയില്‍ അധികാരത്തിന്റെ സന്തുലിതാവസ്ഥ നിലനില്‍ക്കുന്നത് നല്ലതാണെന്നും ഭരണകൂടത്തിന്റെ നിയന്ത്രണം ഒരു പാര്‍ട്ടിയില്‍ മാത്രം കേന്ദ്രീകരിക്കാതിരിക്കുന്നത് രാജ്യത്തിന് ഗുണകരമാകുമെന്നും അദ്ദേഹം അഭിപ്രായപ്പെട്ടു.

 റിപ്പബ്ലിക്കന്‍ പാര്‍ട്ടിയുടെ നയങ്ങളോട് അന്ധമായി യോജിക്കുന്ന ആളല്ല താനെന്നും 'ഞാന്‍ മാഗാ അനുകൂലിയല്ല'െന്നും മസ്‌ക് വ്യക്തമാക്കി. മാഗാ എന്നതുകൊണ്ട് റിപ്പബ്ലിക്കന്‍ പാര്‍ട്ടിയുടെ എല്ലാ നയങ്ങളെയും കണ്ണടച്ച് പിന്തുണയ്ക്കണമെന്നാണ് അര്‍ഥമെങ്കില്‍ തനിക്ക് അതിനോട് യോജിപ്പില്ലെന്നും അദ്ദേഹം പറഞ്ഞു. 2024ലെ പ്രസിഡന്റ് തിരഞ്ഞെടുപ്പില്‍ ഡൊണാള്‍ഡ് ട്രംപിനും റിപ്പബ്ലിക്കന്‍ പാര്‍ട്ടിക്കും നിര്‍ണായക സാമ്പത്തിക പിന്തുണ നല്‍കിയ മസ്‌ക്, 2026ലെ ഇടക്കാല തിരഞ്ഞെടുപ്പിലും വന്‍തുക ചെലവഴിച്ചിരുന്നു. എന്നാല്‍ ഇത്തവണ ജനവിധി റിപ്പബ്ലിക്കന്‍ പാര്‍ട്ടിക്ക് തിരിച്ചടിയായി. ജനാധിപത്യ പാര്‍ട്ടി ജനപ്രതിനിധിസഭയിലും സെനറ്റിലും വന്‍ ഭൂരിപക്ഷം നേടിയതോടെ കോണ്‍ഗ്രസിന്റെ നിയന്ത്രണം റിപ്പബ്ലിക്കന്‍ പാര്‍ട്ടിക്ക് നഷ്ടമായി. 

മസ്‌കിന്റെ രാഷ്ട്രീയ സ്വാധീനം അവസാനിപ്പിക്കുകയെന്ന ലക്ഷ്യത്തോടെയാണ് തങ്ങള്‍ തിരഞ്ഞെടുപ്പില്‍ മത്സരിക്കുന്നതെന്ന് ചില ഡെമോക്രാറ്റിക് സ്ഥാനാര്‍ഥികള്‍ പരസ്യമായി പ്രഖ്യാപിക്കുകയും ചെയ്തിരുന്നു. തിരഞ്ഞെടുപ്പില്‍ പണം മാത്രം വിജയത്തിന് നിര്‍ണായകമല്ലെന്ന് ഫലം തെളിയിച്ചുവെന്നും വലിയ തുക ചെലവഴിച്ചാലും അതിനനുസരിച്ചുള്ള രാഷ്ട്രീയ നേട്ടം ഉറപ്പാക്കാനാവില്ലെന്നും മസ്‌ക് പറഞ്ഞു. ചെലവഴിച്ച തുക വീണ്ടും ആലോചിക്കാന്‍ അവസരം ലഭിച്ചിരുന്നെങ്കില്‍ ഇത്രയും പണം മുടക്കില്ലായിരുന്നുവെന്നും അദ്ദേഹം കൂട്ടിച്ചേര്‍ത്തു. തിരഞ്ഞെടുപ്പിന് തൊട്ടുമുമ്പുള്ള കാലയളവില്‍ തന്റെ ശ്രദ്ധ സ്‌പേസ് എക്‌സിന്റെ പദ്ധതികളിലായിരുന്നുവെന്നും മസ്‌ക് വെളിപ്പെടുത്തി. തിരഞ്ഞെടുപ്പില്‍ ഡെമോക്രാറ്റിക് പാര്‍ട്ടി വിജയിച്ചതില്‍ നിരാശ പ്രകടിപ്പിക്കാതിരുന്ന മസ്‌ക്, ടെക്‌സസില്‍ പുതുതായി തിരഞ്ഞെടുക്കപ്പെട്ട ഡെമോക്രാറ്റിക് ഗവര്‍ണര്‍ ജിന ഹിനോജോസയെക്കുറിച്ചും അനുകൂലമായാണ് പ്രതികരിച്ചത്. അവരെക്കുറിച്ച് കേട്ട കാര്യങ്ങള്‍ അനുസരിച്ച് ടെക്‌സസില്‍ കാര്യങ്ങള്‍ സുഗമമായി മുന്നോട്ടുപോകുമെന്നാണ് പ്രതീക്ഷയെന്നും അദ്ദേഹം പറഞ്ഞു. 
ഏതാനും വര്‍ഷങ്ങള്‍ക്കുമുമ്പ് മസ്‌ക് തന്റെ ബിസിനസ് സ്ഥാപനങ്ങളുടെ ആസ്ഥാനം കാലിഫോര്‍ണിയയില്‍നിന്ന് ടെക്‌സസിലേക്ക് മാറ്റിയിരുന്നു. 2024ലെ തിരഞ്ഞെടുപ്പിനുശേഷം ട്രംപുമായി അടുത്ത ബന്ധം പുലര്‍ത്തിയിരുന്ന മസ്‌കിനെ സര്‍ക്കാര്‍ ചെലവുകള്‍ വെട്ടിക്കുറയ്ക്കുന്നതിനും ഭരണസംവിധാനം കാര്യക്ഷമമാക്കുന്നതിനുമായി രൂപീകരിച്ച ഡോജ് (ഡിപ്പാര്‍ട്ട്‌മെന്റ് ഓഫ് ഗവണ്‍മെന്റ് എഫിഷ്യന്‍സി) വിഭാഗത്തിന്റെ ചുമതലയില്‍ നിയോഗിച്ചിരുന്നു. എന്നാല്‍ സര്‍ക്കാരിലെ മറ്റു ഉദ്യോഗസ്ഥരുമായുള്ള അഭിപ്രായവ്യത്യാസങ്ങളെ തുടര്‍ന്ന് ഏതാനും മാസങ്ങള്‍ക്കുള്ളില്‍ അദ്ദേഹം ഭരണസംവിധാനത്തില്‍നിന്ന് പിന്മാറി. പിന്നീട് ട്രംപുമായുള്ള അകല്‍ച്ച പരിഹരിച്ച് വീണ്ടും അടുത്ത ബന്ധം സ്ഥാപിച്ചെങ്കിലും ഇടക്കാല തിരഞ്ഞെടുപ്പിലെ തിരിച്ചടി ഇരുവരുടെയും രാഷ്ട്രീയ നീക്കങ്ങള്‍ക്ക് വെല്ലുവിളിയായിരിക്കുകയാണ്. ജനുവരിയില്‍ കോണ്‍ഗ്രസിന്റെ നിയന്ത്രണം ഏറ്റെടുക്കുന്ന ഡെമോക്രാറ്റുകള്‍ അമേരിക്കന്‍ രാഷ്ട്രീയത്തിലെ മസ്‌കിന്റെ ഇടപെടലുകളെക്കുറിച്ചും ട്രംപ് ഭരണകൂടവുമായുള്ള ബന്ധത്തെക്കുറിച്ചും അന്വേഷണം നടത്തുമെന്ന് സൂചന നല്‍കിയിട്ടുണ്ട്. ഇതോടെ അമേരിക്കന്‍ രാഷ്ട്രീയത്തില്‍ മസ്‌കിന്റെ സാമ്പത്തിക സ്വാധീനവും ഇടപെടലുകളും കൂടുതല്‍ പരിശോധനകള്‍ക്ക് വിധേയമാകുമെന്നാണ് വിലയിരുത്തല്‍.