മിനസോട്ടയിൽ 23 പേർക്ക് ഇ.കോളിയും സാൽമൊണെല്ലയും; വിസകോൺസിനിൽ 18 കേസുകൾ കൂടി - ചില ബ്രാൻഡുകൾ ഒഴിവാക്കാൻ ആരോഗ്യവകുപ്പ് മുന്നറിയിപ്പ്
ന്യൂയോർക്ക്: അമേരിക്കയിൽ അൽഫാൽഫ മുളപ്പിച്ച വിത്തുകൾ (Alfalfa sprouts) കഴിച്ചതുമായി ബന്ധപ്പെട്ട ഭക്ഷ്യവിഷബാധ കേസുകൾ വർധിക്കുന്നു. മിനസോട്ടയിൽ 23 പേർക്ക് ഇ.കോളി, സാൽമൊണെല്ല അണുബാധ സ്ഥിരീകരിച്ചതായി ആരോഗ്യ അധികൃതർ അറിയിച്ചു. ഇതിൽ രണ്ടുപേരെ ആശുപത്രിയിൽ പ്രവേശിപ്പിച്ചു.
മിനസോട്ട ആരോഗ്യവകുപ്പ് ചില ബ്രാൻഡുകളിലുള്ള അൽഫാൽഫ മുളപ്പിച്ച വിത്തുകൾ കഴിക്കരുതെന്ന് ഉപഭോക്താക്കൾക്ക് മുന്നറിയിപ്പ് നൽകി. മിനസോട്ടയിലെ കേസുകൾക്ക് പുറമെ അയൽ സംസ്ഥാനമായ വിസകോൺസിനിൽ 18 പേർക്ക് കൂടി സമാനമായ രോഗബാധ കണ്ടെത്തിയിട്ടുണ്ട്.
രോഗബാധിതരിൽ മൂന്ന് പേർക്ക് സാൽമൊണെല്ല സ്ഥിരീകരിച്ചു. ഇതിൽ ഒരാൾക്ക് STEC O168:H8 എന്ന ഇ.കോളി വകഭേദവും കണ്ടെത്തി. മറ്റ് ഏഴ് പേർക്ക് STEC O103:H25, 13 പേർക്ക് STEC O26:H11 എന്നീ ഇ.കോളി വകഭേദങ്ങളാണ് സ്ഥിരീകരിച്ചത്.
രണ്ട് ബാക്ടീരിയ; അസാധാരണ സാഹചര്യം
സാധാരണ ഭക്ഷ്യവിഷബാധാ വ്യാപനങ്ങളിൽ ഒരേ തരത്തിലുള്ള രോഗാണുവാണ് കണ്ടെത്താറുള്ളത്. എന്നാൽ ഈ സംഭവത്തിൽ സാൽമൊണെല്ലയ്ക്കൊപ്പം ഇ.കോളിയുടെ വിവിധ വകഭേദങ്ങളും കണ്ടെത്തിയതാണ് ആരോഗ്യവിദഗ്ധരുടെ ശ്രദ്ധ ആകർഷിക്കുന്നത്.
അൽഫാൽഫ വിത്തുകളിൽ രോഗാണുക്കൾ നിലനിൽക്കാനുള്ള സാധ്യത കൂടുതലാണെന്ന് ഭക്ഷ്യസുരക്ഷാ വിദഗ്ധർ ചൂണ്ടിക്കാട്ടുന്നു. വിത്തുകൾ പൂർണമായി ശുചീകരിക്കുന്നത് ബുദ്ധിമുട്ടാണ്. കൂടാതെ ചൂടുവെള്ളത്തിൽ വിത്തുകൾ മുളപ്പിക്കുന്ന പ്രക്രിയയിൽ ചെറിയ തോതിലുള്ള മലിനീകരണം പോലും വേഗത്തിൽ വ്യാപിക്കാൻ സാധ്യതയുണ്ട്.
പ്രശ്നം കണ്ടെത്തിയത് മിനസോട്ടയിലെ കമ്പനിയുടെ ഉൽപന്നങ്ങളിൽ
മിനസോട്ട ആസ്ഥാനമായ Everything Sprouts എന്ന സ്ഥാപനത്തിൽ ഉൽപാദിപ്പിച്ച അൽഫാൽഫ മുളപ്പിച്ച വിത്തുകളാണ് രോഗബാധയുമായി ബന്ധിപ്പിച്ചിരിക്കുന്നത്. Calco, Everything Sprouts എന്നീ ബ്രാൻഡുകളിൽ ഇവ റസ്റ്ററന്റുകളിലും പലചരക്ക് കടകളിലും വിതരണം ചെയ്തിരുന്നു.
മിനസോട്ട ആരോഗ്യ അധികൃതർ വിസകോൺസിനിലെയും ഫെഡറൽ ആരോഗ്യ ഏജൻസികളിലെയും ഉദ്യോഗസ്ഥരുമായി ചേർന്ന് മലിനീകരണത്തിന്റെ ഉറവിടവും വ്യാപ്തിയും കണ്ടെത്താനുള്ള അന്വേഷണം തുടരുകയാണ്.
ഇ.കോളി ബാധ ഗുരുതരമാകാം
ഷിഗ ടോക്സിൻ ഉൽപാദിപ്പിക്കുന്ന ഇ.കോളി അണുബാധയെ STEC എന്നാണ് വിളിക്കുന്നത്. വയറുവേദന, കടുത്ത വയറിളക്കം, രക്തം കലർന്ന വയറിളക്കം തുടങ്ങിയ ലക്ഷണങ്ങളാണ് സാധാരണയായി കാണപ്പെടുന്നത്. ചിലരിൽ ഇത് ഹീമൊലൈറ്റിക് യൂറീമിക് സിൻഡ്രോം (HUS) എന്ന ഗുരുതര സങ്കീർണതയിലേക്ക് നീങ്ങാം. ഇതുവഴി വൃക്കകളുടെ പ്രവർത്തനം തകരാറിലാകാനും മറ്റ് ഗുരുതര ആരോഗ്യപ്രശ്നങ്ങൾ ഉണ്ടാകാനും സാധ്യതയുണ്ട്.
സാൽമൊണെല്ല ബാധയിലും വയറിളക്കം, പനി, ശക്തമായ ഛർദി, നിർജലീകരണം, വയറുവേദന തുടങ്ങിയ ലക്ഷണങ്ങൾ ഉണ്ടാകാം.
അൽഫാൽഫ മുളപ്പിച്ച വിത്തുകളുമായി ബന്ധപ്പെട്ട ഉൽപന്നങ്ങൾ ഉപയോഗിക്കുന്നവർ ജാഗ്രത പാലിക്കണമെന്നാണ് ആരോഗ്യ അധികൃതരുടെ നിർദേശം. അതേസമയം, മലിനീകരണത്തിന്റെ കൃത്യമായ ഉറവിടവും വിപണിയിലെ ബാധിച്ച ഉൽപന്നങ്ങളുടെ വ്യാപ്തിയും കണ്ടെത്താനുള്ള പരിശോധനകൾ തുടരുകയാണ്.