ലോകത്തെ വെബ്സൈറ്റുകളില്‍ 70 ശതമാനം വരെ പ്രവര്‍ത്തിപ്പിക്കാന്‍ ഉപയോഗിക്കുന്ന പിഎച്ച്പി സോഫ്റ്റ്വെയറില്‍ ഗുരുതര സുരക്ഷാ പിഴവ് കണ്ടെത്തി. നിര്‍മിത ബുദ്ധി (എഐ) സാങ്കേതികവിദ്യയുടെ സഹായത്തോടെ കണ്ടെത്തിയ ഈ പിഴവ് മുതലെടുത്ത് ഹാക്കര്‍മാര്‍ക്ക് സുരക്ഷാ അപ്ഡേറ്റ് ഇന്‍സ്റ്റാള്‍ ചെയ്യാത്ത വെബ് സെര്‍വറുകളുടെ നിയന്ത്രണം ഏറ്റെടുക്കാന്‍ കഴിയുമെന്നാണ് മുന്നറിയിപ്പ്. ഇതുവഴി വിവരങ്ങള്‍ ചോര്‍ത്താനും ഹാക്ക് ചെയ്യപ്പെട്ട വെബ്സൈറ്റുകള്‍ സന്ദര്‍ശിക്കുന്നവരെ ലക്ഷ്യമിട്ട് സൈബര്‍ ആക്രമണങ്ങള്‍ നടത്താനും സാധിച്ചേക്കും.
പിഎച്ച്പി സാങ്കേതികവിദ്യയുടെ വികസനത്തിന് നേതൃത്വം നല്‍കുന്ന സംഘം ബുധനാഴ്ചയാണ് സുരക്ഷാ പ്രശ്‌നം വെളിപ്പെടുത്തിയത്. പിഴവ് പരിഹരിക്കുന്നതിന് ലോകമെമ്പാടുമുള്ള വെബ് അഡ്മിനിസ്‌ട്രേറ്റര്‍മാര്‍ അടിയന്തര നടപടികള്‍ സ്വീകരിച്ചുവരികയാണ്. അത്യാധുനിക എഐ സംവിധാനങ്ങള്‍ക്ക് ഈ സുരക്ഷാ പിഴവ് വേഗത്തില്‍ ചൂഷണം ചെയ്യാന്‍ കഴിയുമെന്ന ആശങ്ക നിലനില്‍ക്കുന്നതിനാല്‍ ചിലര്‍ മുന്‍കരുതലെന്ന നിലയില്‍ തങ്ങളുടെ വെബ്സൈറ്റുകള്‍ താത്ക്കാലികമായി ഓഫ്ലൈനിലാക്കുന്നതായും റിപ്പോര്‍ട്ടുണ്ട്.
പിഎച്ച്പി2ഷെല്‍ എന്ന പേരിലുള്ള പിഴവ്
പിഎച്ച്പി2ഷെല്‍ എന്ന് പേരിട്ടിരിക്കുന്ന സുരക്ഷാ പിഴവ് കമ്പ്യൂട്ടറിന്റെ മെമ്മറി കൈകാര്യം ചെയ്യുന്നതിലെ പിഎച്ച്പിയുടെ ചില സാങ്കേതിക ദൗര്‍ബല്യങ്ങളുമായി ബന്ധപ്പെട്ടതാണ്. സുരക്ഷാ അപ്ഡേറ്റ് ഇന്‍സ്റ്റാള്‍ ചെയ്യാത്ത വെബ് സെര്‍വറുകളില്‍ അനധികൃത സോഫ്റ്റ്വെയറുകള്‍ പ്രവര്‍ത്തിപ്പിക്കാന്‍ ഹാക്കര്‍മാര്‍ക്ക് ഈ പിഴവ് ഉപയോഗിക്കാനാകും. ചില സാഹചര്യങ്ങളില്‍ ഏതാനും സെക്കന്‍ഡുകള്‍ക്കുള്ളില്‍ത്തന്നെ ആക്രമണം നടത്താന്‍ കഴിയുമെന്നാണ് ഗവേഷകര്‍ വ്യക്തമാക്കുന്നത്.
പിഎച്ച്പി കഴിഞ്ഞ പത്തുവര്‍ഷത്തിലേറെയായി നേരിട്ട ഏറ്റവും ഗുരുതരമായ സുരക്ഷാ പ്രശ്‌നമാണിതെന്ന് പിഎച്ച്പി പദ്ധതിയുടെ മേല്‍നോട്ടം വഹിക്കുന്ന ലാഭേച്ഛയില്ലാത്ത ഫൗണ്ടേഷനിലെ സുരക്ഷാ എന്‍ജിനീയര്‍ വോള്‍ക്കര്‍ ഡുഷ് പറഞ്ഞു. ഒരു ദശാബ്ദത്തിലേറെ മുമ്പ് ലോകമെമ്പാടുമുള്ള ലക്ഷക്കണക്കിന് സെര്‍വറുകളുടെ സുരക്ഷയെ ബാധിക്കുകയും അടിയന്തര സുരക്ഷാ നടപടികള്‍ക്ക് വഴിവെക്കുകയും ചെയ്ത 'ഹാര്‍ട്ട്ബ്ലീഡ്' സുരക്ഷാ പിഴവിനോടാണ് അദ്ദേഹം ഇതിനെ ഉപമിച്ചത്.
എഐയുടെ സഹായത്തോടെ കണ്ടെത്തല്‍
കാലിഫ് എന്ന സൈബര്‍ സുരക്ഷാ കമ്പനിയിലെ ഗവേഷകനായ റയാന്‍ ഓസ്റ്റിനാണ് ഓപ്പണ്‍എഐയുടെ അത്യാധുനിക എഐ മോഡലുകളിലൊന്നായ ജിപിടി-5.6 എസ്ഒഐയുടെ സഹായത്തോടെ പിഎച്ച്പിയുടെ സോഴ്സ് കോഡ് പരിശോധിക്കുന്നതിനിടെ ഈ പിഴവ് കണ്ടെത്തിയത്. ഓഗസ്റ്റിലായിരുന്നു പരിശോധന. ഓപ്പണ്‍ സോഴ്സ് സോഫ്റ്റ്വെയറുകളിലെ സുരക്ഷാ പിഴവുകള്‍ കണ്ടെത്താനും പരിഹരിക്കാനും സഹായിക്കുന്നതിനായി എഐ കമ്പനികള്‍ ധനസഹായം നല്‍കുന്ന പരിശോധനാ പ്രവര്‍ത്തനങ്ങളുടെ ഭാഗമായിരുന്നു ഈ നീക്കം.
വര്‍ഷങ്ങളായി പിഎച്ച്പിയുടെ സോഴ്സ് കോഡില്‍ ഒളിഞ്ഞുകിടന്നിരുന്ന സുരക്ഷാ ദൗര്‍ബല്യങ്ങളുടെ വിഭാഗത്തില്‍പ്പെട്ടതാണ് ഈ പിഴവ്. പതിറ്റാണ്ടുകള്‍ക്കുമുമ്പ് തന്നെ ഒരു സുരക്ഷാ ഗവേഷകന്‍ ഈ മേഖലയില്‍ പ്രശ്‌നങ്ങളുണ്ടാകാമെന്ന് ചൂണ്ടിക്കാട്ടിയിരുന്നെങ്കിലും അത് ചൂഷണം ചെയ്യുന്നത് അത്യന്തം പ്രയാസകരമാണെന്ന വിലയിരുത്തലിനെത്തുടര്‍ന്ന് കാര്യമായ ശ്രദ്ധ ലഭിച്ചിരുന്നില്ലെന്ന് കാലിഫിന്റെ ചീഫ് എക്‌സിക്യൂട്ടീവ് തായ് ഡുവോങ് പറഞ്ഞു.
എന്നാല്‍ എഐയുടെ സഹായത്തോടെ ഈ പരിമിതി മറികടക്കാന്‍ ഗവേഷകര്‍ക്ക് സാധിച്ചു. പിഎച്ച്പി പ്രവര്‍ത്തിക്കുന്ന സെര്‍വറിലേക്ക് ഏതാനും ഡസന്‍ അഭ്യര്‍ഥനകള്‍ അയച്ചുകൊണ്ട് കമ്പ്യൂട്ടറിന്റെ മെമ്മറിയില്‍ പ്രവര്‍ത്തിക്കുന്ന കോഡിന്റെ നിയന്ത്രണം കൈവരിക്കാനുള്ള മാര്‍ഗം ഓസ്റ്റിന്‍ കണ്ടെത്തി. ചെറിയ സംവിധാനങ്ങളില്‍ നിമിഷങ്ങള്‍ക്കുള്ളില്‍ ആക്രമണം സാധ്യമാകുമ്പോള്‍ സങ്കീര്‍ണമായ സംവിധാനങ്ങളില്‍ ഇതിന് മണിക്കൂറുകള്‍ വേണ്ടിവന്നേക്കാം.
ഓഗസ്റ്റ് 11-ന് ഡുവോങ് പിഎച്ച്പി സുരക്ഷാ എന്‍ജിനീയറായ ഡുഷിനെ ബന്ധപ്പെട്ട് പ്രശ്‌നത്തിന്റെ ഗൗരവം അറിയിച്ചു. തുടര്‍ന്ന് സുരക്ഷാ ഗവേഷകരും സോഫ്റ്റ്വെയര്‍ എന്‍ജിനീയര്‍മാരും ചേര്‍ന്ന് അനൗപചാരിക പ്രവര്‍ത്തകസംഘം രൂപീകരിച്ചു. സോഫ്റ്റ്വെയര്‍ വിതരണക്കാരുടെയും സൈബര്‍ സുരക്ഷാ കമ്പനികളുടെയും സഹകരണത്തോടെ പിഴവ് പരിഹരിക്കാനും ആക്രമണങ്ങള്‍ തടയാനുമുള്ള നടപടികള്‍ ആരംഭിച്ചു.
ഗൂഗിളിന്റെ ഉടമസ്ഥതയിലുള്ള വിസ് സൈബര്‍ സുരക്ഷാ സംഘത്തിലെ ഗവേഷകരും പിന്നീട് സമാനമായ ആക്രമണ മാര്‍ഗങ്ങള്‍ കണ്ടെത്തിയതായി അറിയിച്ചു. കാലിഫിന്റെ കണ്ടെത്തലില്‍നിന്ന് സ്വതന്ത്രമായാണ് ഇവര്‍ ഈ മാര്‍ഗങ്ങള്‍ കണ്ടെത്തിയത്. ഓപ്പണ്‍എഐയുടെ ഗവേഷകസംഘവും സമാനമായ കണ്ടെത്തലുകള്‍ നടത്തിയിരുന്നു.
സുരക്ഷാ അപ്ഡേറ്റുകള്‍ക്ക് മുമ്പേ ആക്രമണഭീഷണി
എഐയുടെ സഹായത്തോടെ സുരക്ഷാ ഗവേഷകര്‍ക്ക് ആയിരക്കണക്കിന് സോഫ്റ്റ്വെയര്‍ പിഴവുകള്‍ കണ്ടെത്താനാകുന്നുണ്ടെങ്കിലും അവ പരിഹരിക്കേണ്ട ഓപ്പണ്‍ സോഴ്സ് പദ്ധതികള്‍ക്ക് ഇത് വലിയ വെല്ലുവിളിയാണ് സൃഷ്ടിക്കുന്നത്. കണ്ടെത്തലുകളുടെ എണ്ണം വര്‍ധിക്കുന്നതോടെ ഓരോ പിഴവും പരിശോധിച്ച് പരിഹരിക്കാന്‍ ആവശ്യമായ സമയവും വിഭവങ്ങളും വര്‍ധിക്കുന്നു.
എന്നാല്‍ പിഎച്ച്പി2ഷെല്ലിന്റെ കാര്യത്തില്‍ ആശങ്ക കൂടുതല്‍ ഗുരുതരമാണ്. സുരക്ഷാ അപ്ഡേറ്റുകള്‍ ലഭ്യമാകുകയും വെബ്സൈറ്റുകളില്‍ അവ ഇന്‍സ്റ്റാള്‍ ചെയ്യുകയും ചെയ്യുന്നതിന് മുമ്പ് സൈബര്‍ കുറ്റവാളികള്‍ എഐയുടെ സഹായത്തോടെ പിഴവ് ചൂഷണം ചെയ്‌തേക്കാമെന്നതാണ് പ്രധാന ഭീഷണി.
എഐയുടെ സഹായമില്ലാതെ കണ്ടെത്താന്‍ പ്രയാസമായിരുന്നേക്കാവുന്ന തരത്തിലുള്ള സുരക്ഷാ പിഴവാണിതെന്ന് വിസിന്റെ സഹസ്ഥാപകന്‍ ആമി ലുട്ട്വാക് അഭിപ്രായപ്പെട്ടു. എഐയുടെ സഹായത്തോടെ കണ്ടെത്തിയ ഏറ്റവും ഗുരുതരമായ സുരക്ഷാ പിഴവുകളിലൊന്നാണിതെന്നും അദ്ദേഹം വിലയിരുത്തി.
പിഴവ് പരിഹരിക്കാനുള്ള പ്രവര്‍ത്തനങ്ങള്‍ പൂര്‍ത്തിയാകുന്നതുവരെ വിവരം അതീവ രഹസ്യമായി സൂക്ഷിക്കാനാണ് ഗവേഷകര്‍ തീരുമാനിച്ചത്. കാരണം, വിവരങ്ങള്‍ പുറത്തായാല്‍ സൈബര്‍ കുറ്റവാളികള്‍ക്ക് എഐ ഉപയോഗിച്ച് പിഴവ് ചൂഷണം ചെയ്യാനും പരിഹാരനടപടികള്‍ പൂര്‍ത്തിയാകുന്നതിനു മുമ്പ് ആക്രമണം നടത്താനും കഴിയുമെന്ന ആശങ്കയുണ്ടായിരുന്നു.
10,000ത്തിലധികം കോഡ് വരികള്‍; ഒടുവില്‍ അടിയന്തര അപ്ഡേറ്റ്
പിഴവ് പരിഹരിക്കുന്നതിനുള്ള പ്രവര്‍ത്തനങ്ങള്‍ വ്യാപകമായിരുന്നു. ഏകദേശം 200 ഫയലുകളില്‍ മാറ്റങ്ങള്‍ വരുത്തേണ്ടിവന്നു. ഇതിനായി 10,000ത്തിലധികം വരികളുള്ള കോഡും ഡെവലപ്പര്‍മാര്‍ എഴുതി.
ഒടുവില്‍ ഒക്ടോബര്‍ 22-ന് സുരക്ഷാ അപ്ഡേറ്റ് പുറത്തിറക്കാന്‍ തീരുമാനിച്ചു. എന്നാല്‍ അപ്ഡേറ്റ് സംബന്ധിച്ച വിവരം ചൊവ്വാഴ്ച ഹാക്കര്‍ ന്യൂസ് വെബ്സൈറ്റിലെ ഒരു പോസ്റ്റിലൂടെ പുറത്തായി. അപ്ഡേറ്റ് പുറത്തിറങ്ങാന്‍ രണ്ടുദിവസത്തില്‍ താഴെ മാത്രം ശേഷിക്കെയായിരുന്നു ഇത്.
തുടര്‍ന്ന് നിശ്ചയിച്ച സമയത്തിനു മുമ്പുതന്നെ അപ്ഡേറ്റ് പുറത്തിറക്കാനുള്ള നീക്കത്തിലേക്ക് പിഎച്ച്പി സംഘം കടന്നു. ബുധനാഴ്ച നിര്‍ണായക സുരക്ഷാ അപ്ഡേറ്റ് പ്രതീക്ഷിക്കണമെന്ന് ലോകമെമ്പാടുമുള്ള ഉപയോക്താക്കള്‍ക്കും വെബ് അഡ്മിനിസ്‌ട്രേറ്റര്‍മാര്‍ക്കും ചൊവ്വാഴ്ച മുന്നറിയിപ്പ് നല്‍കി.
സുരക്ഷാ നടപടികള്‍ സ്വീകരിക്കേണ്ടവര്‍ക്ക് ആവശ്യമായ വിവരം നല്‍കുന്നതിനൊപ്പം ആക്രമണങ്ങള്‍ തയ്യാറാക്കാന്‍ സൈബര്‍ കുറ്റവാളികള്‍ക്ക് അധികസമയം ലഭിക്കാതിരിക്കാനും ഈ തീരുമാനം സഹായിക്കുമെന്ന് വോള്‍ക്കര്‍ ഡുഷ് വ്യക്തമാക്കി.
എഐ സാങ്കേതികവിദ്യ സൈബര്‍ സുരക്ഷാ മേഖലയ്ക്ക് പുതിയ സാധ്യതകള്‍ തുറക്കുമ്പോഴും അതേ സാങ്കേതികവിദ്യ ഉപയോഗിച്ച് സുരക്ഷാ പിഴവുകള്‍ അതിവേഗം ചൂഷണം ചെയ്യപ്പെടാനുള്ള സാധ്യതയും വര്‍ധിക്കുകയാണ്. അതിനാല്‍ പിഎച്ച്പി ഉപയോഗിക്കുന്ന വെബ്സൈറ്റുകളില്‍ സുരക്ഷാ അപ്ഡേറ്റുകള്‍ സമയബന്ധിതമായി ഇന്‍സ്റ്റാള്‍ ചെയ്യുന്നത് നിര്‍ണായകമാണെന്നാണ് ഈ സംഭവം നല്‍കുന്ന മുന്നറിയിപ്പ്.