ഒട്ടാവ: സ്കോട്ട്ലന്ഡിലെ ഗ്ലാസ്ഗോയില് നടക്കുന്ന കോമണ്വെല്ത്ത് ഗെയിംസിന്റെ ഉദ്ഘാടനച്ചടങ്ങില് കാനഡയുടെ പതാകവാഹകയായി വീല്ചെയര് ബാസ്ക്കറ്റ്ബോള് താരം കേഡി ഡാന്ഡെനോയെ തെരഞ്ഞെടുത്തു. രാജ്യത്തെ പ്രമുഖ ലോണ് ബൗള്സ് താരങ്ങളിലൊരാളായ റയാന് ബെസ്റ്റര് കോമണ്വെല്ത്ത് ബാറ്റണ് വഹിക്കും.
കോമണ്വെല്ത്ത് സ്പോര്ട് കാനഡയുടെ നേതൃത്വത്തില് വിവിധ ദേശീയ കായിക സംഘടനകള് നാമനിര്ദേശം ചെയ്ത താരങ്ങളില് നിന്നാണ് തെരഞ്ഞെടുപ്പ് നടന്നത്. കായിക നേട്ടങ്ങള്, നേതൃത്വപാടവം, സമൂഹസേവനം, കായികരംഗത്തിന് നല്കിയ സംഭാവന എന്നിവയുടെ അടിസ്ഥാനത്തിലായിരുന്നു അന്തിമ തീരുമാനം.
ടീം കാനഡയുടെ ഷെഫ് ഡി മിഷനായ എറിക്ക വീബ്, ഡാന്ഡെനോയെയും ബെസ്റ്ററെയും തെരഞ്ഞെടുത്തത് അവരുടെ മികച്ച കായിക നേട്ടങ്ങള് മാത്രമല്ല, നേതൃത്വഗുണം, വ്യക്തിത്വം, കായികരംഗത്തോടുള്ള പ്രതിബദ്ധത എന്നിവ കൂടി പരിഗണിച്ചാണെന്ന് പറഞ്ഞു.
ബ്രിട്ടീഷ് കൊളംബിയയിലെ പെന്ഡര് ഐലന്ഡ് സ്വദേശിനിയായ 36-കാരി കേഡി ഡാന്ഡെനോ ടോക്കിയോ, പാരിസ് പാരാലിമ്പിക്സുകളില് കാനഡയെ പ്രതിനിധീകരിച്ചിട്ടുണ്ട്. 2022 കോമണ്വെല്ത്ത് ഗെയിംസില് നടന്ന 3x3 വീല്ചെയര് ബാസ്ക്കറ്റ്ബോളില് സ്വര്ണമെഡല് നേടിയ ടീമിലെ അംഗമായിരുന്നു.
2020-ല് വീല്ചെയര് ബാസ്ക്കറ്റ്ബോള് കാനഡയുടെ മികച്ച വനിതാ താരമായി തിരഞ്ഞെടുക്കപ്പെട്ട ഡാന്ഡെനോ, കഴിഞ്ഞ വര്ഷം 3x3 ഓപ്പണ് ലോക ചാമ്പ്യന്ഷിപ്പില് ഏറ്റവും മികച്ച താരത്തിനുള്ള പുരസ്കാരവും നേടി. 2019-ലും 2022-ലും നടന്ന പരാപാന് അമേരിക്കന് ഗെയിംസില് യഥാക്രമം സ്വര്ണവും വെള്ളിയും നേടിയിട്ടുണ്ട്. വീല്ചെയര് ബാസ്ക്കറ്റ്ബോള് കാനഡ ഹാള് ഓഫ് ഫെയിമിലും അവര് അംഗമാണ്.
നിലവില് ഇന്റര്നാഷണല് വീല്ചെയര് ബാസ്ക്കറ്റ്ബോള് ഫെഡറേഷന്റെ പ്ലേയേഴ്സ് കമ്മീഷനില് അംഗമായ ഡാന്ഡെനോ, ഉള്ക്കൊള്ളുന്ന കായിക സംസ്കാരത്തിന്റെ ശക്തമായ വക്താവും യുവതാരങ്ങളുടെ മാര്ഗനിര്ദേശകയുമാണ്.
'കാനഡയുടെ പതാക വഹിച്ച് ഉദ്ഘാടനച്ചടങ്ങിലേക്ക് പ്രവേശിക്കുന്നത് വാക്കുകളില് വിവരിക്കാനാകാത്ത ബഹുമതിയാണ്. പ്രത്യേകിച്ച് പാരാ സ്പോര്ട്സിലുള്ള യുവതാരങ്ങള്ക്ക് ഈ രംഗത്ത് വലിയ നേട്ടങ്ങള് കൈവരിക്കാനാകുമെന്ന് ഈ നിമിഷം പ്രചോദനമാകുമെന്ന് ഞാന് പ്രതീക്ഷിക്കുന്നു,' എന്നാണ് ഡാന്ഡെനോ പറഞ്ഞത്.
ഒന്റാറിയോയിലെ ഹാനോവര് സ്വദേശിയായ റയാന് ബെസ്റ്ററുടെ ഏഴാമത്തെ കോമണ്വെല്ത്ത് ഗെയിംസാണിത്. കോമണ്വെല്ത്ത് ഗെയിംസ്, ലോക ചാമ്പ്യന്ഷിപ്പുകള്, ഏഷ്യ- പസഫിക് ചാമ്പ്യന്ഷിപ്പുകള് എന്നിവയിലായി നാല് സ്വര്ണമടക്കം 18 മെഡലുകള് നേടിയിട്ടുള്ള ബെസ്റ്റര്, 2023-ല് പുരുഷ സിംഗിള്സ് ലോക ചാമ്പ്യനായി.
2025-ല് ലോക ബൗള്സ് ഹാള് ഓഫ് ഫെയിമിന്റെ പ്രഥമ അംഗങ്ങളില് ഒരാളായി അദ്ദേഹത്തെ ആദരിച്ചിരുന്നു.
'ഏഴാം തവണ കോമണ്വെല്ത്ത് ഗെയിംസില് കാനഡയെ പ്രതിനിധീകരിക്കുന്നതുതന്നെ വലിയ ബഹുമതിയാണ്. അതിനൊപ്പം ഉദ്ഘാടനച്ചടങ്ങില് കേഡി ഡാന്ഡെനോയോടൊപ്പം ടീമിനെ നയിക്കാന് അവസരം ലഭിച്ചത് ജീവിതത്തിലെ മറക്കാനാവാത്ത നിമിഷമാണ്,' ബെസ്റ്റര് പറഞ്ഞു.
വ്യാഴാഴ്ച ആരംഭിച്ച് ഓഗസ്റ്റ് 2 വരെ നടക്കുന്ന കോമണ്വെല്ത്ത് ഗെയിംസില് 10 പ്രധാന കായിക ഇനങ്ങളും ആറ് പാരാ സ്പോര്ട്സ് ഇനങ്ങളും ഉള്പ്പെടും. 'മൈറ്റി ടുഗേദര്എന്ന പ്രമേയവുമായാണ് ടീം കാനഡ ഗെയിംസില് മത്സരിക്കുന്നത്.
കാനഡയുടെ കായികകാര്യ സഹമന്ത്രി ആദം വാന് കോവെര്ഡന്, കേഡി ഡാന്ഡെനോയും റയാന് ബെസ്റ്ററും ടീം കാനഡയുടെ മികച്ച അംബാസഡര്മാരായി ലോകവേദിയില് രാജ്യത്തെ അഭിമാനത്തോടെ പ്രതിനിധീകരിക്കുമെന്ന് പറഞ്ഞു. ഉദ്ഘാടനച്ചടങ്ങില് ഒളിമ്പിക്- കോമണ്വെല്ത്ത് ചാമ്പ്യന് ഗുസ്തി താരം എറിക്ക വീബാണ് ടീം കാനഡയെ നയിക്കുന്നത്.