തിരുവനന്തപുരം: യു ഡി എഫ് വന് വിജയം നേടിയതോടെ ആരായിരിക്കും കോണ്ഗ്രസിന്റെ മുഖ്യമന്ത്രിയെന്ന ചോദ്യം ഉയര്ന്നു തുടങ്ങി. അധികാരത്തിലെത്തുകയാണെങ്കില് ആരായിരിക്കും മുഖ്യമന്ത്രിയെന്ന് തെരഞ്ഞെടുപ്പിന് മുമ്പ് കോണ്ഗ്രസ് ഉയര്ത്തിക്കാട്ടിയിരുന്നില്ല. മുഖ്യമന്ത്രി പിണറായി വിജയനെതിരെ കൂട്ടായ നേതൃത്വമാണ് പാര്ട്ടി മുന്നോട്ടുവച്ചത്. എന്നാല് വന് ഭൂരിപക്ഷം കിട്ടിയതോടെ പാര്ട്ടിക്കുള്ളില് വിവിധ നേതാക്കള്ക്ക് പിന്തുണ ഉയരുകയാണ്.
മുതിര്ന്ന നേതാവ് പി ജെ കുര്യന് പറഞ്ഞത് പാര്ട്ടിയില് മുഖ്യമന്ത്രിയാകാന് യോഗ്യതയുള്ളവര് ഒരുപാടുണ്ടെങ്കിലും മൂന്ന് പേരുകള് മാത്രമാണ് ഗൗരവമായി പരിഗണിക്കുന്നതെന്നാണ്. എന്നാല് ആ പേരുകള് അദ്ദേഹം വെളിപ്പെടുത്തിയില്ല.
പാര്ട്ടി പാരമ്പര്യമനുസരിച്ച് പുതിയതായി തെരഞ്ഞെടുക്കപ്പെട്ട എം എല് എമാര് കോണ്ഗ്രസ് ഹൈക്കമാന്ഡിന് മുഖ്യമന്ത്രിയെ തെരഞ്ഞെടുക്കാനുള്ള അധികാരം നല്കുന്ന പ്രമേയം പാസാക്കാനാണ് സാധ്യത.
മുഖ്യമന്ത്രി സ്ഥാനത്തേക്കുള്ള പ്രധാന മത്സരാര്ഥികള്
വി. ഡി. സതീശന്
ഇപ്പോഴത്തെ പ്രതിപക്ഷ നേതാവായ വി ഡി സതീശനാണ് പ്രധാനമായും മുഖ്യമന്ത്രി സ്ഥാനത്തേക്ക് മുന്പന്തിയിലുള്ളതെന്നാണ് വിലയിരുത്തപ്പെടുന്നത്. കഴിഞ്ഞ അഞ്ച് വര്ഷമായി നിയമസഭയില് ഇടത് സര്ക്കാരിനെതിരെ ശക്തമായ നിലപാട് സ്വീകരിച്ചതാണ് അദ്ദേഹത്തിന്റെ നേട്ടമായി കാണുന്നത്. ഇന്ത്യന് യൂണിയന് മുസ്ലിം ലീഗ് നേതാവ് സയ്യിദ് സാദിഖലി ശിഹാബ് തങ്ങളുടെ തുറന്ന പിന്തുണയും അദ്ദേഹത്തിന് ലഭിച്ചിട്ടുണ്ട്.
രമേശ് ചെന്നിത്തല
മുന് പ്രതിപക്ഷ നേതാവും പാര്ട്ടിയിലെ സംഘടനാതലത്തില് ശക്തമായ സ്വാധീനമുള്ള നേതാവുമാണ് ചെന്നിത്തല. നായര് സര്വീസ് സൊസൈറ്റിയുമായി അടുത്ത ബന്ധം അദ്ദേഹത്തിന്റെ ശക്തിയാണ്. എന്നാല് 2021ലെ തെരഞ്ഞെടുപ്പ് തോല്വി അദ്ദേഹത്തിന് തിരിച്ചടിയായേക്കാം.
കെ സി വേണുഗോപാല്
കോണ്ഗ്രസിന്റെ ദേശീയ ജനറല് സെക്രട്ടറി (ഓര്ഗനൈസേഷന്) ആയ വേണുഗോപാല്, ദേശീയ നേതൃത്വത്തില് വിശ്വാസം നേടിയ നേതാവാണ്. രാഹുല് ഗാന്ധിയും മല്ലികാര്ജുന് ഖാര്ഗെയും അദ്ദേഹത്തെ പിന്തുണയ്ക്കുന്നുവെന്നാണ് സൂചന. നിയമസഭ തെരഞ്ഞെടുപ്പില് മത്സരിച്ചിട്ടില്ലെങ്കിലും അദ്ദേഹത്തിന്റെ പേര് ശക്തമായി ഉയരുന്നുണ്ട്.
ശശി തരൂര്
തിരുവനന്തപുരം എം പി.യായ തരൂരിന്റെ പേരും ചര്ച്ചയിലുണ്ട്. എന്നാല് അദ്ദേഹത്തെ ദേശീയ രാഷ്ട്രീയവുമായി ബന്ധപ്പെട്ട നേതാവായാണ് കൂടുതല് പരിഗണിക്കുന്നത്.