കൊച്ചി: ചേരാനെല്ലൂര്‍ വാഹനാപകടക്കേസില്‍ പതിനേഴുകാരന്റെ പിതാവായ ജഡ്ജിക്ക് ഹൈക്കോടതി മുന്‍കൂര്‍ ജാമ്യം അനുവദിച്ചു. മൂന്ന് കാര്യങ്ങള്‍ ചൂണ്ടിക്കാട്ടിയാണ് ജസ്റ്റിസ് കൗസര്‍ എടപ്പഗത്ത് അഡീഷണല്‍ ജില്ലാ ജഡ്ജിക്ക് മുന്‍കൂര്‍ ജാമ്യം അനുവദിച്ചത്. അപകടത്തിന് ഇടയാക്കിയ വാഹനം കസ്റ്റഡിയില്‍ എടുത്തിട്ടുണ്ട്. മറ്റ് തെളിവുകള്‍ ഫോറന്‍സിക് പരിശോധനയ്ക്ക് അയച്ചിട്ടുണ്ട്. അന്വേഷണവുമായി പ്രതി സഹകരിക്കുന്നില്ലെന്ന വാദം പ്രോസിക്യൂഷനില്ല. ഈ സാഹചര്യത്തില്‍ കേസില്‍ പ്രതിയായ ജഡ്ജിക്ക് മുന്‍കൂര്‍ ജാമ്യം അനുവദിക്കുന്നുവെന്ന് കോടതി വ്യക്തമാക്കി.
ജഡ്ജിയുടെ മുൻകൂർ ജാമ്യാപേക്ഷയെ ശക്തമായി എതിർത്തുകൊണ്ട് 16 പേജുള്ള വിശദമായ എതിർ സത്യവാങ്മൂലം സമർപ്പിച്ച പ്രോസിക്യൂഷനെയും സംസ്ഥാന സർക്കാരിനെയും രൂക്ഷമായ ഭാഷയിലാണ് ഹൈക്കോടതി വിമർശിച്ചത്. എല്ലാ കേസുകളിലും ഇതുപോലെ വ്യക്തമായ മറുപടി നൽകണമെന്ന് പരിഹസിച്ച കോടതി, സാധാരണ അപകടക്കേസുകളിൽ നിന്ന് വേറിട്ട് എന്താണ് ഈ കേസിന് ഇത്ര പ്രത്യേകതയെന്നും സർക്കാരിനോട് ചോദിച്ചു. ഒരു ജുഡീഷ്യൽ ഓഫീസറെ അറസ്റ്റ് ചെയ്ത് ജയിലിലടച്ച് ചോദ്യം ചെയ്യാനാണോ താൽപ്പര്യം?" എന്ന് കോടതി ആരാഞ്ഞു. "എല്ലാ ജാമ്യാപേക്ഷകളിലും സർക്കാർ ഇതുപോലെ 16 പേജിൻ്റെ വിശദമായ മറുപടി നൽകുന്നുണ്ടോ? ഇത് എങ്ങനെയാണ് ഇത്ര പ്രത്യേക കേസാകുന്നത്? ഈ കേസിൽ മാത്രമായി സർക്കാരിന് എന്താണ് ഇത്ര പ്രത്യേക താല്‍പര്യം? ഇത് സോഷ്യൽ മീഡിയ സൃഷ്ടിക്കുന്ന പ്രതിസന്ധിയാണോ? ജില്ലാ ജഡ്ജിയെ ജയിലിലടച്ച് ചോദ്യം ചെയ്യണമെന്നാണോ നിങ്ങൾ പറയുന്നത്? ജില്ലാ ജഡ്ജി അന്വേഷണവുമായി സഹകരിക്കില്ല എന്ന് കരുതുന്നുണ്ടോ?" കോടതി ചോദിച്ചു
സുഗമമായ അന്വേഷണത്തിന് കസ്റ്റഡിയിൽ ചോദ്യം ചെയ്യൽ അനിവാര്യമാണെന്ന സർക്കാരിൻ്റെ വാദങ്ങളെ തള്ളിക്കൊണ്ടാണ് കോടതി പ്രതികരിച്ചത്. ഒരു ജുഡീഷ്യൽ ഓഫീസറെ കസ്റ്റഡിയിലെടുത്ത് ചോദ്യം ചെയ്യണമെന്ന് പൊലീസ് പറയുന്നത് ദൗർഭാഗ്യകരമാണെന്ന് ഹൈക്കോടതി നിരീക്ഷിച്ചു. അപകടത്തിന് ഇടയാക്കിയ വാഹനം കസ്റ്റഡിയിലെടുത്തിട്ടുണ്ടെന്നും തെളിവുകൾ ഫോറൻസിക് പരിശോധനയ്ക്ക് അയച്ചിട്ടുണ്ടെന്നും കോടതി ചൂണ്ടിക്കാട്ടി. ആറു മണിക്കൂറോളം പൊലീസ് ഇതിനോടകം തന്നെ ഇദ്ദേഹത്തെ ചോദ്യം ചെയ്തിട്ടുണ്ട്. അന്വേഷണവുമായി സഹകരിക്കുന്നില്ലെന്ന് ബോധ്യപ്പെട്ടാൽ പ്രോസിക്യൂഷന് മുൻകൂർ ജാമ്യം റദ്ദാക്കാൻ ആവശ്യപ്പെടാമെന്ന് കോടതി വ്യക്തമാക്കി.
"പ്രതി തുടക്കം മുതൽ തന്നെ അന്വേഷണവുമായി സഹകരിക്കുന്നുണ്ട്. നിങ്ങൾക്ക് എപ്പോഴൊക്കെ ആവശ്യമാണെങ്കിലും അയാൾ സഹകരിക്കും... കസ്റ്റഡിയിൽ വെച്ചുള്ള ചോദ്യം ചെയ്യൽ യഥാർത്ഥത്തിൽ ആവശ്യമാണെങ്കിൽ, ഞാൻ തീർച്ചയായും അയാൾക്ക് ജാമ്യം അനുവദിക്കില്ല. അയാൾ ഹൈക്കോടതിയുടെ നിരീക്ഷണത്തിലാണ്... തൻ്റെ അറിവോടെയല്ല വാഹനം എടുത്തതെന്നാണ് അയാൾ പറയുന്നത്... നിങ്ങൾക്ക് എന്താണ് വേണ്ടത്? നിങ്ങൾക്ക് അയാളെ ചോദ്യം ചെയ്യണമെന്നാണോ? അയാൾ ജയിലിൽ പോകണമെന്നാണോ? ഈ കോടതിയുടെ ഉത്തരവാദിത്തപ്പെട്ട ഒരു ഉദ്യോഗസ്ഥൻ എന്ന നിലയിൽ, ഒരു ജില്ലാ ജഡ്ജി അന്വേഷണവുമായി സഹകരിക്കില്ല എന്ന് നിങ്ങൾ കരുതുന്നുണ്ടോ? അയാൾ സഹകരിക്കുന്നില്ല എന്ന് നിങ്ങൾക്ക് തോന്നുന്ന നിമിഷം നിങ്ങൾ ഇവിടെ വരൂ, ഞാൻ ജാമ്യം റദ്ദാക്കിക്കൊള്ളാം. കഴിഞ്ഞ ആറു മണിക്കൂർ ചോദ്യം ചെയ്യലിൽ അയാൾ സഹകരിച്ചില്ല എന്ന് പറയാൻ നിങ്ങളുടെ പക്കൽ എന്തെങ്കിലും തെളിവുണ്ടോ?"
ജുഡീഷ്യൽ ഓഫീസറായതുകൊണ്ട് അന്വേഷണത്തിൽ നിന്ന് ഒഴിവാക്കപ്പെടുകയോ മുൻകൂർ ജാമ്യത്തിന് പ്രത്യേക പരിഗണന ലഭിക്കുകയോ ഇല്ല. അതേസമയം ഒരു സ്ഥിരം കുറ്റവാളിയല്ലാത്തതിനാൽ നിയമപരമായ സംരക്ഷണം ലഭിക്കാൻ അർഹതയുണ്ടെന്ന് കോടതി നിരീക്ഷിച്ചു. തുടര്‍ന്നാണ് അഡീഷണല്‍ ജില്ലാ ജഡ്ജിക്ക് ജാമ്യം അനുവദിച്ചത്.
കേസിൻ്റെ അന്വേഷണവുമായി ബന്ധപ്പെട്ട് ക്രൈം ബ്രാഞ്ച് സംഘം ഹൈക്കോടതിയുടെ അനുമതിയോടെ ജഡ്ജിയെ രണ്ടുതവണ ചോദ്യം ചെയ്യുകയും അദ്ദേഹത്തിൻ്റെ ഫ്ലാറ്റിൽ ആറു മണിക്കൂറിലേറെ നീണ്ട മിന്നൽ പരിശോധന നടത്തുകയും ചെയ്തിരുന്നു. പരിശോധനയിൽ ആഡംബര ബൈക്കും ഡിജിറ്റൽ ഉപകരണങ്ങളും പൊലീസ് കസ്റ്റഡിയിലെടുത്തിരുന്നു. നേരത്തെ, കേസ് അന്വേഷണത്തിൽ വീഴ്ച വരുത്തിയ പൊലീസുകാർക്കെതിരെ നടപടിയെടുക്കുകയും സിറ്റി പൊലീസ് കമ്മീഷണർ കാളിരാജ് മഹേഷ് കുമാറിനെ സ്ഥലം മാറ്റുകയും ചെയ്തിരുന്നു.
ചേരാനെല്ലൂര്‍ വാഹനാപകടം; 17കാരന്റെ പിതാവായ ജഡ്ജിക്ക് മുന്‍കൂര്‍ ജാമ്യം; പോലീസിനെയും സർക്കാരിനെയും വിമർശിച്ച് ഹൈക്കോടതി
