തൃശൂർ: മനുഷ്യ-വന്യജീവി സംഘർഷത്തിന് ദീർഘകാല പരിഹാരങ്ങൾ തേടുന്ന സാഹചര്യത്തിൽ, വെളളായണി കാർഷിക കോളജിൽ നടന്ന 'അഗ്രി റൂറൽ ഐഡിയത്തോൺ 2026'ൽ ബുദ്ധിപരവും, മാരകമല്ലാത്തതുമായ വന്യജീവി പ്രതിരോധ ഉപകരണത്തിന് ഒന്നാം സമ്മാനം ലഭിച്ചു. 'ഫാം ഗാർഡ്' എന്ന പേരിൽ വികസിപ്പിച്ച ഈ സ്വയംനിയന്ത്രിത ഇലക്ട്രോണിക് ഉപകരണം ജിഷോയ് വി.വി., അഭിജിത് എസ്., വർഷ ഉണ്ണി കെ. എന്നിവർ ചേർന്നാണ് രൂപകൽപ്പന ചെയ്തത്.
കേരള കാർഷിക സർവകലാശാലയുടെ വെളളായണി കാർഷിക കോളജിൽ നടന്ന പരിപാടി 'കെ-അഗ്രി ടെക് ലോഞ്ച് പാഡ്' പദ്ധതിയുടെ ഭാഗമായാണ് സംഘടിപ്പിച്ചത്. നാബാർഡിന്റെ സഹായത്തോടെയും ഓസ്ട്രേലിയയിലെ വെസ്റ്റേൺ സിഡ്നി യൂണിവേഴ്സിറ്റിയുടെ സഹകരണത്തോടെയും വ്യവസായ പങ്കാളിത്തത്തോടെയുമാണ് പദ്ധതി നടപ്പാക്കുന്നത്.
ലഘുഭാരവും എളുപ്പത്തിൽ കൊണ്ടുനടക്കാവുന്നതുമായ 'ഫാം ഗാർഡ്' ഒരു ബുദ്ധിമാനായ, മാരകമല്ലാത്ത പ്രതിരോധ സംവിധാനമാണെന്ന് ജിഷോയ് വ്യക്തമാക്കി. സെൻസർ സംവിധാനമുള്ള ഈ ഉപകരണം വയലുകളുടെ അതിർത്തിയിൽ സ്ഥാപിക്കുമ്പോൾ ചുറ്റുപാടുകൾ നിരന്തരം നിരീക്ഷിക്കും. വന്യജീവി അടുത്തെത്തുന്നുവെന്ന് കണ്ടെത്തുമ്പോൾ വ്യത്യസ്ത മാതൃകകളിലും ആവൃത്തികളിലും പ്രകാശവും ശബ്ദവും പുറപ്പെടുവിക്കും. ഇത് ജീവികളുടെ സ്വാഭാവിക ശബ്ദങ്ങളോട് ബന്ധമില്ലാത്തതിനാൽ അവ ഭ്രമിച്ച് പിന്മാറും. പ്രകാശവും ശബ്ദവും മാറ്റം വരുത്തിക്കൊണ്ടിരിക്കുന്നതിനാൽ കാലക്രമേണ ജീവികൾക്ക് അതിനോട് പരിചയം വരാതിരിക്കാൻ സാധിക്കും.
പകൽ-രാത്രി രീതികളിൽ പ്രവർത്തിക്കുന്ന ഉപകരണത്തിൽ മൂന്നു ലൈറ്റുകളും ഒരു സ്പീക്കറും 360 ഡിഗ്രി പരിധിയിലുള്ള സെൻസറുകളും ഘടിപ്പിച്ചിട്ടുണ്ട്. പുനഃചാർജ് ചെയ്യാവുന്ന ബാറ്ററിയാണ് വൈദ്യുതി ഉറവിടം. സാധാരണ വൈദ്യുതി ബന്ധത്തിലൂടെയോ അനുയോജ്യ ശേഷിയുള്ള സൗരോർജ പാനലിലൂടെയോ ഇത് ചാർജ് ചെയ്യാം.
ആദ്യഘട്ടത്തിൽ കാട്ടുപന്നികളെ അകറ്റാൻ രൂപകൽപ്പന ചെയ്ത ഉപകരണം പിന്നീട് കാട്ടാനകളെ പ്രതിരോധിക്കാനും വികസിപ്പിച്ചതായി നിർമാതാക്കൾ അറിയിച്ചു. മലപ്പുറം ജില്ലക്കാരായ ജിഷോയും ഭാര്യ വർഷയും പാലക്കാട് സ്വദേശിയായ അഭിജിത്തുമാണ് പദ്ധതിക്ക് നേതൃത്വം നൽകിയത്. ഗ്രാമീണ കാർഷിക മേഖലയിൽ സുരക്ഷിതവും ഫലപ്രദവുമായ പരിഹാരമായി 'ഫാം ഗാർഡ്' ശ്രദ്ധേയമാവുകയാണ്.
മനുഷ്യ-വന്യജീവി സംഘർഷത്തിന് ബുദ്ധിപരമായ പരിഹാരം; 'അഗ്രി റൂറൽ ഐഡിയത്തോൺ 2026'ൽ 'ഫാം ഗാർഡ്' -ന് ഒന്നാം സമ്മാനം
