മുംബൈ: ജാതി മാറി പ്രണയിച്ച യുവാവിനെ പെണ്‍കുട്ടിയുടെ വീട്ടുകാര്‍ മര്‍ദ്ദിച്ചു കൊലപ്പെടുത്തി. കാമുകന്റെ മൃതദേഹത്തെ യുവതി വിവാഹം ചെയ്തു.
മഹാരാഷ്ട്രയിലെ നാന്‍ഡഡിലാണ് സംഭവം. സാക്ഷം എന്ന 20 വയസുകാരനും ആഞ്ചല്‍ എന്ന പെണ്‍കുട്ടിയും മൂന്നു വര്‍ഷമായി പ്രണയത്തിലായിരുന്നു. ഇരുവരുടേയും ജാതി വ്യത്യസ്തമായതിനാല്‍ അഞ്ചലിന്റെ വീട്ടുകാര്‍ ഈ ബന്ധത്തിന് എതിരായിരുന്നു.
വീട്ടുകാരുടെ എതിര്‍പ്പിനെ വകവെക്കാതെ ഇരുവരും പ്രണയത്തില്‍ ഉറച്ചു നില്‍ക്കുകയും ആഞ്ചലും സാക്ഷയും വിവാഹം കഴിക്കാന്‍ തീരുമാനിക്കുകയും ചെയ്തിരുന്നു. വിവരമറിഞ്ഞ ആഞ്ചലിന്റെ അച്ഛനും സഹോദരനും ചേര്‍ത്ത് സാക്ഷമിനെ ക്രൂരമായി മര്‍ദ്ദിക്കുകയും തല കല്ലു കൊണ്ട് അടിച്ചു തകര്‍ക്കുകയായിരുന്നു.
സാക്ഷമിന്റെ സംസ്‌കാര ചടങ്ങിനെത്തിയ ആഞ്ചല്‍ തന്റെ സീമന്ത രേഖയില്‍ കുങ്കുമം അണിയുകയും മൃതദേഹത്തെ വിവാഹം കഴിക്കുകയുമായിരുന്നു. ഇനിയുള്ള കാലം സാക്ഷമിന്റെ വീട്ടില്‍ കഴിയുമെന്നും ആഞ്ചല്‍ പറയുന്നു. സാക്ഷമിനെ കൊന്ന തന്റെ സഹോദരനും പിതാവിനും വധഷിക്ഷ നല്‍കണമെന്നും സാക്ഷം മരിച്ചുവെങ്കിലും തങ്ങളുടെ പ്രണയം ജീവിക്കുമെന്നും ആഞ്ചല്‍ പറഞ്ഞു. സംഭവത്തില്‍ പൊലീസ് ആറു പേരെ അറസ്റ്റ് ചെയ്തു.