മുംബൈ: വിയറ്റ്നാമിലെ ഫു ക്വോക് ദ്വീപിന് സമീപമുണ്ടായ ബോട്ട് ദുരന്തത്തില് മരിച്ച 15 ഇന്ത്യക്കാരുടെ മൃതദേഹങ്ങള് പ്രത്യേക വിമാനത്തില് ഇന്ത്യയിലെത്തിച്ചു. മുംബൈയിലെ ഛത്രപതി ശിവാജി മഹാരാജ് അന്താരാഷ്ട്ര വിമാനത്താവളത്തിലാണ് വിമാനം ഇറങ്ങിയത്.
വിമാനത്താവളത്തിലെ കുടിയേറ്റ, കസ്റ്റംസ് ഉള്പ്പെടെയുള്ള നടപടികള് പൂര്ത്തിയാക്കിയ ശേഷം മൃതദേഹങ്ങള് ബന്ധപ്പെട്ട സംസ്ഥാന സര്ക്കാരുകള്ക്ക് കൈമാറും. തുടര്ന്ന് സ്വദേശങ്ങളിലേക്ക് എത്തിച്ച് ബന്ധുക്കള്ക്ക് വിട്ടുനല്കും.
മരിച്ചവരില് 10 പേര് തമിഴ്നാട്ടില് നിന്നുള്ളവരും മൂന്ന് പേര് ആന്ധ്രാപ്രദേശില് നിന്നുള്ളവരും രണ്ട് പേര് കേരളത്തില് നിന്നുള്ളവരുമാണ്.
മൃതദേഹങ്ങള് നാട്ടിലെത്തിക്കുന്ന നടപടികള് ഏകോപിപ്പിക്കുന്നതിന് തമിഴ്നാട് സര്ക്കാര് നേരത്തെ പ്രത്യേക ഉദ്യോഗസ്ഥനെ വിയറ്റ്നാമിലേക്ക് നിയോഗിച്ചിരുന്നു. മുംബൈയില് നിന്ന് തമിഴ്നാട്ടിലെ സ്വദേശങ്ങളിലേക്ക് മൃതദേഹങ്ങള് എത്തിക്കുന്ന നടപടികള്ക്കും സംസ്ഥാന സര്ക്കാര് നേതൃത്വം നല്കും.
കേരളത്തില് നിന്നുള്ള രണ്ട് പേരുടെ മൃതദേഹങ്ങള് തിരുവനന്തപുരത്തേക്ക് വിമാനമാര്ഗം എത്തിക്കുമെന്നാണ് വിവരം. പ്രവാസി ക്ഷേമവുമായി ബന്ധപ്പെട്ട സംസ്ഥാന ഏജന്സിയായ നോര്ക്ക ഇതിനാവശ്യമായ ക്രമീകരണങ്ങള് നടത്തിയിട്ടുണ്ട്. തുടര്ന്ന് മൃതദേഹങ്ങള് കൊല്ലം ജില്ലയിലെ സ്വദേശങ്ങളിലെത്തിച്ച് സംസ്കാര ചടങ്ങുകള് നടത്തും.
ആന്ധ്രാപ്രദേശില് നിന്നുള്ള മൂന്ന് പേരുടെ മൃതദേഹങ്ങള് ബന്ധുക്കള്ക്ക് കൈമാറുന്നതിനുള്ള നടപടികള് കേന്ദ്ര വിദേശകാര്യ മന്ത്രാലയവും വിമാനത്താവള അധികൃതരും ചേര്ന്ന് ഏകോപിപ്പിച്ചുവരികയാണ്.
ഹനോയിയിലെ ഇന്ത്യന് എംബസിയും ഹോ ചി മിന് സിറ്റിയിലെ ഇന്ത്യന് കോണ്സുലേറ്റും ബന്ധപ്പെട്ട സംസ്ഥാന സര്ക്കാരുകളുമായി ചേര്ന്ന് മൃതദേഹങ്ങള് എത്രയും വേഗം ബന്ധുക്കളിലെത്തിക്കുന്നതിനുള്ള നടപടികള് തുടരുമെന്ന് എംബസി പ്രസ്താവനയില് അറിയിച്ചു.
മരിച്ചവരുടെ കുടുംബങ്ങളുടെ ദുഃഖത്തില് തങ്ങളും പങ്കുചേരുന്നതായും അവര്ക്കൊപ്പമാണ് തങ്ങളുടെ പ്രാര്ഥനകളെന്നും എംബസി അറിയിച്ചു.
ജൂലൈ 11-ന് തെക്കന് വിയറ്റ്നാമിലെ പ്രശസ്ത വിനോദസഞ്ചാര കേന്ദ്രമായ ഫു ക്വോക് ദ്വീപിന് സമീപമാണ് അപകടമുണ്ടായത്. ബോട്ട് പ്രതികൂല കാലാവസ്ഥയെ തുടര്ന്ന് മറിഞ്ഞതായാണ് റിപ്പോര്ട്ട്. തുടര്ന്ന് വിയറ്റ്നാം അധികൃതര് വന് തിരച്ചില്- രക്ഷാപ്രവര്ത്തനം നടത്തിയിരുന്നു.
അപകടത്തിന് പിന്നാലെ ഹനോയിയിലെയും ഹോ ചി മിന് സിറ്റിയിലെയും ഇന്ത്യന് നയതന്ത്ര ദൗത്യങ്ങള് പ്രാദേശിക അധികൃതരുമായി സഹകരിച്ച് മൃതദേഹങ്ങള് തിരിച്ചറിയല്, പോസ്റ്റ്മോര്ട്ടം, ഇന്ത്യയിലേക്ക് കൊണ്ടുവരുന്നതിനുള്ള നിയമനടപടികള് എന്നിവ പൂര്ത്തിയാക്കി.
കുടുംബങ്ങള്ക്ക് എല്ലാ സഹായവും നല്കുമെന്ന് കേന്ദ്ര വിദേശകാര്യ മന്ത്രാലയവും ഉറപ്പുനല്കിയിട്ടുണ്ട്.