ചെന്നൈ: സി.ജോസഫ് വിജയ് നേതൃത്വം നൽകുന്ന ടി.വി.കെ സർക്കാർ ഏതുനിമിഷവും താഴെവീഴാമെന്നും അതിനാൽ ഡി.എം.കെ പ്രവർത്തകർ തയ്യാറായിരിക്കണമെന്നും തമിഴ്നാട് മുൻ മുഖ്യമന്ത്രിയും ഡി.എം.കെ അദ്ധ്യക്ഷനുമായ എം.കെ.സ്റ്റാലിൻ. ചെന്നൈയിൽ പാർട്ടിയുടെ തിരഞ്ഞെടുപ്പ് പരാജയത്തെ കുറിച്ച് ചർച്ച ചെയ്യാൻ വിളിച്ചുചേർത്ത ജില്ലാ സെക്രട്ടറിമാരുടെ യോഗത്തിൽ സംസാരിക്കുകയായിരുന്നു അദ്ദേഹം.
തെരഞ്ഞെടുപ്പിൽ പാർട്ടിക്കേറ്റ പരാജയത്തിന്റെ ഉത്തരവാദിത്വം നേതാവെന്ന നിലയിൽ താൻ ഏറ്റെടുക്കുകയാണെന്നും അദ്ദേഹം പറഞ്ഞു. തെരഞ്ഞെടുപ്പ് പരാജയത്തിൽ പല ഭാരവാഹികളും പരസ്പരം പഴിചാരുകയാണ്. അതുവേണ്ട. ഉത്തരവാദിത്വം താൻ ഏറ്റെടുക്കുന്നു. പരാജയ കാരണം കണ്ടെത്തി 20 ദിവസത്തിനകം റിപ്പോർട്ട് നൽകാൻ ഉന്നതതല സമിതിക്ക് നിർദ്ദേശം നൽകിയിട്ടുണ്ട്. 2029ൽ ലോക്സഭ തെരഞ്ഞെടുപ്പിനൊപ്പം നിയമസഭ തെരഞ്ഞെടുപ്പ് നടക്കാൻ സാദ്ധ്യതയുണ്ടെന്നും അദ്ദേഹം കൂട്ടിച്ചേർത്തു.
ടി.വി.കെ സർക്കാർ ഏതു നിമിഷവും താഴെ വീഴും; ഡി.എം.കെ പ്രവർത്തകർ തയ്യാറായിരിക്കണമെന്ന് എം.കെ.സ്റ്റാലിൻ
