കൊല്‍ക്കത്ത: ദുര്‍ഗാപൂജ പന്തലിന്റെ ഒരുഭാഗം തകര്‍ന്നതിനെത്തുടര്‍ന്നുണ്ടായ തിക്കിലും തിരക്കിലും പെട്ട് കുറഞ്ഞത് 19 പേര്‍ മരിച്ചതായി റിപ്പോര്‍ട്ട്. നിരവധി പേര്‍ക്ക് പരിക്കേറ്റു. ശനിയാഴ്ച വൈകിട്ട് സപ്തമി ആഘോഷങ്ങള്‍ക്കിടെ ചോര്‍ബഗാന്‍ സര്‍ബോജനീന്‍ ദുര്‍ഗാപൂജ പന്തലിലാണ് സംഭവം. കനത്ത മഴയ്ക്കിടെ ഭക്തജനങ്ങളുടെ തിരക്ക് വര്‍ധിച്ചതാണ് അപകടസാഹചര്യം രൂക്ഷമാക്കിയത്.
ദുര്‍ഗാപൂജ ആഘോഷങ്ങളില്‍ പങ്കെടുക്കാന്‍ വന്‍തോതില്‍ ആളുകള്‍ എത്തിയതോടെ പന്തലില്‍ തിരക്ക് നിയന്ത്രണാതീതമായി. ഇതിനിടെ പന്തലിന്റെ ഒരുഭാഗം തകര്‍ന്നുവീണതോടെ പരിഭ്രാന്തി പടരുകയും തിക്കിലും തിരക്കിലും പെട്ട് നിരവധി പേര്‍ക്ക് പരിക്കേല്‍ക്കുകയും ചെയ്തു. പരിക്കേറ്റവരെ കൊല്‍ക്കത്ത മെഡിക്കല്‍ കോളജ് ആശുപത്രിയിലേക്ക് മാറ്റി. പൂജാ സംഘാടകരും അടിയന്തര രക്ഷാപ്രവര്‍ത്തകരും രക്ഷാപ്രവര്‍ത്തനങ്ങളില്‍ പങ്കെടുത്തു. വിവരമറിഞ്ഞ് പൊലീസും ദുരന്തനിവാരണ സേനയും സ്ഥലത്തെത്തി.
ഗിരീഷ് പാര്‍ക്ക് പൊലീസ് സ്റ്റേഷന്‍ പരിധിയിലെ സാരദ പാര്‍ക്ക് (ചോര്‍ബഗാന്‍) പൂജാ പന്തലിന്റെ പുറത്തേക്കുള്ള കവാടത്തിലാണ് തിക്കിലും തിരക്കിലും പെട്ടുള്ള അപകടമുണ്ടായതെന്ന് കൊല്‍ക്കത്ത പൊലീസ് അറിയിച്ചു. മഴയ്ക്കിടെ പന്തല്‍ സന്ദര്‍ശിക്കാനെത്തിയവരുടെ തിരക്ക് വര്‍ധിച്ചതാണ് അപകടത്തിന് കാരണമായതെന്നാണ് പ്രാഥമിക വിവരം.
പരിക്കേറ്റ എല്ലാവരെയും രക്ഷപ്പെടുത്തി ചികിത്സയ്ക്കായി മെഡിക്കല്‍ കോളജ് ആശുപത്രിയിലേക്ക് മാറ്റിയതായി പൊലീസ് പ്രസ്താവനയില്‍ വ്യക്തമാക്കി. ലഭ്യമായ വിവരമനുസരിച്ച് 35 പേരെ ആശുപത്രിയില്‍ പ്രവേശിപ്പിച്ചതായും പൊലീസ് അറിയിച്ചു. അപകടത്തെത്തുടര്‍ന്ന് പന്തലിലേക്കുള്ള പ്രവേശനം അധികൃതര്‍ നിരോധിച്ചു.
അപകടസമയത്ത് പന്തലില്‍ വന്‍ ജനത്തിരക്കുണ്ടായിരുന്നതായി ദൃക്‌സാക്ഷി വാര്‍ത്താ ഏജന്‍സിയായ എ എന്‍ ഐയോട് പറഞ്ഞു. നിരവധി പേര്‍ ബോധരഹിതരായെന്നും അവരില്‍ ചിലരെ മോട്ടോര്‍സൈക്കിളുകളില്‍ ആശുപത്രിയിലേക്ക് കൊണ്ടുപോകുന്നത് കണ്ടതായും അദ്ദേഹം പറഞ്ഞു.
പശ്ചിമ ബംഗാള്‍ മുഖ്യമന്ത്രി സുവേന്ദു അധികാരിയും ആരോഗ്യമന്ത്രി ഡോ. ശരദ്വത് മുഖര്‍ജിയും പരിക്കേറ്റവരെ പ്രവേശിപ്പിച്ച കൊല്‍ക്കത്ത മെഡിക്കല്‍ കോളജ് ആശുപത്രിയിലെത്തി സ്ഥിതിഗതികള്‍ വിലയിരുത്തി.
സ്ഥലത്തുണ്ടായിരുന്ന അസിസ്റ്റന്റ് കമ്മീഷണര്‍ ഓഫ് പൊലീസ് (എ സി പി) നല്‍കിയ പ്രാഥമിക വിവരമനുസരിച്ച് സ്വകാര്യ സുരക്ഷാ ഏജന്‍സിയുടെ ഒരു അറിയിപ്പും ചിലര്‍ വിസില്‍ മുഴക്കിയതും തുടര്‍ന്നാണ് തിക്കിലും തിരക്കിലും പെട്ടുള്ള സാഹചര്യമുണ്ടായതെന്ന് മുഖ്യമന്ത്രി പറഞ്ഞു. എന്നാല്‍, അന്വേഷണം പൂര്‍ത്തിയാകുന്നതിനു മുമ്പ് അന്തിമ നിഗമനത്തിലെത്താനാവില്ലെന്നും അദ്ദേഹം വ്യക്തമാക്കി.
സംഭവത്തില്‍ സുതാര്യമായ അന്വേഷണം നടത്തുമെന്ന് മുഖ്യമന്ത്രി ഉറപ്പുനല്‍കി. പൂജാ കമ്മിറ്റി അംഗങ്ങളെയും സുരക്ഷാ ഏജന്‍സി ജീവനക്കാരെയും കസ്റ്റഡിയിലെടുത്തതായും ദുരന്തബാധിത കുടുംബങ്ങള്‍ക്ക് ആവശ്യമായ എല്ലാ സഹായങ്ങളും നല്‍കുമെന്നും അദ്ദേഹം അറിയിച്ചു.
മരിച്ചവരുടെ കുടുംബങ്ങള്‍ക്ക് രണ്ടുലക്ഷം രൂപ ധനസഹായം
ദുരന്തത്തില്‍ മരിച്ചവരുടെ കുടുംബങ്ങള്‍ക്ക് പ്രധാനമന്ത്രിയുടെ ദേശീയ ദുരിതാശ്വാസ നിധിയില്‍നിന്ന് (പി എം എന്‍ ആര്‍ എഫ്) രണ്ടുലക്ഷം രൂപ വീതം അടിയന്തര ധനസഹായം പ്രഖ്യാപിച്ച് പ്രധാനമന്ത്രി നരേന്ദ്ര മോഡി. പരിക്കേറ്റവര്‍ക്ക് 50,000 രൂപ വീതവും നല്‍കുമെന്ന് പ്രധാനമന്ത്രിയുടെ ഓഫീസ് അറിയിച്ചു.
ദുരന്തത്തില്‍ ജീവന്‍ നഷ്ടപ്പെട്ടവരുടെ കുടുംബങ്ങളുടെ ദുഃഖത്തില്‍ പങ്കുചേരുന്നതായും പരിക്കേറ്റവര്‍ വേഗത്തില്‍ സുഖം പ്രാപിക്കട്ടെയെന്നും പ്രധാനമന്ത്രി അനുശോചന സന്ദേശത്തില്‍ പറഞ്ഞു. ദുരന്തബാധിതര്‍ക്ക് പ്രാദേശിക ഭരണകൂടം സാധ്യമായ എല്ലാ സഹായങ്ങളും നല്‍കിവരുന്നതായും അദ്ദേഹം വ്യക്തമാക്കി.
രാഷ്ട്രപതി ദ്രൗപദി മുര്‍മുവും സംഭവത്തില്‍ അനുശോചനം രേഖപ്പെടുത്തി. കൊല്‍ക്കത്തയിലെ ദുര്‍ഗാപൂജ പന്തലിലുണ്ടായ മരണങ്ങള്‍ അത്യന്തം വേദനാജനകമാണെന്നും മരിച്ചവരുടെ കുടുംബങ്ങളുടെ ദുഃഖത്തില്‍ പങ്കുചേരുന്നതായും രാഷ്ട്രപതി അറിയിച്ചു. പരിക്കേറ്റവര്‍ എത്രയും വേഗം സുഖം പ്രാപിക്കട്ടെയെന്നും അവര്‍ ആശംസിച്ചു.
കേന്ദ്ര ആഭ്യന്തരമന്ത്രി അമിത് ഷാ പശ്ചിമ ബംഗാളിലെ ഞായറാഴ്ചത്തെ ഔദ്യോഗിക പരിപാടികളെല്ലാം മാറ്റിവെച്ചതായി അറിയിച്ചു. പരിക്കേറ്റവരെ ആശുപത്രിയിലെത്തി സന്ദര്‍ശിക്കുമെന്നും അദ്ദേഹം വ്യക്തമാക്കി.
സംഭവത്തില്‍ നിരവധി പേര്‍ മരിച്ചെന്ന വാര്‍ത്ത അതീവ ദുഃഖകരമാണെന്ന് വിശേഷിപ്പിച്ച അമിത് ഷാ, മുഖ്യമന്ത്രി സുവേന്ദു അധികാരിയുമായി ഫോണില്‍ സംസാരിച്ചതായും അറിയിച്ചു. പരിക്കേറ്റവര്‍ക്ക് മികച്ച ചികിത്സ ഉറപ്പാക്കാന്‍ ആവശ്യമായ ക്രമീകരണങ്ങള്‍ ഭരണകൂടം നടത്തുന്നുണ്ടെന്നും അദ്ദേഹം പറഞ്ഞു.
അപകടത്തിന്റെ കൃത്യമായ കാരണവും പരിക്കേറ്റവരുടെ അന്തിമ എണ്ണവും സംബന്ധിച്ച കൂടുതല്‍ വിവരങ്ങള്‍ പുറത്തുവരാനുണ്ട്. സംഭവത്തില്‍ അന്വേഷണം തുടരുകയാണ്.