ന്യൂഡൽഹി: നീറ്റ് ചോദ്യപേപ്പർ ചോർച്ചയും വിദ്യാർഥികൾക്കെതിരായ പൊലീസ് നടപടിയും ചൂണ്ടിക്കാട്ടി പ്രതിപക്ഷം ശക്തമായ പ്രതിഷേധം തുടരുന്നതിനിടെ, തിങ്കളാഴ്ച ലോക്സഭയും രാജ്യസഭയും കാര്യമായ നടപടികളൊന്നുമില്ലാതെ ദിവസത്തേക്ക് പിരിഞ്ഞു. ലോക്സഭയിൽ അവതരിപ്പിച്ച പൊതു പരീക്ഷകൾ (അന്യായ മാർഗങ്ങൾ തടയൽ) ഭേദഗതി ബിൽ-2026 ചർച്ച ചെയ്യാനായില്ല.
പേപ്പർ ചോർച്ചയ്ക്ക് കൂടുതൽ കർശന ശിക്ഷ ഉറപ്പാക്കുന്ന ബില്ലിനെക്കുറിച്ചുള്ള ചർച്ച കോൺഗ്രസും സഖ്യകക്ഷികളും മനഃപൂർവം തടസപ്പെടുത്തുകയാണെന്ന് പാർലമെന്ററി കാര്യ മന്ത്രി കിരൺ റിജിജു ആരോപിച്ചു. വിദ്യാർഥികളുടെയും യുവജനങ്ങളുടെയും ഭാവിയുമായി ബന്ധപ്പെട്ട അതീവ പ്രധാനപ്പെട്ട ബില്ലാണിതെന്നും, പ്രതിപക്ഷാംഗങ്ങൾ ഭേദഗതികൾ പോലും സമർപ്പിച്ച സാഹചര്യത്തിൽ ചർച്ചയിൽ നിന്ന് പിന്മാറുന്നത് ശരിയല്ലെന്നും അദ്ദേഹം പറഞ്ഞു.
ആദ്യം നീറ്റ് വിഷയത്തിൽ ചർച്ച വേണമെന്ന് ആവശ്യപ്പെട്ട പ്രതിപക്ഷം, ഇപ്പോൾ അതിനായി സർക്കാർ ബിൽ കൊണ്ടുവന്നിട്ടും സഭ നടക്കാൻ അനുവദിക്കാത്തത് പ്രതിഷേധാർഹമാണെന്ന് റിജിജു വിമർശിച്ചു. ഇത്തരം നിലപാടുകൾ കോൺഗ്രസിന്റെ പ്രതിച്ഛായയെ കൂടുതൽ ദോഷകരമായി ബാധിക്കുമെന്നും അദ്ദേഹം കൂട്ടിച്ചേർത്തു.
ബിജെപി എംപി നിഷികാന്ത് ദുബെയും പ്രതിപക്ഷത്തെ വിമർശിച്ചു. പേപ്പർ ചോർച്ച വിഷയത്തിൽ കോൺഗ്രസിന് ധാർമിക അവകാശമില്ലെന്നും, ചർച്ച നടന്നാൽ അവരുടെ പഴയ നിലപാടുകൾ പുറത്തുവരുമെന്ന ഭയത്താലാണ് സഭ തടസപ്പെടുത്തുന്നതെന്നും അദ്ദേഹം ആരോപിച്ചു.
അതേസമയം, കോൺഗ്രസ് ജനറൽ സെക്രട്ടറി പ്രിയങ്ക ഗാന്ധിയുടെ നേതൃത്വത്തിൽ പ്രതിപക്ഷ എംപിമാർ പാർലമെന്റ് സമുച്ചയത്തിൽ പ്രതിഷേധം സംഘടിപ്പിച്ചു. നീറ്റ് പ്രക്ഷോഭത്തിൽ പങ്കെടുത്ത വിദ്യാർഥികൾക്കെതിരായ പൊലീസ് നടപടിയിൽ കേന്ദ്ര ആഭ്യന്തര മന്ത്രി അമിത് ഷാ മാപ്പ് പറയണമെന്ന് അവർ ആവശ്യപ്പെട്ടു.
ഇതിനിടെ, ലോക്സഭാ സ്പീക്കർ ഓം ബിർളയുടെ ഇടപെടലിനെ തുടർന്ന് ചൊവ്വാഴ്ച ബില്ലിൽ ചർച്ച നടത്താൻ ഭരണപ്രതിപക്ഷ കക്ഷികൾ തമ്മിൽ ധാരണയായതായി ദേശീയ മാധ്യമങ്ങൾ റിപ്പോർട്ട് ചെയ്തു. ബില്ലിന്മേൽ എട്ട് മണിക്കൂർ ചർച്ചയ്ക്ക് സമയം അനുവദിച്ചിട്ടുണ്ടെന്നും, പ്രതിപക്ഷത്തിന്റെ ഭാഗത്ത് നിന്ന് രാഹുൽ ഗാന്ധിയും പ്രിയങ്ക ഗാന്ധിയും ചർച്ചയിൽ പങ്കെടുക്കാൻ സാധ്യതയുണ്ടെന്നും റിപ്പോർട്ടിൽ പറയുന്നു.
പേപ്പർ ചോർച്ച വിരുദ്ധ ബില്ലിൽ ചർച്ചയില്ല; പ്രതിഷേധത്തിൽ പാർലമെന്റ് വീണ്ടും സ്തംഭിച്ചു, കോൺഗ്രസിനെതിരെ രൂക്ഷ വിമർശനവുമായി റിജിജു
