ന്യൂഡൽഹി: രാജ്യത്ത് പെട്രോൾ, ഡീസൽ വില രണ്ട് ആഴ്ചയ്ക്കൊരിക്കൽ പുനഃപരിശോധിക്കാൻ കേന്ദ്ര സർക്കാർ തീരുമാനം എടുത്തതായി സൂചന. ആഗോള എണ്ണവിലയിലെ അനിശ്ചിതത്വത്തിന്റെയും മിഡിൽ ഈസ്റ്റിലെ സംഘർഷത്തിന്റെയും പശ്ചാത്തലത്തിലാണിത്.
ഫെബ്രുവരി 28ന് ആരംഭിച്ച ഇറാൻ-ഇസ്രയേൽ-അമേരിക്ക യുദ്ധം ഇതുവരെ ശമനമില്ലാതെ തുടരുകയാണ്. അമേരിക്കയും ഇസ്രായേലും ചേർന്ന് ഇറാനെതിരെ നടത്തിയ ആക്രമണത്തോടെയാണ് സംഘർഷം ആരംഭിച്ചത്. പിന്നാലെ ഇറാന്റെ പരമോന്നത നേതാവ് ആയത്തൊല്ല അലി ഖമേനെയിയുടെ മരണം സംഭവിച്ചതോടെ സ്ഥിതി കൂടുതൽ ഗുരുതരമായി. തുടർന്ന് ഇറാൻ ഇസ്രായേലിനെയും ഗൾഫ് മേഖലയിലെ അമേരിക്കൻ സൈനിക കേന്ദ്രങ്ങളെയും ലക്ഷ്യമിട്ട് തിരിച്ചടിച്ചു.
സംഘർഷത്തിൽ ഇറാനിലെ നിരവധി ഉന്നത നേതാക്കൾ കൊല്ലപ്പെട്ടു. ഇതിനിടെ ഖമേനെയിയുടെ മകൻ മൊജ്താബ ഖമേനെയിയെ പുതിയ പരമോന്നത നേതാവായി പ്രഖ്യാപിച്ചിട്ടുണ്ട്. രാഷ്ട്രീയപരമായി സമാധാനശ്രമങ്ങൾ പുരോഗമിക്കുന്നില്ല. സുരക്ഷാ ഉറപ്പുകൾ ലഭിക്കാതെ യാതൊരു ചർച്ചയിലും പങ്കെടുക്കില്ലെന്നാണ് ഇറാന്റെ നിലപാട്.
ഇതിനിടെ ആഗോള എണ്ണവിപണിയിൽ ആശങ്ക ശക്തമാണ്. ലോകത്തിലെ എണ്ണവിതരണത്തിന്റെ വലിയൊരു വിഹിതം കടന്നുപോകുന്ന ഹോർമുസ് കടലിടുക്ക് സംഘർഷകേന്ദ്രമായി മാറി. കൂടാതെ ബാബ് അൽ മന്ദബ് കടലിടുക്കിലും ഇറാൻ പിന്തുണയുള്ള ഹൂത്തികളുടെ ഭീഷണി ഉയർന്നതോടെ ഗൾഫ് മേഖലയിലെ എണ്ണ കയറ്റുമതിക്ക് കൂടുതൽ പ്രതിസന്ധി നേരിടാനിടയുണ്ട്.
ഈ സാഹചര്യത്തിലാണ് ഇന്ധനവില സ്ഥിരത ഉറപ്പാക്കാൻ ഇടവിട്ടുള്ള പുനഃപരിശോധന സംവിധാനം കേന്ദ്ര സർക്കാർ പരിഗണിക്കുന്നത്. ആഗോള വിപണിയിലെ മാറ്റങ്ങൾ നേരിട്ട് രാജ്യത്തെ ഇന്ധനവിലയെ ബാധിക്കുന്നതിനാൽ ഉപഭോക്താക്കൾക്കും വിപണിക്കും ഇതിന്റെ പ്രതിഫലം അടുത്ത ദിവസങ്ങളിൽ വ്യക്തമാകും.
ഇന്ധനവില ഇന്ത്യ രണ്ട് ആഴ്ചയ്ക്കൊരിക്കൽ പുനഃപരിശോധിക്കും; മധ്യപൂർവ സംഘർഷം വിപണി സമ്മർദ്ദം കൂട്ടുന്നു
