ബെംഗളൂരു: കര്‍ണാടക മുഖ്യമന്ത്രി സിദ്ധരാമയ്യയും ഉപമുഖ്യമന്ത്രി ഡി.കെ. ശിവകുമാറും തമ്മിലുള്ള നേതൃത്വ തര്‍ക്കം ' ഒത്തുതീര്‍പ്പ് ഫോര്‍മുല'യിലൂടെ ഒതുങ്ങിയതായി സൂചന. ഫോര്‍മുലയുടെ മുഴുവന്‍ രൂപം കോണ്‍ഗ്രസ് കേന്ദ്രനേതൃത്വം അന്തിമ തീരുമാനം എടുക്കുവോളം രഹസ്യ സ്വഭാവത്തില്‍തന്നെയാണ് തുടരുന്നത്.
മുഖ്യമന്ത്രിസ്ഥാനത്തെ ചുറ്റിപ്പറ്റിയുണ്ടായ തര്‍ക്കങ്ങള്‍ക്കൊടുവില്‍ ഇന്ന് രാവിലെ രണ്ടുപേരും ചേര്‍ന്ന് പ്രഭാതഭക്ഷണം പങ്കിട്ടത് 'പഴയത് പഴയതുപോലെ തന്നെയാക്കി' എന്ന സന്ദേശം നല്‍കാനായിരുന്നു.
കൂട്ടിക്കാഴ്ചയുടെ ദൃശ്യങ്ങള്‍ തന്നെ ഇരുനേതാക്കള്‍ക്കിടല്‍ അകല്‍ച്ച ഇല്ലെന്ന് കാണിക്കാനും ഇരുവരും തമ്മിലുള്ള ബന്ധം പഴയതുപോലെ തന്നെ ദൃഢമാണെന്ന് തോന്നിപ്പിക്കുവാനും പാര്‍ട്ടി നാടകീയമായി അവതരിപ്പിച്ചതാകാമെന്ന് രാഷ്ട്രീയ നിരീക്ഷകര്‍ പറയുന്നു.
പാര്‍ട്ടിക്കുള്ളിലെ സമ്മര്‍ദ്ദം കുറയ്ക്കുന്ന 'റിലീസ് വാല്‍വ്' ആയിരുന്നു ഈ കൂടിക്കാഴ്ചയെന്ന് വിശകലനം. ശിവകുമാര്‍ അടുത്ത കാലത്തുതന്നെ, ചിലരുടെ വിലയിരുത്തലില്‍ 2026 മാര്‍ച്ച്-ഏപ്രിലോടെ മുഖ്യമന്ത്രിപദം ഏറ്റെടുക്കുന്ന സുതാര്യമായ അധികാരമാറ്റത്തിന് വഴിയൊരുങ്ങിയിട്ടുണ്ടെന്നാണ് പുറത്തുവരുന്ന വിവരം.
ഈ അവസ്ഥ സുതാര്യമായി മുന്നോട്ട് പോകാന്‍ ശിവകുമാര്‍ നിലവിലെ ഉപമുഖ്യമന്ത്രിയായി ശാന്തമായി പ്രവര്‍ത്തിക്കണമെന്നതാണ് ഒത്തുതീര്‍പ്പ് ഫോര്‍മുലയുടെ' പ്രധാന ഉള്ളടക്കമെന്ന് പാര്‍ട്ടിയുമായി ബന്ധപ്പെട്ടവര്‍ വ്യക്തമാക്കുന്നു.
സിദ്ധരാമയ്യ-ശിവകുമാര്‍ തര്‍ക്കം ആവിയായി; രഹസ്യ ഒത്തുതീര്‍പ്പ് ഫോര്‍മുലയ്ക്ക് വഴങ്ങി
