ഹൂസ്റ്റണ്‍: ഭക്തിയുടെ നിറദീപങ്ങളും വേദമന്ത്രധ്വനികളും ശാസ്ത്രീയ സംഗീതവും നൃത്താവിഷ്‌കാരങ്ങളും ഒത്തുചേരുന്ന നവരാത്രി ആഘോഷങ്ങളാല്‍ ആത്മീയതയുടെയും ഭാരതീയ കലാപൈതൃകത്തിന്റെയും സംഗമവേദിയായി ഹൂസ്റ്റണ്‍ ശ്രീ ഗുരുവായൂരപ്പന്‍ ക്ഷേത്രം. ദുര്‍ഗാപൂജയുടെയും നവരാത്രിയുടെയും പുണ്യദിനങ്ങളില്‍ തുടര്‍ച്ചയായ ഒന്‍പത് ദിനരാത്രങ്ങളിലായി നടക്കുന്ന ആഘോഷങ്ങള്‍ ഭക്തര്‍ക്കും കലാസ്വാദകര്‍ക്കും ഒരുപോലെ ആത്മീയാനുഭവം പകരുന്നതായി ക്ഷേത്രം പ്രസിഡന്റ് ഡോ. രാംദാസ് അറിയിച്ചു.
അജ്ഞാനത്തിന്റെ അന്ധകാരത്തെ ജ്ഞാനത്തിന്റെ പ്രകാശംകൊണ്ടും അധര്‍മത്തെ ധര്‍മത്തിന്റെ ശക്തികൊണ്ടും അതിജീവിക്കുന്ന ദേവീചൈതന്യത്തിന്റെ പ്രതീകമാണ് നവരാത്രി. ദുര്‍ഗ, ലക്ഷ്മി, സരസ്വതി എന്നീ ദേവീഭാവങ്ങളുടെ മഹത്വം സ്മരിക്കുന്ന ഈ പുണ്യകാലം ആത്മസമര്‍പ്പണത്തിന്റെയും ആത്മശുദ്ധീകരണത്തിന്റെയും സന്ദേശമാണ് പകരുന്നത്.
നവരാത്രി ആഘോഷങ്ങളുടെ ഭാഗമായി കര്‍ണാടക സംഗീതക്കച്ചേരികള്‍, ഭക്തിഗാനാവതരണങ്ങള്‍, ശാസ്ത്രീയ സംഗീതപരിപാടികള്‍, നൃത്താവിഷ്‌കാരങ്ങള്‍ എന്നിവ അരങ്ങേറുന്നു. പ്രശസ്തരും പ്രതിഭാധനരുമായ കലാകാരന്മാരുടെ അവതരണങ്ങള്‍ ഭാരതീയ ശാസ്ത്രീയ കലകളുടെ പാരമ്പര്യം ആസ്വാദകരിലേക്ക് എത്തിക്കുന്നതിനൊപ്പം പുതുതലമുറയ്ക്ക് കലാപൈതൃകം പരിചയപ്പെടാനും അവസരമൊരുക്കുന്നു. അമേരിക്കയുടെ വിവിധ ഭാഗങ്ങളില്‍നിന്ന് എത്തുന്ന ഭക്തജനങ്ങളുടെയും കലാകാരന്മാരുടെയും പങ്കാളിത്തം ആഘോഷങ്ങള്‍ക്ക് വൈവിധ്യവും മികവും പകരുന്നു.
പ്രവാസജീവിതത്തില്‍ വളരുന്ന പുതുതലമുറയ്ക്ക് സ്വന്തം ഭാഷയുടെയും സംസ്‌കാരത്തിന്റെയും പാരമ്പര്യത്തിന്റെയും വേരുകള്‍ തിരിച്ചറിയാനുള്ള വേദികൂടിയാണ് നവരാത്രി ആഘോഷങ്ങള്‍. കുടുംബങ്ങളെയും തലമുറകളെയും ഒരുമിപ്പിക്കുകയും സമൂഹത്തില്‍ സൗഹാര്‍ദത്തിന്റെയും ഐക്യത്തിന്റെയും സന്ദേശം പകരുകയും ചെയ്യുന്ന ഈ ആഘോഷം ക്ഷേത്രചടങ്ങുകള്‍ക്കപ്പുറം സാംസ്‌കാരിക കൂട്ടായ്മയുടെ പ്രതീകമായി മാറുന്നു.
ദീപപ്രഭയും മന്ത്രധ്വനികളും സംഗീതവും നൃത്തവും നിറയുന്ന ക്ഷേത്രസന്നിധി ഭാരതീയ ആത്മീയപാരമ്പര്യത്തിന്റെ സജീവസാക്ഷ്യമായി മാറുകയാണെന്ന് പ്രസിഡന്റ് ഡോ. രാംദാസ് പറഞ്ഞു.
വാര്‍ത്ത അയച്ചത്: ശങ്കരന്‍കുട്ടി, ഹൂസ്റ്റണ്‍
