ഹൂസ്റ്റണ്: സെന്റ് മേരീസ് ക്നാനായ കത്തോലിക്കാ ഫൊറോനാ ദൈവാലയത്തില് ഭക്തിനിര്ഭരമായ വണക്കമാസ സമാപനം ആഘോഷിച്ചു. ഇടവകയിലെ ലീജിയന് ഓഫ് മേരി സംഘടനയുടെ നേതൃത്വത്തിലാണ് ചടങ്ങുകള് സംഘടിപ്പിച്ചത്.
വിശുദ്ധ കുര്ബാനയ്ക്ക് മുന്നോടിയായി ലീജിയന് ഓഫ് മേരി അംഗങ്ങളുടെ നേതൃത്വത്തില് ഭക്തജന പങ്കാളിത്തത്തോടെ സുപ്രാധാനമായ ഘോഷയാത്ര നടന്നു. തുടര്ന്ന് ലീജിയന് ഓഫ് മേരി അംഗങ്ങള് മാതാവിന്റെ രൂപത്തിന് മുന്നില് റോസാപ്പൂക്കള് സമര്പ്പിച്ചു പ്രാര്ഥിച്ചു.
ദൈവാലയത്തില് അര്പ്പിക്കപ്പെട്ട മൂന്ന് വിശുദ്ധ കുര്ബാനകള്ക്കും ഇടവക വികാരി ഫാ. അബ്രഹാം മുത്തോലത്ത്, അസിസ്റ്റന്റ് വികാരി ഫാ. ജോഷി വലിയവീട്ടില് എന്നിവര് മുഖ്യകാര്മ്മികത്വം വഹിച്ചു. തിരുക്കര്മ്മങ്ങള്ക്ക് ശേഷം ലീജിയന് ഓഫ് മേരി അംഗങ്ങള് സ്നേഹപൂര്വ്വം തയ്യാറാക്കിയ പരമ്പരാഗത വിഭവമായ 'പാച്ചോര്' പള്ളിയിലെത്തിയ മുഴുവന് വിശ്വാസികള്ക്കുമായി വിതരണം ചെയ്തു.
വണക്കമാസ സമാപനത്തോട് അനുബന്ധിച്ച് നടന്ന വിവിധ പരിപാടികള്ക്ക് ലെജിയന് ഓഫ് മേരി ഭാരവാഹികളായ സിസി തൊട്ടിയില്, സിസി പൂതക്കരി, ടെസി മുണ്ടപ്പുഴ, മോളിക്കുട്ടി പതിയില്, ലീലമ്മ ഇല്ലിക്കാട്ടില് എന്നിവരും മറ്റ് കമ്മിറ്റി അംഗങ്ങളും ചേര്ന്ന് നേതൃത്വം നല്കി.
ഭക്തിസാന്ദ്രമായ അന്തരീക്ഷത്തില് നടന്ന ഈ ചടങ്ങുകളില് പങ്കുചേരാന് ഹൂസ്റ്റണിലെ നിരവധി ക്നാനായ കത്തോലിക്കാ വിശ്വാസികളാണ് ദേവാലയത്തില് ഒത്തുകൂടിയത്.
എല്ലാ ചടങ്ങുകള്ക്കും ഇടവക കൈക്കാരന്മ്മാര്, പാരിഷ് എക്സിക്യൂട്ടീവ് അംഗങ്ങള്, എസ് ജെ സി സിസ്റ്റേഴ്സ് എന്നിവര് നേതൃത്വം നല്കി.
പങ്കെടുത്തവരെ എല്ലാവരെയും പരിശുദ്ധ മാതാവ് അനുഗ്രഹിക്കട്ടെ എന്ന് ഇടവക വികാരി ഫാ. അബ്രഹാം മുത്തോലത്ത്, അസിസ്റ്റന്റ് വികാരി ഫാ. ജോഷി വലിയവീട്ടില് എന്നിവര് ആശംസിച്ചു.