ഹൂസ്റ്റണ്‍: ഹൂസ്റ്റണിലും പരിസര പ്രദേശങ്ങളിലുമുള്ള ദക്ഷിണേന്ത്യന്‍ സമൂഹത്തിന്റെ ഇന്ത്യയിലേക്കുള്ള യാത്ര സുഗമമാക്കുന്നതിന് മലയാളി അസോസിയേഷന്‍ ഓഫ് ഗ്രേറ്റര്‍ ഹൂസ്റ്റന്‍ പുതിയ കാമ്പയിന് ആരംഭിക്കുന്നു. ഹൂസ്റ്റണില്‍ നിന്ന് ഇന്ത്യയിലേ ഡല്‍ഹി മുംബെ ഹൈദരാബാദ് കൊച്ചി എന്നിങ്ങനെ ഏതെങ്കിലും സിറ്റിയിലേക്ക് നേരിട്ടുള്ള വിമാന സര്‍വീസ് ആരംഭിക്കുന്നതിനായി ഒപ്പു ശേഖരണമാണ് കാമ്പയിന് ലക്ഷ്യമിടുന്നത്. ക്യാമ്പയിന്‍ വിജയം കണ്ടാല്‍ അതിന്റെ പ്രയോജനം മലയാളികള്‍ക്ക് മാത്രമല്ല ഈ പ്രദേശത്ത് താമസിക്കുന്ന എല്ലാ ഇന്ത്യക്കാര്‍ക്കും ലഭിക്കുമെന്നാണ് സംഘാടകര്‍ കരുതുന്നത്.
ദക്ഷിണേന്ത്യന്‍ നിവാസികള്‍ അവരുടെ നാട്ടിലേക്കും തിരിച്ചും യാത്ര ചെയ്യുമ്പോള്‍ ഒട്ടേറെ വെല്ലുവിളികള്‍ നേരിടുന്നുണ്ട്. ഹൂസ്റ്റണില്‍ 500,000-ലധികം ഇന്ത്യക്കാര്‍, ഉണ്ടെന്നാണ് കണക്കുകള്‍ വ്യക്തമാക്കുന്നത് പ്രത്യേകിച്ചും അതില്‍ തന്നെ 50 ശതമാനത്തില്‍ അധികം ദക്ഷിണേന്ത്യയില്‍ നിന്നുള്ളവരാണ്. സൗകര്യപ്രദവും താങ്ങാനാവുന്നതുമായ യാത്രാ ഓപ്ഷനുകളുടെ ആവശ്യകത അതുകൊണ്ടുതന്നെ വളരെ വ്യക്തമാണ്.
നിലവില്‍, ഹൂസ്റ്റണിനും ഇന്ത്യയ്ക്കും ഇടയില്‍ യാത്ര ചെയ്യുമ്പോള്‍ യാത്രക്കാര്‍ക്ക് പലപ്പോഴും നീണ്ട യാത്രകളും ചെലവേറിയ ഫ്‌ളൈറ്റുകളും ആശ്രയിക്കേണ്ടി വരുന്നു, പലരും യൂറോപ്പ്, മിഡില്‍ ഈസ്റ്റേണ്‍ ഹബ്ബുകളിലൂടെ സഞ്ചരിക്കാന്‍ നിര്‍ബന്ധിതരാകുന്നു. ഇത് യാത്രാ സമയം വര്‍ദ്ധിപ്പിക്കുക മാത്രമല്ല, യാത്രക്കാരുടെ ചെലവും അസൗകര്യവും വര്‍ദ്ധിപ്പിക്കുകയും ചെയ്യുന്നു.
എയര്‍ ഇന്ത്യയും യുണൈറ്റഡ് എയര്‍ലൈന്‍സും ഉള്‍പ്പെടെയുള്ള വിമാനക്കമ്പനികളോട് ഹ്യൂസ്റ്റണില്‍ നിന്ന് മുംബൈ, ഡല്‍ഹി, ഹൈദരാബാദ് കൊച്ചി തുടങ്ങിയ പ്രധാന ഇന്ത്യന്‍ നഗരങ്ങളിലേക്ക് നേരിട്ടുള്ള ഫ്‌ലൈറ്റുകള്‍ സ്ഥാപിക്കാന്‍ പ്രേരിപ്പിച്ചുകൊണ്ട് ഈ പ്രശ്നങ്ങള്‍ പരിഹരിക്കാനാണ് കാമ്പയിന് ശ്രമിക്കുന്നത്. അങ്ങനെ ചെയ്യുന്നതിലൂടെ, യാത്രക്കാര്‍ക്ക് കുറഞ്ഞ യാത്രാ സമയം, കുറഞ്ഞ നിരക്കുകള്‍, മൊത്തത്തിലുള്ള മെച്ചപ്പെട്ട യാത്രാ അനുഭവങ്ങള്‍ എന്നിവയില്‍ നിന്ന് പ്രയോജനം ലഭിക്കും.
പഠനാവശ്യത്തിന് ഇവിടെയെത്തിയ വിദ്യാര്‍ത്ഥികള്‍, കുടുംബങ്ങള്‍, ബിസിനസ്സ് യാത്രക്കാര്‍ എന്നിവരുള്‍പ്പെടെ പ്രാദേശിക സമൂഹത്തില്‍ നിന്ന് കാമ്പയിന് മികച്ച പിന്തുണയാണ് ലഭിച്ചുകൊണ്ടിരിക്കുന്നത്. ഈ പ്രദേശത്ത് താമസിക്കുന്ന എല്ലാ ഇന്ത്യക്കാര്‍ക്കും നിര്‍ദ്ദിഷ്ട നേരിട്ടുള്ള ഫ്‌ളൈറ്റുകള്‍ ആരംഭിക്കുന്നതിലൂടെ പ്രയോജനം ലഭിക്കും. നിലവില്‍ ഹൂസ്റ്റണില്‍ നിന്നും ദക്ഷിണേന്ത്യയിലേക്കുള്ള യാത്രയുടെ പ്രയോജനം ലഭിക്കുന്നത് എമിറേറ്റ്‌സ് ഖത്തര്‍ എയര്‍വെയ്‌സ് തുടങ്ങിയ മിഡില്‍ ഈസ്റ്റ് കമ്പനികള്‍ക്കാണ് ' അവരുടെ സര്‍വീസുകള്‍ ലോകോത്തര നിലവാരം ഉള്ളതാണെങ്കിലും ഇപ്പോള്‍ വളരെ ചെലവേറിയതാണ്. കൂടുതല്‍ സര്‍വീസുകള്‍ ഹൂസ്റ്റണിലേക്ക് വരുന്നതിലൂടെ നിരക്കുകള്‍ നിയന്ത്രിക്കുന്നതിനും യാത്രാസൗകര്യം വര്‍ദ്ധിപ്പിക്കുന്നതിനും സാധിക്കും. ദക്ഷിണേന്ത്യന്‍ കമ്മ്യൂണിറ്റിക്ക് മികച്ച യാത്രാ സൗകര്യങ്ങളുടെ ആവശ്യകതയെക്കുറിച്ച് ബോധവല്‍ക്കരണം നടത്തുകയും നിവേദനത്തില്‍ ഒപ്പിടുകയും ചെയ്തുകൊണ്ട് മലയാളി അസോസിയേഷന്‍ ഓഫ് ഗ്രേറ്റര്‍ ഹൂസ്റ്റണ്‍ ആരംഭിച്ച ഈ കാമ്പെയ്നില്‍ പങ്കുചേരാന്‍ എല്ലാവരേയും ആഹ്വാനം ചെയ്യുന്നു.
ഹൂസ്റ്റണില്‍ നിന്ന് നേരിട്ട് ഇന്ത്യയിലേക്ക് വിമാന യാത്ര ആരംഭിക്കുന്നതിനായി മാഗ് ക്യാമ്പയിന്‍ ആരംഭിച്ചു
