ഓട്ടവ: കാനഡയിലെ ഇന്ത്യക്കാർ സുരക്ഷാ ഭീഷണി നേരിടുന്നുണ്ടെന്നും എല്ലാവരും ഭയാശങ്കയിലാണെന്നും കാനഡയിലെ ഇന്ത്യൻ ഹൈക്കമ്മീഷണർ ദിനേശ് പട്‌നായിക്.
ഹൈക്കമ്മീഷണറായിട്ടും കാനഡയിൽ താൻ പോലും സംരക്ഷണം തേടേണ്ടി വരുന്ന സാഹചര്യമുണ്ടെന്ന് അദ്ദേഹം ചൂണ്ടിക്കാട്ടി. കാനഡ ഇന്ത്യക്കാർക്ക് സുരക്ഷിതമാണോ എന്നും കാനഡ സ്വന്തം സുരക്ഷയെക്കുറിച്ചും ചിന്തിക്കേണ്ടതുണ്ടെന്നും അദ്ദേഹം പറഞ്ഞു. സിടിവി ന്യൂസിന് നൽകിയ അഭിമുഖത്തിലാണ് ഇന്ത്യക്കാർ നേരിട്ടുകൊണ്ടിരിക്കുന്ന സുരക്ഷാ പ്രശ്‌നങ്ങളെക്കുറിച്ച് പുതിയ ഹൈക്കമ്മീഷണർ പരാമർശിച്ചത്.
ഇത് കാനഡയുടെ പ്രശ്‌നമാണെന്നും കാനഡയിൽ തന്നെയുള്ള ചില കാനഡക്കാരാണ് ഈ പ്രശ്‌നങ്ങൾ സൃഷ്ടിക്കുന്നതെന്നും അദ്ദേഹം കൂട്ടിച്ചേർത്തു. 'കാനഡ ഇന്ത്യക്കാർക്ക് സുരക്ഷിതമാണോ? കാനഡ സ്വയം സുരക്ഷിതമാണോ? ഈ പ്രശ്‌നം സൃഷ്ടിക്കുന്നത് കാനഡക്കാരാണ്. നിങ്ങൾ കാനഡയിൽ എന്താണ് സംഭവിക്കുന്നതെന്ന് നോക്കുന്നുണ്ടോ? വാൻകൂവറിൽ ഒരു റെസ്റ്റോറന്റിന് നേരെ മൂന്നാം തവണയും ആക്രമണം ഉണ്ടായി. ഒരു ഇന്ത്യക്കാരന്റെ ഉടമസ്ഥതയിലുള്ള റെസ്റ്റോറന്റിന് നേരെ വെടിവയ്പ്പ് നടന്നു. ഇന്ത്യക്കാർ ഇവിടെ സുരക്ഷിതരല്ലെന്ന് തോന്നുന്നു. അവരുടെ സുരക്ഷിതത്വം നമ്മൾ ഉറപ്പാക്കേണ്ടതുണ്ടോ? ഇവിടെ എന്താണ് സംഭവിക്കുന്നത്? ഇന്ത്യയിലെ കനേഡിയൻ ഹൈക്കമ്മീഷണർക്ക് സംരക്ഷണം ആവശ്യമില്ല, പക്ഷേ കാനഡയിലെ ഇന്ത്യൻ ഹൈക്കമ്മീഷണർക്ക് സംരക്ഷണം ആവശ്യമാണ്' ഇന്ത്യൻ ഹൈക്കമ്മീഷണർ പറഞ്ഞു.
നയതന്ത്രതലത്തിൽ രണ്ടുവർഷമായി തുടർന്ന ഭിന്നത പരിഹരിച്ച് ഇന്ത്യയും കാനഡയും പരസ്പരം അടുക്കാനും ബന്ധങ്ങൾ പൂർവ്വസ്ഥിതിയിലാക്കാനും ശ്രമം ആരംഭിച്ചതിന്റെ ഭാഗമായാണ് കേന്ദ്രസർക്കാർ പുതിയ ഹൈക്കമ്മീഷണറായി പട്‌നായിക്കിന് നിയമിച്ചത്. ഇന്ത്യയിലെ കാനഡയുടെ പുതിയ ഹൈക്കമ്മീഷണറായി ക്രിസ്റ്റഫർ കൂട്ടറെയും കാനഡ കഴിഞ്ഞ ദിവസം നിയമിച്ചിരുന്നു.
കാനഡയിൽ നിന്ന് നാടുകടത്തപ്പെടുന്ന ഇന്ത്യക്കാരുടെ എണ്ണം ഓരോ വർഷവും വർധിച്ചുവരികയാണെന്നാണ് കണക്കുകൾ സൂചിപ്പിക്കുന്നത്. കനേഡിയൻ ബോർഡർ സർവീസസ് ഏജൻസിയുടെ ഏറ്റവും പുതിയ കണക്കുകൾ പ്രകാരം, ജൂലൈ 28 വരെ 1,891 ഇന്ത്യക്കാരെ കാനഡയിൽ നിന്ന് നാടുകടത്തി. കഴിഞ്ഞ വർഷം ഈ സംഖ്യ 1,997 ആയിരുന്നു. 2019 ൽ ഇത് 625 ആയിരുന്നു.
അടുത്തിടെ വാൻകൂവറിലെ ഒരു റെസ്‌റ്റോറന്റ് മൂന്നാം തവണയും ആക്രമിക്കപ്പെട്ടത് ചൂണ്ടിക്കാട്ടിയാണ് ഹൈക്കമ്മീഷണർ സുരക്ഷാ ആശങ്ക പങ്കുവെച്ചത്. കാനഡയിലെ ഇന്ത്യൻ ഹൈക്കമ്മീഷണർക്ക് സംരക്ഷണം ആവശ്യമായി വരുമ്പോൾ, ഇന്ത്യയിലെ കാനേഡിയൻ ഹൈക്കമ്മീഷണർ അവിടെ ഏറെ സുരക്ഷിതനാണെന്നും അദ്ദേഹം പറഞ്ഞു. താൻ കാനഡയിൽ സംരക്ഷണം തേടേണ്ടി വരുന്നതിലെ വിചിത്രത അദ്ദേഹം എടുത്തുപറഞ്ഞു. കാരണം, ഒരു ഹൈക്കമ്മീഷണർ എന്ന നിലയിൽ തന്റെ സുരക്ഷ അവകാശമാണെന്നും കാനഡ അത് ഉറപ്പുവരുത്തേണ്ടതാണെന്നും അദ്ദേഹം പറഞ്ഞു.
കാനഡയിൽ ഇന്ത്യക്കാർ സുരക്ഷാ ഭീഷണി നേരിടുന്നുണ്ടെന്ന് ഇന്ത്യൻ ഹൈക്കമ്മീഷണർ
