അസമില്‍ 40 ലക്ഷം 'അനധികൃത' കുടിയേറ്റക്കാരുണ്ടെന്ന് കണ്ടെത്തി; ഇവരുടെ ഇന്ത്യന്‍ പൗരത്വം ത്രിശങ്കുവില്‍

Mon,Jul 30,2018


ഗോഹട്ടി: സുപ്രീംകോടതിയുടെ നിരീക്ഷണത്തില്‍ അസമിലെ അനധികൃത കുടിയേറ്റക്കാരെ കണ്ടെത്താന്‍ നടത്തിയ പരിശോധനകള്‍ക്കു ശേഷം പ്രസിദ്ധീകരിച്ച കരട് നാഷണല്‍ രജിസ്റ്റര്‍ ഓഫ് സിറ്റിസണ്‍സ് പട്ടികയില്‍ നിന്ന് സംസ്ഥാനത്തെ 40 ലക്ഷം പേര്‍ പുറത്ത്. 1971 മാര്‍ച്ച് 24 നു മുമ്പ് സംസ്ഥാനത്തേക്കു കുടിയേറിയവരാണെന്നു തെളിയിക്കുവാന്‍ കഴിയാതെ വന്നതാണ് ഇവര്‍ക്ക് വിനയായത്. 1971 മാര്‍ച്ച് 25 നാണ് ബംഗ്ലാദേശ് സ്വാതന്ത്ര്യ പ്രഖ്യാപനം നടത്തിയത്. അനികൃത ബംഗ്ലാദേശി കുടിയേറ്റക്കാരെ കണ്ടെത്താനുള്ള നടപടി മാത്രമാണിതെന്ന് അധികൃതര്‍ പറയുന്നുണ്ടെങ്കിലും, തങ്ങളെ വേട്ടയാടാനുള്ള തന്ത്രമാണിതെന്ന് അസമിലെ വംശീയ ന്യൂനപക്ഷങ്ങള്‍ ആശങ്കപ്പെടുന്നു. രാഷ്ട്രീയ നേട്ടങ്ങല്‍ക്കു വേണ്ടി ജനങ്ങളെ വിഭജിക്കാനാണ് ബി.ജെ.പി ശ്രമിക്കുന്നതെന്ന് പ്രതിപക്ഷം ആരോപിക്കുന്നു.
തങ്ങളുടെ അവകാശവാദം തെളിയിക്കാന്‍ കഴിയാതെ പോയവര്‍ക്ക് നാഷണല്‍ രജിസ്റ്റര്‍ ഓഫ് സിറ്റിസണ്‍സില്‍ ഓഗസ്റ്റ് 30 മുതല്‍ സെപ്റ്റംബര്‍ 28 വരെ വീണ്ടും അപേക്ഷ നല്‍കാവുന്നതാണ്. ഇതിനു ശേഷം ഡിസംബര്‍ 31 ന് അന്തിമ നാഷണല്‍ രജിസ്റ്റര്‍ ഓഫ് സിറ്റിസണ്‍സ് പ്രസിദ്ധീകരിക്കുന്നതാണെന്ന് രജിസ്ട്രാര്‍ ജനറല്‍ ഓഫ് ഇന്ത്യ അറിയിച്ചു. അസമിലുള്ള 3.29 കോടി താമസസക്കാരാണ് നാഷണല്‍ രജിസ്റ്റര്‍ ഓഫ് സിറ്റിസണ്‍സില്‍ പേരു ചേര്‍ക്കാനായി അപേക്ഷ നല്‍കിയിരുന്നത്. ബംഗ്ലാദേശില്‍ നിന്നുള്ള അനധികൃത കുടിയേറ്റക്കാരെ കണ്ടെത്തുക എന്ന ലക്ഷ്യത്തോടെ 2010 ല്‍ തുടക്കമിട്ട പദ്ധതി ഇടയ്ക്ക് മന്ദീഭവിച്ചുവെങ്കിലും 2015 ല്‍ സുപ്രീംകോടതി നിരീക്ഷണത്തില്‍ പുനരാരംഭിക്കുകയായിരുന്നു.
പതിറ്റാണ്ടുകളായി അസമില്‍ താമസിക്കുന്ന ലക്ഷക്കണക്കിനാളുകള്‍ ഇപ്പോള്‍ ഭീതിയിലാണ്. തങ്ങളെ നാടുകടത്തുമോ എന്നാണ് അവരുടെ ആശങ്ക. രാഷ്ട്രീയ വിവാദത്തിനും ഇത് കാരണമായിട്ടുണ്ട്. ബംഗാളികളെയും, ബിഹാറികളെയും പുറത്താക്കാനുള്ള ഗുഢാലോചനയാണിതെന്ന് ബംഗാള്‍ മുഖ്യമന്ത്രി മമത ബാനര്‍ജി കുറ്റപ്പെടുത്തി. എന്നാല്‍, തങ്ങള്‍ സുപ്രീംകോടതി നിര്‍ദേശം പാലിക്കുക മാത്രമാണ് ചെയ്യുന്നതെന്ന് അസം മുഖ്യമന്ത്രി സര്‍ബനാനന്ദ സോണോവാള്‍ പ്രതികരിച്ചു. പാക്കിസ്ഥാനില്‍ നിന്ന് വേര്‍പെട്ട് 1971 ല്‍ ബംഗ്ലാദേശ് സ്വാതന്ത്ര്യ പ്രഖ്യാപനം നടത്തിയതിനെ തുടര്‍ന്ന് ലക്ഷക്കണക്കിനാളുകള്‍ അയല്‍ രാജ്യമായ ഇന്ത്യയിലെ അസമിലേക്ക് പലായനം ചെയ്യുകയായിരുന്നു. ബംഗ്ലാദേശിലെ പ്രശ്‌നങ്ങള്‍ ഇന്തോ - പാക് യുദ്ധത്തിലാണ് കലാശിച്ചത്. ബംഗ്ലാദേശ് സ്വതന്ത്ര രാജ്യമായെങ്കിലും ഇന്ത്യയിലത്തിയവരില്‍ നല്ലൊരു പങ്കും മടങ്ങിയില്ല. 1980 കളില്‍ അസമിലുള്ള വിദേശികളെ പുറത്താക്കണമെന്ന് ആവശ്യപ്പെട്ട് തുടങ്ങിയ പ്രക്ഷോഭത്തിനൊടുവില്‍ 1985 ല്‍ പ്രധാനമന്ത്രി രാജീവ് ഗാന്ധി അസം കരാറില്‍ ഒപ്പുവച്ചത് 1971 മാര്‍ച്ച് 24 നു മുമ്പ് അസമിലെത്താത്താവരെ ഇലക്ടറല്‍ പട്ടികയില്‍ നിന്ന് ഒഴിവാക്കുമെന്ന നിബന്ധനയോടെയാണ്. ഈ തിയതിക്കു മുമ്പ് അസമില്‍ എത്തിയെന്നു തെളിയിക്കാന്‍ രേഖകള്‍ ഇല്ലാത്തവരാണ് ഇപ്പോള്‍ കുടുങ്ങിയിരിക്കുന്നത്.

Other News

  • പഞ്ചാബില്‍ പ്രാര്‍ഥനാ ഹാളിനുനേരെ ഗ്രനേഡ് ആക്രമണം: മൂന്നുപേര്‍ മരിച്ചു
  • റഫാലില്‍ തുറന്ന സംവാദത്തിന് മോഡി യെ വെല്ലുവിളിച്ച് രാഹുല്‍ ഗാന്ധി
  • സി.ബി.ഐ ക്കു 'പ്രവേശനം' നിഷേധിച്ച് ആന്ധ്രയും , ബാംഗാളും; റെയ്ഡ് നടത്താന്‍ ഇനി സംസ്ഥാന സര്‍ക്കാരിന്റെ അനുമതി വേണം
  • തമിഴ്നാട്ടില്‍ നാശം വിതച്ച് 'ഗജ' ചുഴലിക്കാറ്റ്; 20 മരണം, 82000 പേരെ ഒഴിപ്പിച്ചു; ആറു ജില്ലകളില്‍ 471 ദുരിതാശ്വാസ ക്യാമ്പുകള്‍
  • റഫേല്‍ അഴിമതി; ക്രമക്കേടിനെ കുറിച്ച് കൂടുതല്‍ അന്വേഷണം വേണമെന്ന് പ്രതിപക്ഷം; 59000 കോടി രൂപയുടെ ഇടപാടില്‍ ആവശ്യമായ നടപടി ക്രമങ്ങള്‍ പാലിച്ചിട്ടില്ല
  • റഫേല്‍ ഇടപാട്: വ്യോമസേന ഉദ്യോഗസ്ഥര്‍ ഉടന്‍ഹാജരാകണമെന്ന് സുപ്രീംകോടതി
  • മുംബൈയിലെ ഫ്‌ലാറ്റില്‍ തീപ്പിടിത്തം; രണ്ടുപേര്‍ മരിച്ചു
  • ദേശസ്‌നേഹം വളര്‍ത്താന്‍ റെയില്‍വെയും: രാജ്യത്തെ 75 റെയില്‍വെ സ്‌റ്റേഷനുകളില്‍ നൂറ് അടി പൊക്കത്തില്‍ ദേശീയ പതാകകള്‍ സ്ഥാപിക്കും
  • കൂടുതല്‍ മദ്യം നല്‍കിയില്ല; വിദേശ യാത്രക്കാരി എയര്‍ ഇന്ത്യ വിമാനത്തില്‍ അസഭ്യ വര്‍ഷം നടത്തി, ഫ്‌ളൈറ്റ് അറ്റന്‍ഡിനെ മര്‍ദിച്ചു
  • റഫേല്‍ യുദ്ധവിമാന ഇടപാടിന്റെ വിലവിവരങ്ങള്‍ കേന്ദ്രം സുപ്രീം കോടതിയില്‍ നല്‍കി
  • മദ്യപരിശോധനയില്‍ പരാജയപ്പെട്ടു; എയര്‍ ഇന്ത്യ ഓപ്പറേഷന്‍സ് ഡയറക്ടറെ വിമാനം പറത്താന്‍ അനുവദിച്ചില്ല
  • Write A Comment

     
    Reload Image
    Add code here