2030 ആകുമ്പോള്‍ പ്രതിവര്‍ഷം 5.5 മില്യണ്‍ സ്ത്രീകള്‍ കാന്‍സര്‍ മൂലം മരിക്കും.

Tue,Nov 01,2016


2030 ആകുന്നതോടെ ലോകത്തു പ്രതിവര്‍ഷം 5.5 മില്യണ്‍ സ്ത്രീകള്‍ കാന്‍സര്‍ മൂലം മരിക്കുമെന്നു റിപ്പോര്‍ട്ട്.
ഡന്മാര്‍ക്കിലെ ആകെ ജനസംഖ്യ ഏതാണ്ടിതാണെന്നു പറയാം. കഴിഞ്ഞ രണ്ടു ദശാബ്ദത്തിനിടെ ഈ രോഗം മൂലം മരിച്ചവരുടെ എണ്ണത്തില്‍ 60 ശതമാനം വര്‍ധനയാണുണ്ടായിരിക്കുന്നത്.
ലോകജനസംഖ്യയും പ്രായവും വര്‍ധിക്കുന്നതിനിടെ ദരിദ്ര-മധ്യവര്‍ത്തിരാജ്യങ്ങളിലെ സ്ത്രീകളിലാണ് മരണനിരക്കു കൂടുന്നത്. അതില്‍ ഭൂരിഭാഗവും കാന്‍സര്‍ മരണങ്ങളായിരിക്കും. ഏറ്റവും എളുപ്പത്തില്‍ തടയാവുന്ന കാന്‍സര്‍ രോഗമാണ് മരണം വിതയ്ക്കുന്നതെന്നതാണ് ശ്രദ്ധേയമായ കാര്യം.
യുവതികളും മധ്യവയസ്‌കരായ സ്ത്രീകളുമാണ് ഇത്തരം കാന്‍സറിന്റെ പിടിയില്‍പ്പെട്ടു മരിക്കുന്നതെന്നതിനാല്‍ കുടുംബങ്ങളിലും രാജ്യത്തിന്റെ സാമ്പത്തികസ്ഥിതിയിലും ഇതു പ്രതിസന്ധിയുണ്ടാക്കുന്നു. അമേരിക്കന്‍ കാന്‍സര്‍ സൊസൈറ്റിയുടെ വൈസ് പ്രസിഡന്റ് സാലി കൊവല്‍ പ്രമുഖ ഫാര്‍മസ്യൂട്ടിക്കല്‍ കമ്പനിയുമായി ചേര്‍ന്നു നടത്തിയ പഠനമാണ് ഇക്കാര്യങ്ങള്‍ വ്യക്തമാക്കിയത്.
നിലവില്‍ ലോകത്ത് ഏഴിലൊരു സ്ത്രീയുടെ മരണകാരണം കാന്‍സറാണ്, മരണകാരണങ്ങളില്‍ രണ്ടാം സ്ഥാനം. ഒന്നാമതു ഹൃദ്രോഗം തന്നെ. കാന്‍സര്‍ രോഗങ്ങളില്‍ മാരകമായവ സ്തനം, ശ്വാസകോശം, കുടല്‍ മലാശയം, സെര്‍വിക്കല്‍ കാന്‍സറുകളാണ്. ഇവയൊക്കെ തടയാനാവുന്ന കാന്‍സറുകളാണ്. നേരത്തേ നിര്‍ണയിച്ചാല്‍ പൂര്‍ണമായി സുഖപ്പെടുത്താവുന്നവ.

Write A Comment

 
Reload Image
Add code here